സിസിടിവി ദൃശ്യങ്ങൾ പുറത്തുവിട്ട് സിപിഎം; പാലക്കാട്ടെ കള്ളപ്പണ ആരോപണം കത്തുന്നു

പാലക്കാട്: കോൺഗ്രസ് നേതാക്കൾ ഹോട്ടലിൽ കള്ളപ്പണം കൊണ്ടുവന്നുവെന്ന ആരോപണം ബലപ്പെടുത്താൻ ദൃശ്യങ്ങളുമായി സിപിഎം. ഹോട്ടലിലെ ഇന്നലത്തെ സിസിടിവി ദൃശ്യങ്ങൾ പുറത്തുവിടുകയായിരുന്നു സിപിഎം. നീല ട്രോളി ബാഗുമായി കെഎസ്‌യു നേതാവ് ഫെനി നടന്നുപോവുന്ന ദൃശ്യങ്ങളാണ് പുറത്തുവന്നിട്ടുള്ളത്. ഷാഫി പറമ്പിൽ എംപി, ശ്രീകണ്ഠൻ എംപി, ജ്യോതികുമാർ ചാമക്കാല എന്നിവർ കെപിഎം ഹോട്ടലിലേക്ക് കയറുന്നതാണ് ദൃശ്യങ്ങളിലുള്ളത്. സിസിടിവി ദൃശ്യങ്ങൾ പുറത്തുവിടുമെന്ന് സിപിഎം നേരത്തെ പറഞ്ഞിരുന്നു.

അതേസമയം, കള്ളപ്പണം ആരോപണം തെളിയിച്ചാൽ തിരഞ്ഞെടുപ്പ് പ്രചാരണം അവസാനിപ്പിക്കുമെന്ന് യുഡിഎഫ് സ്ഥാനാർഥി രാഹുൽ മാങ്കുട്ടത്തിൽ പ്രതികരിച്ചു. തിരഞ്ഞെടുപ്പ് ചുമതലയുള്ളതിനാലാണ് ഫെനി നൈനാൻ മുറിയിൽ വന്നതെന്നും അതിൽ എന്താണ് കുഴപ്പമെന്നും രാഹുൽ പ്രതികരിച്ചു.  

നേരത്തെ കള്ളപ്പണം ആരോപിച്ച റെയ്ഡ് നടത്തിയ അതേഹോട്ടലിൽ ബുധനാഴ്ചയും പോലീസ് പരിശോധന നടത്തി. സിസിടിവി ദൃശ്യങ്ങൾ ഉൾപ്പെടെയാണ് പാലീസ് പുതിയതായി പരിശോധിച്ചത്.  ടൗൺ സൗത്ത് പോലീസ് സിഐയുടെ നേതൃത്വത്തിലായിരുന്നു പരിശോധന.ഇതിനിടെ ഹോട്ടലിൽ കൃത്യമായ പരിശോധന വേണമെന്ന് ആവശ്യപ്പെട്ട് സിപിഎം ഔദ്യോഗികമായി പരാതി നൽകി. സിപിഎം പാലക്കാട് ജില്ലാ സെക്രട്ടറി എസ് പി ഓഫീസിൽ എത്തിയാണ് പരാതി നൽകിയത്. ഹോട്ടലിലെ മുഴുവൻ മുറികളും സിസിടിവി ദൃശ്യങ്ങളും പരിശോധിക്കണം എന്നാണ് സിപിഎം ആവശ്യം.

പാലക്കാട്ടെ പോലീസ് നടപടി രാഷ്ട്രീയമായി ഉപയോഗിക്കാൻ ശ്രമിക്കുകയാണ് കോൺഗ്രസ്. പോലീസ് നടപടിയിൽ പ്രതിഷേധിച്ച് പാലക്കാട് എസ്.പി.ഓഫീസിലേക്ക് നടന്ന പ്രതിഷേധമാർച്ച് സംഘർശഷത്തിൽ കലാശിച്ചിരുന്നു. പോലീസും പ്രവർത്തകരും ഉന്തുംതള്ളുമുണ്ടായി.

കോട്ടമൈതാനത്ത് നടന്ന പ്രതിഷേധത്തിൽ വി.കെ. ശ്രീകണ്ഠൻ എം.പി., കെ. സുധാകരൻ, ഷാഫി പറമ്പിൽ എം.പി. തുടങ്ങിയവരടക്കം സംസാരിച്ചു. തുടർന്ന് നേതാക്കളുടെ നേതൃത്വത്തിൽ പ്രവർത്തകർ എസ്പി ഓഫീസിലേക്ക് മാർച്ച് നടത്തുകയായിരുന്നു. പോലീസ് റെയ്ഡ് ആസൂത്രിതമാണെന്ന് കെപിസിസി പ്രസിഡന്റ് കെ. സുധാകരൻ ആരോപിച്ചിരുന്നു. ശക്തമായ പ്രതിഷേധവുമായി മുന്നോട്ടുപോകുമെന്നും കോൺഗ്രസ് വ്യക്തമാക്കിയിട്ടുണ്ട്.

അതേസമയം, പോലീസ് നടപടിയിൽ നേതാക്കൾ തമ്മിലുള്ള വാക്ക് പോര് പുരോഗമിക്കുകയാണ്. പോലീസ് നടപടി തടഞ്ഞ കോൺഗ്രസ് നടപടി എന്തോ ഒളിക്കാൻ ഉള്ളതുകൊണ്ടാണെന്നാണ് സിപിഎം നേതാക്കളുടെ നിലപാട്. കോൺഗ്രസിന്റെ തിരഞ്ഞെടുപ്പ് രംഗങ്ങളിലെ നിലപാട് സംശയങ്ങൾ ജനിപ്പിക്കുന്നതാണെന്ന് എൽഡിഎഫ് കൺവീനർ ടി പി രാമകൃഷ്ണൻ ആരോപിച്ചു.

Read More

• പെട്ടിയിൽ രൂപയുണ്ടെന്ന് തെളിയിച്ചാൽ പ്രചാരണം അവസാനിപ്പിക്കും: വെല്ലുവിളിച്ച് രാഹുൽ മാങ്കൂട്ടത്തിൽ
• റെയ്ഡ് നടന്ന ഹോട്ടലിൽ വീണ്ടും പരിശോധന നടത്തി പോലീസ്; ഹാർഡ് ഡിസ്‌ക് പിടിച്ചെടുത്തു
• പണപ്പെട്ടി അന്വേഷിക്കേണ്ടത് കോണ്‍ഗ്രസ് നേതാക്കന്മാരുടെ മുറിയിലല്ല, മുഖ്യമന്ത്രി താമസിക്കുന്ന ക്ലിഫ് ഹൗസിൽ: വി.ഡി.സതീശൻ
• പോലീസിന്‍റേത് ആണത്തമില്ലാത്ത തെമ്മാടിത്തമെന്ന് കെ.സുധാകരൻ, പാലക്കാട്ടെ ജനങ്ങൾ എല്ലാം കാണുന്നുണ്ടെന്ന് ഷാഫി പറമ്പിൽ