Kerala Weather: ഇന്ന് പുതിയ ന്യൂനമർദം രൂപപ്പെടും; സംസ്ഥാനത്ത ശക്തമായ മഴയ്ക്കും കാറ്റിനും സാധ്യത

Kerala Rains Updates: കൊച്ചി: സംസ്ഥാനത്ത് മഴ തുടരും. രണ്ട് ന്യൂന മർദങ്ങൾക്ക് പിന്നാലെ ബംഗാൾ ഉൾക്കടലിൽ പുതിയ ന്യൂനമർദം ഇന്ന് രൂപപ്പെടും. മധ്യ കിഴക്കൻ ബംഗാൾ ഉൾക്കടലിൽ ആണ് ന്യൂനമർദം രൂപപ്പെടാൻ സാധ്യത. ഇതിൻറെ ഫലമായി കേരളത്തിൽ ശക്തമായ കാറ്റിനും മഴയ്ക്കും സാധ്യത ഉണ്ടെന്നു കാലാവസ്ഥ നിരീക്ഷണ കേന്ദ്രം മുന്നറിയിപ്പ് നൽകി. മൂന്നു ദിവസമാണ് ശക്തമായ മഴയ്ക്ക് സാധ്യത.

Also Read: രാഷ്ട്രപതിയുടെ സന്ദർശനം; ഇന്ന് കൊച്ചിയിൽ ഗതാഗത നിയന്ത്രണം; അറിയേണ്ട കാര്യങ്ങൾ

വെള്ളിയാഴ്ച ഒരേ സമയം അറബിക്കടലിലും ബംഗാൾ ഉൾക്കടലിലുമായി മൂന്ന് ന്യൂനമർദങ്ങൾ ഉണ്ടാകും. ഇതിൽ അറബിക്കടലിലെ രണ്ടു ന്യൂനമർദങ്ങൾ ഒന്നായി മാറാനുള്ള സാധ്യതയും കാലാവസ്ഥ നിരീക്ഷകർ കാണുന്നു. എന്നാൽ ബംഗാൾ ഉൾക്കടലിൽ നിന്നും അറബിക്കടലിലേക്ക് ന്യൂനമർദ പാത്തി രൂപപ്പെടും. ഇതാണ് കേരളത്തിൽ കൂടുതൽ മഴ ലഭിക്കാൻ കാരണം.

Also Read:ശബരിമല സ്വർണക്കൊള്ള; അന്വേഷണം ഉന്നതരിലേക്ക്, മുരാരി ബാബുവിനെ റിമാൻഡ് ചെയ്തു

കേരളത്തിൽ വടക്ക്-തെക്കൻ ജില്ലകളിൽ ശക്തമായ കാറ്റിനും മഴയ്ക്കും സാധ്യതയുണ്ട്. മഴ മുന്നറിയിപ്പുകളുടെ ഭാഗമായി ഇന്ന് അഞ്ചു ജില്ലകളിൽ ഓറഞ്ച് അലർട്ട് മുന്നറിയിപ്പ് നൽകിയിട്ടുണ്ട്. കാസർകോട്, കണ്ണൂർ, കോഴിക്കോട്, വയനാട്, മലപ്പുറം ജില്ലകളിൽ ആണ് ഓറഞ്ച് അലർട്ട് മുന്നറിയിപ്പ് ഉള്ളത്. 

പാലക്കാട്, തൃശൂർ, എറണാകുളം, ഇടുക്കി, തിരുവനന്തപുരം ജില്ലകളിൽ യെല്ലോ അലർട്ട് മുന്നറിയിപ്പും നൽകിയിട്ടുണ്ട്. രണ്ടു ദിവസത്തെ ഇടവേളക്ക് ശേഷം 27 ന് വീണ്ടും ശക്തമായ മഴയെത്തും. 27 ന് കാസർകോട് കണ്ണൂർ കോഴിക്കോട് വയനാട് ജില്ലകളിൽ യെല്ലോ അലർട്ട് മുന്നറിയിപ്പ് നൽകി.

Also Read:കൊച്ചിയിൽ കലാസൃഷ്ടികൾക്ക് നേരെയുള്ള ആക്രമണം; പ്രതിഷേധം ശക്തം, നിയമനടപടിയുമായി ലളിതകലാ അക്കാദമി

കേരള-കർണാടക-ലക്ഷദ്വീപ് തീരങ്ങളിൽ ഒക്ടോബർ 27 വരെ മത്സ്യബന്ധനത്തിന് പോകാൻ പാടില്ലെന്ന് കേന്ദ്ര കാലാവസ്ഥ വകുപ്പ് മുന്നറിയിപ്പ് നൽകി. ഒക്ടോബർ 27 വരെ കേരള-കർണാടക തീരങ്ങളിലും, അതിനോട് ചേർന്ന സമുദ്രഭാഗങ്ങളിലും, ലക്ഷദ്വീപ് തീരങ്ങളിലും മണിക്കൂറിൽ 40 മുതൽ 50 കിലോമീറ്റർ വരെയും ചില അവസരങ്ങളിൽ 60 കിലോമീറ്റർ വരെയും വേഗതയിൽ ശക്തമായ കാറ്റിനും മോശം കാലാവസ്ഥയ്ക്കും സാധ്യത ഉണ്ടെന്നാണ് മുന്നറിയിപ്പ്.

Read More: സിപിഐയുടെ എതിർപ്പ് തള്ളി; പിഎം ശ്രീയിൽ സംസ്ഥാന സർക്കാർ ഒപ്പുവെച്ചു