ഓണം ബെവ്കോ തൂക്കി; കേരളത്തിൽ 12 ദിവസം വിറ്റത് 920 കോടിയുടെ മദ്യം

തിരുവനന്തപുരം: ഈ ഓണക്കാലത്തും സംസ്ഥാനത്ത് റെക്കോർഡ് മദ്യവിൽപ്പന. 12 ദിവസം കൊണ്ട് 920.74 കോടി രൂപയുടെ മദ്യമാണ് സംസ്ഥാനത്ത് വിറ്റഴിച്ചത്. ബിവറേജസ് കോർപ്പറേഷന്റെ (ബെവ്‌കോ) ഉത്സവകാലത്തെ ഏറ്റവും ഉയർന്ന വിൽപ്പനയാണിത്. 842.07 കോടി രൂപയുടെ മദ്യമാണ് കഴിഞ്ഞ വർഷം ഓണക്കാലത്ത് വിറ്റത്. 9.34 ശതമാനത്തിന്റെ വർധനവാണ് ഈ വർഷം വിൽപ്പനയിലുണ്ടായതെന്ന് മനോരമ ഓൺലൈൻ റിപ്പോർട്ടു ചെയ്തു.

ശനിയാഴ്ച (അവിട്ടം) മാത്രം 94.36 കോടി രൂപയുടെ മദ്യമാണ് വിറ്റത്. ഒന്നാം ഓണമായ ഉത്രാടദിനത്തിലായിരുന്നു ഏറ്റവും അധികം മദ്യവിൽപ്പന നടന്നത്. ഉത്രാടദിനത്തിൽ മാത്രം 137.64 കോടി രൂപയുടെ വിൽപ്പന നടന്നു. 126 കോടിയായിരുന്നു കഴിഞ്ഞ വർഷത്തെ ഉത്രാടദിന വിൽപ്പന. 

Also Read: ഉദയകുമാർ ഉരുട്ടിക്കൊല കേസ്; പ്രതികളെ വെറുതെവിട്ട വിധിക്കെതിരെ കുടുംബം സുപ്രീം കോടതിയിലേക്ക്

ഓഗസ്റ്റ് 25-ന് 66.88 കോടി, 26-ന് 64.61 കോടി, 27-ന് 73.75 കോടി, 28-ന് 55.61 കോടി, 29-ന് 80.41 കോടി, 30-ന് 85.54 കോടി, 31-ന് 74.99 കോടി, സെപറ്റംബർ 2-ന് 90.43 കോടി, 3-ന് 96.52 കോടി, 4-ന് 137.64 കോടി, 6-ന് 94.36 കോടി എന്നിങ്ങനെയാണ് ഓണക്കാലത്ത് മദ്യവിൽപ്പന. തിരുവോണത്തിന് ബിവറേജസ് ഔട്ട്‌ലെറ്റുകള്‍ അവധിയായതിനാല്‍ വലിയ തിരക്കായിരുന്നു സംസ്ഥാനത്തൊട്ടാകെയുള്ള ഔട്ട്‌ലെറ്റുകളില്‍ വ്യാഴം, ശനി ദിവസങ്ങളിൽ അനുഭവപ്പെട്ടത്. 

പാൽ വിൽപ്പനയിലും സര്‍വ്വകാല റെക്കോര്‍ഡ്

എറണാകുളം, കോട്ടയം, തൃശ്ശൂര്‍, ഇടുക്കി എന്നി ജില്ലകള്‍ ഉള്‍പ്പെടുന്ന മില്‍മ എറണാകുളം മേഖലാ യൂണിയന്‍ പാലിന്റെയും പാലുല്‍പ്പന്നങ്ങളുടെയും വില്‍പ്പനയില്‍ ഈ ഓണക്കാലത്ത് സര്‍വ്വകാല റെക്കോര്‍ഡിലാണ്. അത്തം മുതല്‍ തിരുവോണം വരെയുള്ള ഓണക്കാലത്ത് 58 ലക്ഷം ലിറ്റര്‍ പാലും, 3,83,000 കിലോ തൈരും കൂടാതെ 2.35 മെട്രിക് ടണ്‍ നെയ്യും, 70,000 പാക്കറ്റ് പായസം മിക്‌സും ഉള്‍പ്പെടെ 6 കോടി രൂപയുടെ ഉല്‍പ്പന്നം വിപണനം നടത്തി.

Also Read:ശക്തന്റെ തട്ടകത്തിൽ ഇന്ന് പുലികളിറങ്ങും; തൃശൂർ താലൂക്കിൽ പ്രാദേശിക അവധി

ഉത്രാട ദിനത്തില്‍ മാത്രം മേഖലാ യൂണിയന്‍ 11 ലക്ഷം ലിറ്റര്‍ പാലും 90,000 കിലോ തൈരും വില്‍പ്പന നടത്തി ചരിത്ര നേട്ടം കുറിച്ചു. മില്‍മയുടെ സ്വന്തം വിപണന ശൃഖല വഴിയും കൂടാതെ നൂതന വിപണന സംവിധാനമായ ക്വിക്ക് കോമേഴ്സ് ഉപയോഗപ്പെടുത്തിയും മില്‍മ ഷോപ്പികള്‍ വഴിയും വിപണനം നടത്തിയാണ് ഈ മിന്നും നേട്ടം കൈവരിച്ചത്. സാധാരണ ദിനങ്ങളെ അപേക്ഷിച്ച് ഉത്രാട നാളില്‍ പാലിന് മൂന്ന് ഇരട്ടിയോളം വില്‍പ്പനയും ഉണ്ടായി. കഴിഞ്ഞ വര്‍ഷത്തേക്കാള്‍ ഇക്കാലയളവില്‍ 2,15,000 ലിറ്റര്‍ പാലും, 30,000 കിലോ തൈരും, മറ്റ് ഉല്പന്നങ്ങളില്‍ 15% വില്‍പ്പന വര്‍ദ്ധനവും കൈവരിച്ചിട്ടുണ്ട്.

Read More: സംസ്ഥാനത്ത് ഇന്നു മുതൽ ഇടിമിന്നലോടുകൂടിയ മഴ; നാളെ നാലു ജില്ലകളിൽ മഞ്ഞ അലർട്ട്