Kerala SSLC 10th Result 2024: എസ്എസ്എൽസി ഫലം പ്രഖ്യാപിച്ചു; മുന്നിൽ കോട്ടയം, പിന്നിൽ തിരുവനന്തപുരം

Kerala SSLC 10th Result 2024: തിരുവനന്തപുരം: സംസ്ഥാനത്തെ എസ്എസ്എൽസി/ റ്റിഎച്ച്എസ്എസ്എൽസി/ എഎച്ച്എസ്എൽസി പരീക്ഷകളുടെ ഫലം പ്രഖ്യാപിച്ചു. ഇക്കുറി 99.69% ആണ് വിജയശതമാനം. 71,831 പേർക്ക് മുഴുവൻ വിഷയങ്ങളിലും എ പ്ലസ് ലഭിച്ചു. പാലാ വിദ്യാഭ്യാസ ജില്ലയിലാണ് ഏറ്റവും കൂടുതല്‍ വിജയശതമാനം (100). ആറ്റിങ്ങലാണ് കുറവ് (99). വിദ്യാഭ്യാസ, തൊഴിൽ വകുപ്പ് മന്ത്രി വി. ശിവൻകുട്ടിയാണ് ഫലം പ്രഖ്യാപിച്ചത്.

കഴിഞ്ഞ വർഷത്തെ അപേക്ഷിച്ച് ഇത്തവണത്തെ എസ്എസ്എൽസി വിജയശതമാനത്തിൽ നേരിയ കുറവുണ്ട്.ഈ വർഷത്തെ വിജയശതമാനം 99.69 ആണ്. കഴിഞ്ഞ വർഷം ഇത് 99.70 ആയിരുന്നു. ഫലം സംസ്ഥാന സർക്കാരിന്റെ ഔദ്യോഗിക വെബ്സൈറ്റുകളിൽ അറിയാം. ടി.എച്ച്.എസ്.എൽ.സി., എ.എച്ച്.എസ്.എൽ.സി. ഫലങ്ങളും പ്രഖ്യാപിച്ചു.

എസ്എസ്എല്‍സി റെഗുലര്‍ വിഭാഗത്തില്‍ 427153 വിദ്യാര്‍ഥികളാണ് പരീക്ഷയെഴുതിയത്. ഇതില്‍ 425563 വിദ്യാര്‍ഥികൾ ഉപരിപഠനത്തിന് യോഗ്യത നേടി. 71831 പേര്‍ക്ക് മുഴുവന്‍ വിഷയങ്ങള്‍ക്കും എപ്ലസ് ലഭിച്ചു. എസ്എസ്എൽസിയിൽ വിജയശതമാനം ഏറ്റവും കൂടുതൽ കോട്ടയം ജില്ലയിലും (99.92) വിജയശതമാനം ഏറ്റവും കുറവ് തിരുവനന്തപുരത്തുമാണ്. (99.08)

ഇത്തവണ എസ്എസ്എൽസി പരീക്ഷാ ഫലത്തിനായി 4.7 ലക്ഷം വിദ്യാർത്ഥികളാണ് പരീക്ഷയെഴുതി കാത്തിരുന്നത്. പ്ലസ് വൺ പ്രവേശനത്തിനായുള്ള ട്രയൽ അലോട്ട്മെന്റ് മേയ് 29 ന് നടക്കും. ആദ്യ അലോട്ട്മെന്റ് ജൂൺ 5 ആണ്. ജൂൺ 24 ന് പ്ലസ് വൺ ക്ലാസുകൾ തുടങ്ങും. ഇത്തവണ 4,33,231 പ്ലസ് വൺ സീറ്റുകളാണ് അനുവദിച്ചിട്ടുള്ളത്. 33,030 സീറ്റുകളാണ് വിഎച്ച്എസ്ഇയ്ക്ക് അനുവദിച്ചിട്ടുള്ളത്.

രണ്ടാം വർഷ ഹയർ സെക്കൻഡറി, വൊക്കേഷണൽ ഹയർ സെക്കൻഡറി പരീക്ഷാ ഫലം നാളെയാണ് പ്രഖ്യാപിക്കുക. ഉച്ചയ്ക്ക് ശേഷം 3 മണിക്കാണ് പ്രഖ്യാപനം. പൊതു വിദ്യാഭ്യാസവും തൊഴിലും വകുപ്പ് മന്ത്രി വി ശിവൻകുട്ടി ഫലപ്രഖ്യാപനം നടത്തുക. കഴിഞ്ഞ വർഷം മേയ് 25 നാണ് ഫലപ്രഖ്യാപനം നടത്തിയത്.

എസ്എസ്എൽസിക്ക് ഇത്തവണ പരീക്ഷയെഴുതിയവരിൽ 2,17,525 പേർ ആൺകുട്ടികളും 2,09,580 പേർ പെൺകുട്ടികളുമായിരുന്നു. ആകെ 2,971 പരീക്ഷാ കേന്ദ്രങ്ങളിലായി മാർച്ച് 4 മുതൽ 25 വരെയായിരുന്നു പരീക്ഷ നടന്നത്. മുൻ വർഷത്തെ അപേക്ഷിച്ച് 11 ദിവസം നേരത്തേയാണ് ഇത്തവണത്തെ ഫലപ്രഖ്യാപനം നടന്നത്. 

സർക്കാർ സ്കൂളുകളിൽ നിന്ന് 1,43557 കുട്ടികളും എയ്ഡഡ് സ്കൂളുകളിൽ നിന്നായി 2,55360 കുട്ടികളും അൺ എയ്ഡഡ് സ്കൂളുകളിൽ നിന്ന് 28188 കുട്ടികളുമാണ് പരീക്ഷ എഴുതിയത്. ഗൾഫ് മേഖലയിൽനിന്നും 536 പേരും ലക്ഷദ്വീപിൽനിന്നും 285 പേരും പരീക്ഷ എഴുതിയപ്പോൾ ഓൾഡ് സ്കീമിൽ 26 പേരും പരീക്ഷ എഴുതിയിരുന്നു. 

Read More

• Kerala SSLC Result 2024: എസ്എസ്എൽസി പരീക്ഷാ ഫലം അതിവേഗം അറിയാൻ വെബ്സൈറ്റുകൾ, പരിശോധിക്കേണ്ടത് എങ്ങനെ?
• Kerala SSLC Result 2024:എസ്എസ്എൽസി ഫലം അറിയാൻ മൊബൈൽ ആപ്പ്
• Kerala SSLC Result 2024: ഉന്നത പഠനത്തിനുള്ള യോഗ്യത ആർക്കൊക്കെ ലഭിക്കും? എസ്എസ്എൽസി ഗ്രേഡ്, മാർക്ക് എന്നിവയെക്കുറിച്ച് അറിയേണ്ടതെല്ലാം
• പത്താംക്ലാസ് കഴിഞ്ഞു; ഇനിയെന്ത്?