Vishu Phalam 2024: സമ്പൂർണ വിഷു ഫലം 2024, അശ്വതി മുതൽ രേവതി വരെ

Vishu Phalam 2024: 2024 ലെ വിഷു മുതൽ 2025 ലെ വിഷു വരെ നീണ്ടുനിൽക്കുന്ന അനുഭവങ്ങളാവും ഇതിലൂടെ പ്രതീക്ഷിക്കപ്പെടുന്നത്. മീനം രാശിയിൽ നിന്നും മേടം രാശിയിലേക്കുള്ള സൂര്യൻ്റെ പ്രവേശസമയത്തെ കേന്ദ്രീകരിച്ചാണ് വിഷുഫലം നിർണയിക്കുക. 1199 മീനമാസം 31 ന്  (2024 ഏപ്രിൽ 13 ന്) ശനിയാഴ്ച രാത്രി എട്ട് മണി 51 മിനിട്ടിനാണ് സൂര്യൻ്റെ മീനം രാശിയിൽ നിന്നും മേടം രാശിയിലേക്കുള്ള പ്രവേശനം.

മകയിരം നക്ഷത്രം നാലാംപാദത്തിൽ മിഥുനക്കൂറിലായാണ് ഈ സംക്രമം സംഭവിക്കുന്നത് എന്നതും ജ്യോതിഷപരമായ പ്രത്യേകതയുള്ള കാര്യമാണ്. ഇത് അശ്വതി മുതൽ രേവതി വരെയുള്ള 27 നക്ഷത്രക്കാരെ ഏതെല്ലാം വിധത്തിൽ സ്വാധീനിക്കുന്നു എന്ന പരിശോധനയാണ് വിഷുഫലത്തിൻ്റെ കാതൽ.

മേടസംക്രമം നടക്കുന്ന നക്ഷത്രത്തെയും അതിൻ്റെ മുൻപിൻ നക്ഷത്രങ്ങളെയും ആദിശൂല നക്ഷത്രങ്ങളെന്ന് പറയുന്നു. രോഹിണി, മകയിരം, തിരുവാതിര ഇവയാണ് ഇത്തവണത്തെ ആദിശൂല നക്ഷത്രങ്ങൾ. ഇവയിൽ ജനിച്ചവർക്ക് രോഗദുരിതങ്ങൾ, ധനവ്യയം, വിപത്തുകൾ എന്നിവ സാമാന്യ ഫലം. 

ആദിശൂലത്തിൻ്റെ അടുത്ത ആറ് നക്ഷത്രങ്ങൾ 'ആദിഷഡ്കം' എന്ന് വിളിക്കപ്പെടുന്നു. പുണർതം, പൂയം, ആയില്യം, മകം, പൂരം, ഉത്രം എന്നിവ അതിലുൾപ്പെടുന്നുണ്ട്. സൽകീർത്തിയും ധനോന്നതിയും അഭീഷ്ടസാഫല്യവും പ്രതീക്ഷിക്കാവുന്ന വർഷമാവും ഇത്.

തുടർന്ന് വരുന്ന മൂന്ന് നക്ഷത്രങ്ങൾ- അത്തം, ചിത്തിര, ചോതി എന്നിവ- 'മധ്യശൂലം' എന്ന വിഭാഗത്തിലാണ്. ഗുണാനുഭവങ്ങൾ ഇവർക്ക് കുറയാം. പ്രതിസന്ധികളെ  നേരിടേണ്ടി വന്നേക്കും. പിന്നീടുള്ള ആറ് നക്ഷത്രങ്ങൾ 'മധ്യഷഡ്കം' എന്ന വിശേഷണത്തിൽ വരുന്നു. വിശാഖം, അനിഴം, തൃക്കേട്ട, മൂലം, പൂരാടം, ഉത്രാടം എന്നിവയാണ് ആ നക്ഷത്രങ്ങൾ. ബഹുമാന്യത, അംഗീകാരം, ഐശ്വര്യം എന്നിവ പ്രതീക്ഷിക്കാം.. 

തുടർന്നുള്ള മൂന്ന് നക്ഷത്രങ്ങൾ 'അന്ത്യശൂലം' ആണ്. തിരുവോണം, അവിട്ടം, ചതയം എന്നിവയാണ് ഇതിലുൾപ്പെടുന്നത്. ഇവർക്ക് ക്ലേശങ്ങൾ, കാര്യതടസ്സം, അമിതവ്യയം ഇവ സാധ്യതകളാണ്. പൂരൂരുട്ടാതി മുതൽ ആറ് നക്ഷത്രങ്ങൾ (പൂരൂരുട്ടാതി, ഉത്രട്ടാതി, രേവതി, അശ്വതി, ഭരണി, കാർത്തിക) 'അന്ത്യ ഷഡ്ക' ത്തിൽ വരുന്നു. പ്രായേണ ഗുണാനുഭവങ്ങൾക്കാവും ഈ നാളുകാരുടെ വിഷുഫലത്തിൽ മുൻതൂക്കം. 

'ശൂലം' എന്ന വിഭാഗത്തിലെ ഒമ്പത് നാളുകൾക്ക് സമ്മർദങ്ങളാവും അധികം. 'ഷഡ്കം' എന്ന വിഭാഗത്തിലെ പതിനെട്ട് നാളുകൾക്കും അനായാസമായി ജീവിതത്തെ മുന്നോട്ടു നയിക്കാനും കഴിഞ്ഞേക്കും എന്ന് ഒറ്റനോട്ടത്തിൽ വിഷുഫലം  വ്യക്തമാക്കുന്നു. ഇവയോടൊപ്പം നവഗ്രഹങ്ങളുടെ സ്വാധീനവും പ്രധാനമാണ്. രാഹു, കേതു, വ്യാഴം, ശനി, സൂര്യൻ, ചൊവ്വ തുടങ്ങിയ ഗ്രഹങ്ങളുടെ രാശിസഞ്ചാരം നിർണായകമാവും.

ഇവയും കൂടി വിലയിരുത്തപ്പെടുമ്പോൾ അശ്വതി മുതൽ രേവതി വരെയുള്ള 27 നാളുകാരുടെ വിഷുഫലത്തിന് കൃത്യതയും വ്യക്തതയും കൈവരുന്നു.. 

അശ്വതി

1199 ലെ വിഷുഫലം അശ്വതി നക്ഷത്രത്തിൽ ജനിച്ചവർക്ക് സാമാന്യത്തിലധികം ഗുണപ്രദമാണ്. ചിരകാലമായുള്ള അഭിലാഷങ്ങൾ പൂവണിയും. സ്വാധികാരം വർദ്ധിച്ചേക്കും. സ്ഥാനോന്നതി ഉണ്ടാവുന്നതാണ്. ജനനേതൃത്വം വഹിക്കാൻ വഴിയൊരുങ്ങും. സംഘടനകളിൽ സമാദരിക്കപ്പെടും. വ്യാഴം, ശനി എന്നീ സുപ്രധാന ഗ്രഹങ്ങൾ ഈ വർഷം അനുകൂല ഭാവങ്ങളിൽ സഞ്ചരിക്കുന്നതും കൂടി കണക്കിലെടുത്താൽ സാമ്പത്തിക വളർച്ച സംഭവിക്കുന്നതാണ്. സ്ഥിരവരുമാനത്തിൽ ഉയർച്ച പ്രതീക്ഷിക്കാം. ഉപരിപഠനത്തിന് മികച്ച അവസരങ്ങൾ വന്നെത്തും. കുടുംബത്തിൻ്റെ പിന്തുണ ശക്തി പകരുന്നതാണ്. സ്വത്തുക്കൾ സംരക്ഷിക്കാനും വ്യവഹാരങ്ങളിൽ വിജയിക്കാനും കഴിയും. മേടം, കർക്കടകം, വൃശ്ചികം, മീനം എന്നീ മാസങ്ങൾക്ക് ശുഭത്വം കുറയുന്നതാണ്.

ഭരണി

ഇക്കൊല്ലത്തെ വിഷുഫലം അനുകൂലവും ഗുണകരവുമാവും. സകല മേഖലകളിലും മുന്നേറാൻ കഴിയും. ജോലി തേടുന്നവർക്ക് മികച്ച അവസരങ്ങൾ വന്നെത്തുന്നതാണ്. നവസംരംഭങ്ങൾ തുടങ്ങാനും അവയിൽ പുരോഗതി പ്രാപിക്കാനും കഴിയും. പ്രണയം സഫലമാവും.  പഠനത്തിൽ മികവുണ്ടാവുന്നതാണ്. ഗാർഹിക രംഗം പൊതുവേ സമാധാനപൂർണമാകും. മാനസിക സംഘർഷങ്ങൾക്ക് അയവുണ്ടായേക്കും. മത്സരം/പരീക്ഷ ഇവയിൽ അഭിമാനകരമായ വിജയം കരസ്ഥമാക്കും. കിടപ്പുരോഗികൾക്ക് സമാശ്വാസത്തിൻ്റെ കാലമാണ്. ഗൃഹനിർമ്മാണം പൂർത്തീകരിക്കാനാവും. വ്യാഴവും ശനിയും ഈ വർഷം  അഭീഷ്ട ഭാവങ്ങളിൽ സഞ്ചരിക്കുന്നതും കൂടി പരിഗണിച്ചാൽ അഭിവൃദ്ധിക്കാവും മുൻതൂക്കം. മിഥുനം, ചിങ്ങം, കന്നി, മകരം, കുംഭം എന്നീ മാസങ്ങൾ കൂടുതൽ ശ്രേയസ്കരങ്ങളാവും.

കാർത്തിക

വിഷുഫലം കാർത്തിക നാളുകാർക്ക് കുറച്ചൊക്കെ ഗുണദായകമാണ്. സൂര്യസംക്രമത്തെ മുൻനിർത്തി ചിന്തിക്കുമ്പോൾ 'അന്ത്യഷഡ്കം' എന്ന വിഭാഗത്തിൽ വരുന്ന നാളാണ് കാർത്തിക. ആകയാൽ നേട്ടങ്ങളിലേക്കാണ് വിഷുഫലം വിരൽ ചൂണ്ടുന്നത്. ജനനായകത്വം ഭവിക്കുന്നതാണ്. ഉദ്യോഗസ്ഥർക്ക് അധികാരമുള്ള പദവികൾ വന്നെത്തും. എതിരാളികളുടെ ഉപജാപങ്ങളെ നിഷ്പ്രഭമാക്കുവാനാവും. കഴിഞ്ഞ കാലങ്ങളിൽ അനുഭവിച്ച ധനപരമായ ശോച്യതകളിൽ നിന്നും മോചനമുണ്ടായേക്കും. കടബാധ്യതകൾ ഭാഗികമായെങ്കിലും പരിഹരിക്കാൻ കഴിയുന്നതാണ്. മുൻപ് ശ്രമിച്ച് പരാജയപ്പെട്ട കാര്യങ്ങൾ ഈ വർഷം വലിയ പ്രയത്നം കൂടാതെ തന്നെ വിജയത്തിലെത്തും. മേടക്കൂറുകാരായ കാർത്തിക നാളുകാർക്ക് ഇടവക്കൂറുകാരായ കാർത്തിക നാളുകാരെക്കാൾ  ശുഭഫലം ഭവിക്കുന്നതായിരിക്കും.

രോഹിണി

വിഷുഫലം അനുസരിച്ച് വിചിന്തനം ചെയ്യുമ്പോൾ സമ്മിശ്രഫലം ആണ് രോഹിണിക്ക് അനുഭവത്തിൽ വരിക. പൊതുവേ ഇടവക്കൂറുകാർക്ക് വ്യാഴം, ശനി എന്നീ ഗ്രഹങ്ങളുടെ ഫലം പൂർണമായും അനുകൂലവുമല്ല. കണ്ടകശനി തുടരുന്നതിനാൽ സ്വന്തമായ തൊഴിലിൽ പുരോഗതി കുറയും. മുതൽമുടക്ക് തിരിച്ചുകിട്ടുക പതുക്കെയാവും. എന്നാൽ ശമ്പളത്തിന് ജോലി ചെയ്യുന്നവർക്ക് ചില നേട്ടങ്ങൾ ഉണ്ടാവാം. വ്യാഴം മേടമാസം പകുതി മുതൽ ഇടവം രാശിയിൽ സഞ്ചരിക്കുന്നതു മൂലം സമ്മർദ്ദങ്ങൾ വർദ്ധിക്കാം. കാര്യവിളംബം ഉണ്ടായേക്കും. പ്രതീക്ഷിച്ച ജോലിയിൽ പ്രവേശിക്കാൻ കടമ്പകളുണ്ടാവും. ഏജൻസി പ്രവർത്തനം ലാഭത്തിലായേക്കും. രഹസ്യനിക്ഷേപങ്ങൾ, ഇൻഷ്വറൻസ് മുതലായവയിലൂടെ ധനാഗമമുണ്ടാവും. പ്രവാസം  സാമ്പത്തിക വളർച്ചയേകും. സമൂഹം അംഗീകരിക്കാത്തവർ പിന്തുണയുമായി മുന്നിലെത്തുന്നതാണ്.

മകയിരം

മീനം രാശിയിൽ നിന്നും മേടം രാശിയിലേക്ക് സൂര്യൻ സംക്രമിക്കുന്നത് മകയിരം നക്ഷത്രത്തിലാകയാൽ വിഷുഫലം ഇവർക്ക് അത്ര അനുകൂലമല്ല. ഗുണങ്ങൾക്ക് തെളിച്ചക്കുറവ് ഉണ്ടാവും. കഴിവുകൾ കുറഞ്ഞതാവില്ല, കൂടിപ്പോയതും പരിഗണന ലഭിക്കപ്പെടാതിരിക്കാൻ കാരണമായേക്കും. ഗൃഹസമാധാനം കുറയുന്ന സ്ഥിതി വരാം. ചിലർക്ക് വീടുവിട്ടു നിൽക്കേണ്ട സ്ഥിതിയുണ്ടാവുന്നതാണ്. വിദേശത്തു പോകാനുള്ള അനുമതി വൈകിയേക്കും. ആരോഗ്യപ്രശ്നങ്ങളുള്ളവർ കൃത്യമായ പരിശോധനകളും വൈദ്യോപദേശവും കൈക്കൊള്ളണം. വിദ്യാർത്ഥികൾക്ക് ഉപരിപഠനം സുഗമമാവുന്നതാണ്. പ്രണയികൾക്ക് ആഗ്രഹസാഫല്യം ഭവിക്കും. കുടുംബത്തിലെ സ്ത്രീകൾക്ക് ഉന്നമനം പ്രതീക്ഷിക്കാം. ഗൃഹനിർമ്മാണത്തിൽ തടസ്സങ്ങളുണ്ടാവില്ല. പൈതൃകധനം, ജീവിത പങ്കാളിയുടെ സ്വത്ത് എന്നിവയിൽ നിന്നും ആദായം പ്രതീക്ഷിക്കാം.

തിരുവാതിര

വിഷുസംക്രമമനുസരിച്ച് 'ആദിശൂലം' എന്ന വിഭാഗത്തിൽ വരികയാൽ തിരുവാതിര നാളുകാർക്ക് ഗുണദോഷസമ്മിശ്രമായ കാലമാണ്. പ്രതീക്ഷിച്ച ധനം കൈവശമെത്താൻ പല തടസ്സങ്ങൾ വന്നെത്തും. മാതാപിതാക്കളുടെ ആരോഗ്യസ്ഥിതിയിൽ ഉൽക്കണ്ഠയുണ്ടാവും. അനാവശ്യ വ്യവഹാരങ്ങൾ പണവും ഊർജ്ജവും സമയവും അപഹരിക്കും. അനുരാഗികൾക്ക് പിരിയേണ്ട സ്ഥിതി വരാം. ഉദ്യോഗസ്ഥർക്ക് ദൂരദിക്കിലേക്ക് സ്ഥലംമാറ്റത്തിന് സാധ്യത കാണുന്നു. വിദ്യാർത്ഥികൾക്ക് അന്യദേശത്ത് പഠനത്തിനുള്ള സാഹചര്യം ഉദയം ചെയ്യുന്നതാണ്. പലർ ചേർന്നു നടത്തുന്ന സംരംഭങ്ങളിൽ വളർച്ച പ്രതീക്ഷിക്കാം. കമ്മീഷൻ ഏർപ്പാടുകളിൽ ലാഭം ഉണ്ടാകുന്നതാണ്. വഴിയോരക്കച്ചവടം, ദിവസവേതനമുള്ള തൊഴിൽ ഇവയിൽ ഏർപ്പെട്ടവർക്ക് ആശ്വസിക്കാം. ചിങ്ങം, വൃശ്ചികം, മീനം, മേടം എന്നീ മാസങ്ങളിൽ അപ്രതീക്ഷിത നേട്ടങ്ങൾ വന്നെത്തും.  

പുണർതം

1199 ലെ വിഷു സംക്രമഫലം ഏറ്റവും ഗുണകരമാവുന്ന നക്ഷത്രങ്ങളിൽ പുണർതവുമുണ്ട്. നേട്ടങ്ങൾ നിരന്തരമാവും. ബിസിനസ്സിൽ വിപുലീകരണം സാധ്യമാവുന്നതാണ്. പുതിയ ശാഖകൾ തുടങ്ങാനായേക്കും. തൊഴിൽ തേടുന്നവർക്ക് നിരാശപ്പെടേണ്ടി വരില്ല. നാട്ടിലും വീട്ടിലും വിലയും നിലയുമുയരും. സംഘടനാ പ്രവർത്തനത്തിൽ നേതൃത്വം വഹിക്കും. ജീവകാരുണ്യ പ്രവർത്തനങ്ങൾ ജനങ്ങളുടെ പ്രശംസ നേടുന്നതാണ്. സകുടുംബമുള്ള തീർത്ഥാടനാദികൾക്ക് അവസരം സംജാതമാകും. ഊഹക്കച്ചവടത്തിൽ നഷ്ടം പറ്റാനിടയുണ്ട്. വസ്തുസംബന്ധിച്ച് സഹോദരരുമായി വ്യവഹാരസാധ്യത തള്ളിക്കളയാനാവില്ല. ജാമ്യം നിൽക്കുന്നവർക്ക് തിരിച്ചടിയുണ്ടാവും. ശത്രുക്കളുടെ ഉപജാപം ലക്ഷ്യം കാണുന്നതാണ്. അടുത്ത സുഹൃത്തുക്കൾ തെറ്റിദ്ധാരണമൂലം പിണങ്ങാം.

പൂയം

വിഷുഫലം ഏറ്റവും അനുകൂലമാണ്, പൂയം നാളുകാർക്ക്. പലതരം തടസ്സങ്ങളാൽ കഴിവുകൾ പുറത്തെടുക്കാൻ കഴിയാതിരുന്ന സ്ഥിതി മാറുന്നതാണ്. സ്വശക്തിയെക്കുറിച്ച് വേണ്ടത്ര തിരിച്ചറിവുണ്ടാകും. ഉദ്യോഗസ്ഥർക്ക് പദവിക്കയറ്റം, ശമ്പളക്കൂടുതൽ എന്നിവ പ്രതീക്ഷിക്കാം. സ്വയം തൊഴിൽ ചെയ്യുന്നവർക്ക് നഷ്ടം മാറി ലാഭം കണ്ടുതുടങ്ങും. പരീക്ഷകളിൽ ഉന്നത വിജയം കരസ്ഥമാക്കാനും ആഗ്രഹിച്ച വിഷയങ്ങളിൽ ഉപരിപഠനം നടത്താനും അവസരമൊരുങ്ങും. കലാസാഹിത്യപ്രവർത്തനങ്ങൾക്ക് അംഗീകാരം സിദ്ധിക്കും. അവിവാഹിതർക്ക് വിവാഹജീവിതത്തിൽ പ്രവേശിക്കാനാവും. കുഞ്ഞുങ്ങളില്ലാതെ വിഷമിക്കുന്നവർക്ക് സന്താനപ്രാപ്തിയുണ്ടാവാം. ഗൃഹനിർമ്മാണം തുടങ്ങാൻ കഴിയുന്നതാണ്. നാനാപ്രകാരേണ ഗുണാനുഭവങ്ങൾ ഉണ്ടാവും. സാമ്പത്തിക അച്ചടക്കം പാലിക്കുന്നത് ഉത്തമം.

ആയില്യം

1199 ലെ വിഷുസംക്രമഫലം നേട്ടങ്ങൾക്ക് വഴിതുറക്കും. പ്രയത്നം ഫലം കാണുന്നതാണ്. കൃഷിയിലും കച്ചവടത്തിലും ലാഭത്തിനാവും മുൻതൂക്കം. മുൻപ് നന്നായി പരിശ്രമിച്ചിട്ടും നടക്കാതെ പോയ കാര്യങ്ങൾ ഇപ്പോൾ ലഘുപ്രയത്നത്തിലൂടെ ലക്ഷ്യം കാണും. സാമൂഹ്യമായ അംഗീകാരമുണ്ടാവും. ഉന്നതരുടെ മൈത്രി ലഭിക്കും. ഉദ്യോഗസ്ഥർക്ക് വളർച്ചയുണ്ടാവും. വിദേശത്ത് പഠനം / ജോലി ഇവയ്ക്ക് അവസരം കൈവരും. കൃത്യമായ കരുനീക്കങ്ങൾ നടത്തി ശത്രുക്കളെ പ്രതിരോധത്തിലാക്കും. പിതാവിൻ്റെയും ഗൃഹത്തിലെ വൃദ്ധജനങ്ങളുടെയും ആരോഗ്യകാര്യത്തിൽ ശ്രദ്ധ വേണ്ടതുണ്ട്. പാരമ്പര്യവസ്തുക്കളുടെ ക്രയവിക്രയത്തിൽ തർക്കങ്ങൾ വരാൻ സാധ്യത കാണുന്നു. പിതൃ- പുത്രബന്ധത്തിൽ വിള്ളലേർപ്പെടാം. വാഹനം ഉപയോഗിക്കുന്നവർ ജാഗ്രത പുലർത്തണം.

മകം

'ആദിഷഡ്കം' എന്ന വിഭാഗത്തിൽ വരുന്ന നക്ഷത്രമാകയാൽ വിഷുഫലം അനുകൂലവും പ്രായോഗികമായി ഒട്ടനവധി ഗുണങ്ങൾക്ക് വഴിവെക്കുന്നതുമാണ്. കൃത്യമായ ആസൂത്രണത്തിലൂടെ മികവ് കൈവരിക്കാനാവും. സ്ഥിരജോലിയില്ലാത്തവർക്ക് സ്വകാര്യ സ്ഥാപനത്തിൽ നിയമനം കിട്ടും. കുടുംബാംഗങ്ങൾക്കിടയിലെ അനൈക്യം പരിഹരിക്കാൻ സാധിക്കുന്നതാണ്. മകളുടെ വിവാഹകാര്യത്തിൽ ശുഭതീരുമാനം  ഉണ്ടാകും. ജീവിതപങ്കാളിയുടെ സ്വത്തിൽ നിന്നും ആദായമുണ്ടായേക്കാം. സുപ്രധാനമായ ചില തീർത്ഥയാത്രകൾ നടത്തുവാനാവും.  സാമ്പത്തികമായി  ഏറ്റക്കുറച്ചിലുകൾ വരുന്നതാണ്. ജീവിതശൈലീ രോഗങ്ങൾ  പിടിമുറുക്കാനിടയുണ്ട്. അനാവശ്യമായ വിവാദങ്ങളിൽ നിന്നും ഒഴിഞ്ഞുനിൽക്കണം.  തുലാം, മകരം, ഇടവം, മിഥുനം, എന്നീ  നാല് മാസങ്ങൾക്ക് ശുഭദായകത്വമേറും.

പൂരം

വിഷുഫലമനുസരിച്ച് ഗുണകരമാണ് പൂരം നാളുകാരുടെ ഈ വർഷം. അനുബന്ധ ജോലികളിലൂടെ കൂടുതൽ വരുമാനം ഉയർത്താനാവും. ബിസിനസ്സ് ശാഖകൾ മറ്റിടത്തേക്ക് വ്യാപിപ്പിക്കാൻ ശ്രമം തുടരുന്നതാണ്. പാരമ്പര്യ തൊഴിലുകളിൽ പുതിയ ഉണർവ്വുണ്ടാക്കാൻ കഴിയുന്നതാണ്. കുടുംബ ജീവിതത്തിൽ ഗുണമുണ്ടാകുന്ന കാലമായിരിക്കും. വേർപെട്ടവർക്ക് വീണ്ടും ഒന്നാകാനായേക്കും. മക്കളുടെ വിജയവും ശ്രേയസ്സും മനസ്സിൽ ആഹ്ളാദവും സംതൃപ്തിയും നിറയ്ക്കും. ദൂരയാത്രകൾ ചെയ്യേണ്ടി വരുന്നതാണ്. ബന്ധുവിൻ്റെ വിവാഹത്തിന് മുൻകൈയ്യെടുക്കും. ആരോഗ്യകാര്യത്തിൽ അനാസ്ഥ പാടില്ല. വാക് തർക്കങ്ങൾ നിയമപ്രശ്നവും വ്യവഹാരവും ആയി വളരാനിടയുള്ളതിനാൽ പ്രേത്യേകം ശ്രദ്ധവേണം.

ഉത്രം

വിഷുഫലത്തിൽ ഗുണാനുഭവങ്ങൾക്ക് മുഖ്യത്വമുണ്ട്. വിദ്യാർത്ഥികൾക്ക് ഉന്നത വിജയം, അഭീഷ്ട വിഷയങ്ങളിൽ ഉപരിപഠനം എന്നിവ പ്രതീക്ഷിക്കാം. ചെറുകിട വ്യവസായികൾക്ക് ലോൺ ലഭിക്കും. പൊതുവേ ബിസിനസ്സിൽ വിജയം ഭവിക്കുന്നതാണ്. ഉദ്യോഗാർത്ഥികൾക്ക് സ്വകാര്യ സ്ഥാപനങ്ങളിൽ നല്ല പദവി കിട്ടാം. പൊതുപ്രവർത്തകർക്ക്  സ്വീകാര്യതയുണ്ടാവും. എതിർപക്ഷത്തിൻ്റെ ദുരാരോപണങ്ങളെ പ്രതിരോധിച്ചേക്കും. വിദേശത്തു കഴിയുന്നവർക്ക് നാട്ടിൽ മടങ്ങാനാവുന്നതാണ്. ഉന്നത വ്യക്തികളുടെ സൗഹൃദം ലഭിക്കാം. വാഹനം വാങ്ങാൻ തീരുമാനിക്കും. ആത്മീയ കാര്യങ്ങളിൽ ശ്രദ്ധ കൂടുന്നതാണ്. ക്ഷേത്ര ദർശനം പതിവാക്കും. കടബാധ്യത പരിഹരിക്കാൻ കിണഞ്ഞ് പരിശ്രമിക്കുന്നതാണ്. പൂർവ്വിക സ്വത്തിന്മേൽ തർക്കമോ  നിയമ പ്രശ്നങ്ങളോ അതിരുവഴക്കോ വരാനിടയുണ്ട്.

അത്തം

വിഷുഫല പ്രകാരം 'മധ്യശൂലം' എന്ന വിഭാഗത്തിൽ വരികയാൽ ഗുണദോഷ സമ്മിശ്രമായ ഫലങ്ങളാവും അനുഭവത്തിൽ വരിക. വ്യാഴവും ശനിയും അഭീഷ്ടരാശികളിൽ സഞ്ചരിക്കുകയാൽ ഇഷ്ടാനുഭവങ്ങൾക്കും സൗഖ്യത്തിനും മേൽക്കൈ ലഭിക്കുന്നതാണ്. ജോലിയിൽ മാറ്റം, അനുബന്ധ തൊഴിലുകളിലൂടെ ധനാഗമം ഇവയ്ക്ക് സാധ്യതയുണ്ട്. മറുനാട്ടിൽ ജോലി തേടുന്നവർക്ക് വേഗത്തിൽ അവസരങ്ങൾ വന്നുചേരുന്നതാണ്. കൃഷിയിൽ താല്പര്യമുണ്ടാവുകയാൽ ആ വഴിക്കുള്ള ശ്രമങ്ങൾ ലാഭകരമാവും. കടബാധ്യത ഒരു ഘട്ടത്തിൽ കൂടാം. എന്നാൽ വർഷാന്ത്യത്തോടെ കുറയാനുള്ള സാധ്യതയുമുണ്ട്. പിതാവിന് അനുകൂലമായ കാലം കൂടിയാണ്. ഔദ്യോഗിക ജോലിയിൽ നിന്നും പിരിഞ്ഞാലും ശമ്പളം ലഭിക്കുന്ന തൊഴിലുകളിൽ ഏർപ്പെടേണ്ടി വരുന്നതായിരിക്കും.

ചിത്തിര

വിഷുഫലമനുസരിച്ച് ഗുണവും ദോഷവും സമമാണ് ചിത്തിര നാളിന്. അദ്ധ്വാനത്തിന് അവസരം വരും. അദ്ധ്വാന ഫലം പാഴാവുകയുമില്ല. കൃത്യനിഷ്ഠയും ധനപരമായ അച്ചടക്കവും നേട്ടങ്ങൾക്ക് വഴിതുറക്കാം. തിടുക്കപ്പെടാതെ കാത്തിരിക്കുന്നവർക്ക് കൂടുതൽ നേട്ടങ്ങൾ വന്നെത്തുന്നതാണ്. വിദേശത്തുള്ള മകനിൽ നിന്നുള്ള സഹായത്താൽ വീടുപണി പൂർത്തിയാക്കും. രോഗക്ലേശമനുഭവിക്കുന്നവർക്ക് ചികിൽസാ മാറ്റം ഗുണമാകും. കൂട്ടുകച്ചവടത്തിന് മുതിരാതിരിക്കുന്നത് ഉത്തമം. ഏജൻസി, കമ്മീഷൻ പ്രവർത്തനങ്ങളിൽ ഗുണമുണ്ടാവും. ഉദ്യോഗസ്ഥർക്ക് അർഹമായ പ്രൊമോഷൻ കിട്ടാൻ വൈകുന്നതാണ്. സംഘടനകളിൽ പിന്തുണക്കുന്നവർ കുറയുന്നതായി മനസ്സിലാക്കും. വൃശ്ചികം, ധനു, കുംഭം, മിഥുനം, കർക്കടകം മാസങ്ങൾക്ക് ശുഭത്വം കൂടുന്നതാണ്.

ചോതി

വിഷുഫലം വിരൽ ചൂണ്ടുന്നത് ഗുണസമ്മിശ്രമായ അനുഭവങ്ങളിലേക്കാണ്. ന്യായമായ ആവശ്യങ്ങൾ നിറവേറ്റപ്പെടും. ഭൂമി വിൽപ്പനയിൽ തടസ്സങ്ങൾ വരുമെങ്കിലും വർഷത്തിൻ്റെ പകുതി മുതൽ കാര്യസാധ്യം ഉണ്ടാകുന്നതാണ്. ഉദ്യോഗസ്ഥർക്ക് സ്ഥലം മാറ്റമുണ്ടാവും.  സഹപ്രവർത്തകരുടെ തീരുമാനങ്ങൾ അംഗീകരിക്കില്ല. ജന്മസ്ഥലത്ത് മടങ്ങാൻ ആഗ്രഹിക്കും. വരവറിയാതെ ചെലവു ചെയ്യുന്ന ശീലമേറുന്നതാണ്. സ്വന്തം അഭിപ്രായം മക്കൾ ചെവിക്കൊള്ളുന്നില്ലെന്നത് വിഷമിപ്പിക്കാം. ഭാര്യയുടെ വസ്തുവിൽക്കുന്നത് തർക്കങ്ങളുണ്ടാക്കും. തീവ്രരാഷ്ട്രീയ നിലപാടുകളോട് മുഖം തിരിക്കും. എന്നാൽ പൊതുപ്രവർത്തനത്തിന് നിർബന്ധിതരാവും. കലാപ്രവർത്തനം പൂർണതോതിൽ തന്നെ പുനരാരംഭിച്ചേക്കും. ആരോഗ്യപരിശോധനകളിൽ ആലസ്യമരുത്.

വിശാഖം

ഗുണാനുഭവങ്ങളാണ് വിശാഖം നാളിന് ഏറെയുമെന്ന് വിഷുഫലം വ്യക്തമാക്കുന്നു. ബഹുശാഖകളിൽ മിടുക്ക് തെളിയിക്കാനാവും. സമൂഹത്തിൻ്റെ ആദരം നേടും. ഉദ്യോഗസ്ഥർക്ക് ഒപ്പമുള്ളവരുടെ നിർലോഭമായ പിന്തുണയുണ്ടാവും. ഭക്ഷ്യോല്പാദന വിതരണ രംഗം വിപുലീകരിക്കും. ചെറുകിട സംരംഭങ്ങളിൽ ആയാലും തനതുമുദ്ര പുലർത്തുന്നതാണ്. പണയ വസ്തുക്കൾ തിരിച്ചെടുക്കും. ഇൻഷ്വറൻസ് മേഖലയിൽ ബിസിനസ്സ് വർദ്ധിക്കും. പ്രൊഫഷണൽ വിദ്യാഭാസത്തിൽ ഉയർന്ന വിജയം കരസ്ഥമാക്കാനാവും. പ്രണയവിവാഹത്തിന് കുടുംബത്തിൻ്റെ അംഗീകാരം കിട്ടും. തറവാട് വീട് ജീർണോദ്ധരിക്കാനാവും. ബന്ധുക്കൾ തമ്മിലുള്ള പ്രശ്നങ്ങൾ മാദ്ധ്യസ്ഥതയിലൂടെ പരിഹരിക്കുന്നതാണ്.  മകളുടെ ഒപ്പം അന്യനാട്ടിൽ താമസം തുടരും. സാമ്പത്തികമായ അച്ചടക്കം ഉറപ്പാക്കും.

അനിഴം

അഭ്യുദയത്തിലേക്കും ആത്മഹർഷത്തിലേക്കും വഴിതുറക്കുപ്പെടുന്ന വർഷമായിരിക്കും. വിശ്വസിച്ചേല്പിക്കപ്പെട്ട ദൗത്യങ്ങൾ വിജയപര്യവസാനിയാകുന്നതാണ്. സ്വതന്ത്ര നിലപാടുകൾക്ക് വീട്ടിലും പുറത്തും പിന്തുണ ലഭിച്ചേക്കും. വ്യാഴത്തിൻ്റെ ആനുകൂല്യം കൂടി ലഭിക്കുകയാൽ നേട്ടങ്ങൾ സ്ഥായിയാവും. കുറഞ്ഞ മുതൽമുടക്കു കൊണ്ട് കൂടുതൽ വിറ്റഴിക്കപ്പെടുന്ന ചില ഉല്പന്നങ്ങളുടെ വിപണനം ഏറ്റെടുക്കും. അവിവാഹിതർക്ക് ദാമ്പത്യത്തിൽ പ്രവേശിക്കാൻ സാധിക്കും. പെൻഷനുശേഷവും കരാർ ജോലികളിൽ സജീവമായേക്കും. കുടുംബാംഗങ്ങളുടെ ധനപരമായ ആവശ്യങ്ങൾ നിറവേറ്റും.  ഗവേഷണം പൂർത്തിയാക്കാനും ഗവേഷണ പ്രബന്ധം വായനക്കാരുടെ മുന്നിലെത്തിക്കാനും സാധിക്കുന്നതാണ്. വിദേശ രാജ്യങ്ങളിൽ തുടരാനുള്ള തൊഴിൽ വിസ പുതുക്കപ്പെടാം.. 

തൃക്കേട്ട

വിദ്യാഭ്യാസത്തിൽ ആശിച്ച വിധത്തിൽ പുരോഗതിയുണ്ടാവും. പഠിച്ചിറങ്ങിയതും നല്ല ജോലിയിൽ പ്രവേശിച്ചേക്കും. കുടുംബാംഗങ്ങളുടെ തെറ്റുകുറ്റങ്ങൾ ചൂണ്ടിക്കാണിക്കുക നിമിത്തം വീട്ടിൽ തന്നെ ശത്രുക്കളുണ്ടാവും. ന്യായമായ ആഗ്രഹങ്ങൾ അനായാസം സഫലമാവുന്നതാണ്. രാഷ്ട്രീയ മത്സരങ്ങളിൽ നേരിയ മുൻതൂക്കം നേടും. സ്ഥാനോന്നതി സ്വാഭാവികമായി കരഗതമാവും. കലാകായിക വിഭാഗങ്ങളോട് എന്നും താല്പര്യം പുലർത്തും. കൂട്ടുകച്ചവടത്തിൽ നേട്ടങ്ങളാർജ്ജിക്കും. വില കൂടിയ ഗൃഹോപകരണങ്ങൾ വാങ്ങും. സുഹൃത്തുക്കളുടെ പ്രശ്നങ്ങളിൽ സജീവമായിടപെടും. പ്രണയികൾക്ക് ദാമ്പത്യപ്രവേശം സാധ്യമാകുന്നതാണ്. നീണ്ടുപോയ വ്യവഹാരങ്ങൾക്ക് വിരാമമുണ്ടാവും. സാമ്പത്തിക പുഷ്ടി പ്രതീക്ഷിക്കാൻ സാധിക്കുന്ന വർഷമായിരിക്കും.

മൂലം

ആഗ്രഹസഫലീകരണം സാധ്യമാകുന്ന വർഷമാണ്. തടസ്സങ്ങളെ പ്രത്യുല്പന്നമതിത്വം  കൊണ്ട് മറികടക്കും. വിദ്യാഭ്യാസത്തിൽ പിന്നിലായവർക്ക് പഠനത്തിൽ ശ്രദ്ധിക്കാനും മികച്ച വിജയം നേടാനും അവസരം ഉണ്ടാകും. ശാസ്ത്രീയ ഗവേഷണങ്ങൾക്ക് പൂർത്തീകരണം ഭവിക്കും. ജീവിത പങ്കാളിക്ക് തൊഴിൽ ലഭിക്കാനോ, തൊഴിലുള്ളവർക്ക് അതിൽ ഉന്നമനം സിദ്ധിക്കാനോ സാധ്യത കാണുന്നു. ഭൗതികതയെക്കുറിച്ച് വാതോരാതെ പറഞ്ഞെന്നുവന്നാലും  ആദ്ധ്യാത്മികചര്യയിൽ താല്പര്യമേറുന്നതാണ്. സഹോദരരുമായുള്ള തർക്കം കുടുംബ സുഹൃത്തുക്കളുടെ മധ്യസ്ഥതയാൽ പരിഹരിക്കപ്പെടും. സംരംഭങ്ങളിൽ നിന്നും ധനോന്നതി പ്രതീക്ഷിക്കാം. രോഗാവസ്ഥയാൽ വലയുന്നവർക്ക് ആശാസ്വമുണ്ടാകും. ഓൺലൈൻ ബിസിനസ്സിൽ നേട്ടം വന്നേക്കും.

പൂരാടം

വിഷുസംക്രമഫലം ജീവിതത്തിൻ്റെ എല്ലാ മേഖലകളിലും വളർച്ചയ്ക്ക് വഴിയൊരുക്കും. സാധാരണ ചെയ്യുന്ന ജോലികൾക്ക് മുടക്കം വരുന്നതല്ല. കർത്തവ്യങ്ങൾ ഭംഗിയാക്കുവാനാവും. കൃഷികാര്യങ്ങളിൽ ശ്രദ്ധയുണ്ടാവും. പാരമ്പര്യമായി  ചെയ്തുവരുന്ന തൊഴിലുകളിൽ അഭ്യുദയം ഉണ്ടാകുന്നതാണ്.  കുടുംബ സമേതം തീർത്ഥാടനത്തിന് അവസരമുണ്ടാകും. മക്കളുടെ പഠനപൂർത്തീകരണം, ഉദ്യോഗം, വിവാഹം ഇത്യാദികൾക്ക് സാധ്യതയുള്ള വർഷമാണ്.  ബന്ധുക്കളെ ഏകോപിച്ച് കുടുംബയോഗത്തിന് രൂപം കൊടുക്കും.  സാങ്കേതിക കാര്യങ്ങൾ, പുതിയ ഭാഷ ഇവ പഠിക്കുന്നതിന് സമയം കണ്ടെത്തുന്നതാണ്.  ഉപജാപങ്ങളെ തൃണവൽഗണിക്കും. വിദേശത്തു കഴിയുന്നവർക്ക് പുതിയ ജോലിയിൽ പ്രവേശിക്കാനാവും.

ഉത്രാടം

വിഷുഫലം അധികവും ഗുണകരമാണ്. ആദർശജീവിതത്തെ പ്രായോഗിക തലത്തിലേക്ക് കൊണ്ടുവരാൻ കഴിയുന്നതിനാൽ ജീവിതം സുഗമമാവും. ധനസമ്പാദനത്തിൽ ലക്ഷ്യബോധം വരും. ഒന്നിലധികം തൊഴിൽ ചെയ്യാൻ താത്പര്യം കാട്ടും. മുൻ കടം വീട്ടാൻ ആത്മാർത്ഥമായ ശ്രമം നടത്തുന്നതാണ്.  സാമ്പ്രദായികമായ ബിരുദപഠനത്തിന് പകരം കാലഘട്ടത്തിൻ്റെ ആവശ്യത്തിനനുസരിച്ചുള്ള കോഴ്സുകളിൽ ചേരും. കുടുംബ ബന്ധങ്ങൾ, സുഹൃൽ ബന്ധം ഇവ മെച്ചപ്പെടുത്താനും ദൃഢമാക്കാനും ശ്രമം നടത്തും. അവിവാഹിതർക്ക് ദാമ്പത്യത്തിൽ പ്രവേശിക്കാൻ സാഹചര്യം ഒരുങ്ങും. പൊതുപ്രവർത്തകർക്ക് പുതിയ പദവി ലഭിച്ചേക്കാം. മകളുടെ ജോലിസ്ഥലത്ത് പോയി താമസിക്കാൻ സാധ്യതയുണ്ട്. മിഥുനം, കർക്കടകം, തുലാം, ധനു, മകരം എന്നീ മാസങ്ങൾക്ക് മേന്മ കുറയാം. ആരോഗ്യം, സാമ്പത്തികം, യാത്ര എന്നിവയിൽ ശ്രദ്ധ വേണം.

തിരുവോണം

വിഷുഫലം വ്യക്തമാക്കുന്നത് തിരുവേണം നക്ഷത്രക്കാർക്ക് സമ്മിശ്രഫലം ഉണ്ടാവുമെന്നാണ്. പ്രയത്നം വർദ്ധിപ്പിക്കേണ്ടിവരും. മുൻപ് സുലഭമായി നേടിയവ ഇപ്പോൾ ദുർലഭമായേക്കും. വിജയത്തിന് തിളക്കം അല്പം കുറഞ്ഞതായി തോന്നാം. ഉദ്യോഗസ്ഥർക്ക് അതൃപ്തി അനുഭവപ്പെടും. അനർഹർക്ക് സ്ഥാനക്കയറ്റം കിട്ടുന്നത് വിഷമിപ്പിക്കും. ഏജൻസി വ്യാപാരം പുഷ്ടിപ്പെടും. ചെറുകിട സംരംഭങ്ങളിൽ നേട്ടമുണ്ടാകുന്നതാണ്. യാത്ര തൊഴിലിൻ്റെ ഭാഗമായവർക്കും ഗുണമുണ്ടാകാം. ദിവസ വേതനക്കാർക്ക് തൊഴിൽ അനുസ്യൂതമാവും.  വ്യാഴം അനുകൂലഭാവത്തിൽ സഞ്ചരിക്കുകയാൽ ദോഷം കുറയുകയും ഗുണം വർദ്ധിക്കുകയും ചെയ്തേക്കും. മിഥുനം,ചിങ്ങം, കന്നി, ധനു, മകരം എന്നീ മാസങ്ങളിൽ എല്ലാക്കാര്യങ്ങളിലും ജാഗ്രത വേണം.

അവിട്ടം

വിഷുഫലത്തിൽ 'അന്ത്യശൂലം' എന്ന വിഭാഗത്തിൽ വരുന്ന നക്ഷത്രമാണ് അവിട്ടം. അനുകൂല അനുഭവങ്ങൾക്കൊപ്പം പ്രതികൂല അനുഭവങ്ങളും വരാം. പ്രമാണം, കരാർ മുതലായവ നന്നായി വായിച്ചിട്ടാവണം അംഗീകരിക്കാൻ. സുഹൃത്തുക്കളുടെ സഹായ വാഗ്ദാനം പാഴായേക്കാം. അവിവാഹിതരുടെ വിവാഹത്തിന് താമസം ഭവിക്കും. ഉദ്യോഗസ്ഥർക്ക് മേലധികാരികളുടെ അപ്രീതിക്ക് സാധ്യതയുണ്ട്. ഭാര്യാഭർത്താക്കന്മാർ ചേർന്ന് നടത്തുന്ന സംരംഭങ്ങൾ വിജയിക്കും. ഓൺലൈൻ വ്യാപാരത്തിലും നേട്ടമുണ്ടാകുന്നതാണ്. ഊഹക്കച്ചവടം, ചിട്ടി,ഇൻഷ്വറൻസ് ഇവയിലൂടെ ആദായം ലഭിച്ചേക്കും. ഭൂമി വ്യാപാരത്തിൽ പറ്റിക്കപ്പെടാനിടയുണ്ട്. മുതിർന്നവരുടെ മാനസികാരോഗ്യം ക്ഷീണിക്കാം. പൊതു പ്രവർത്തനം സമ്മിശ്രമായ ഫലമേകുന്നതാണ്.

ചതയം

അറിവ് നേടി ശക്തിപ്പെടാനും സ്വയം തിരുത്തി മുന്നേറാനും ഉതകുന്ന വർഷമാണ് മുന്നിലുള്ളത്. ആത്മാർത്ഥതയെ ചിലർ സംശയിച്ചേക്കും. എന്നാലും പിൻവാങ്ങാൻ പാടില്ല. വമ്പൻ മുതൽമുടക്കുകൾ ഉള്ള ബിസിനസ്സുകൾ നഷ്ടത്തിലെത്താം. നിലവിലെ തൊഴിൽ മാറാൻ ശ്രമിക്കുന്നത് ഗുണം ചെയ്തേക്കില്ല. കമ്മീഷൻ, ഏജൻസി, കരാർ പണികളിൽ നിന്നും ലാഭമുണ്ടാകും. നവമാധ്യമങ്ങളിൽ നടത്തുന്ന പരിപാടികൾ ചെറിയ ആദായത്തിന് കാരണമായേക്കാം. പ്രവാസികൾക്ക് പുതിയ വിസ ലഭിക്കുവാൻ കാലതാമസം വരില്ല. ജീവിത പങ്കാളിക്ക് ഉദ്യോഗത്തിൽ ഉയരാൻ പ്രതിസന്ധികളേറും. മകളുടെ വിവാഹത്തിന് വസ്തുവിൽക്കാൻ ശ്രമം നടത്തുന്നതാണ്. സംഘടനകളുടെ പ്രവർത്തനത്തിൽ നിന്നും പിൻവാങ്ങും. മേടം, കർക്കടകം, വൃശ്ചികം, ധനു എന്നീ മാസങ്ങൾ ഏറ്റവും അനുകൂലമാവും.

പൂരൂരുട്ടാതി

ന്യായമായ ആഗ്രഹങ്ങൾ നിറവേററാനാവും. അറിവ് സമ്പാദിക്കുന്നതിൽ ശുഷ്കാന്തി കാട്ടും. വിദ്യാഭ്യാസത്തിൽ മികവ് തെളിയിക്കുന്നതാണ്. സക്രിയമായ പ്രവർത്തനത്തിലൂടെ തൊഴിലിടത്തിൽ ആധിപത്യം നേടിയെടുക്കും. സുഹൃത്തുക്കളുടെ സമയോചിത സഹായം പ്രതീക്ഷിക്കാം. സഹോദരരുമായി ഒത്തുചേർന്ന് കരാർ പണികളോ ബിസിനസ്സോ ആരംഭിക്കാനിടയുണ്ട്. പണയത്തിൽ വെച്ച ഭാര്യയുടെ ഉരുപ്പടികൾ മടക്കിയെടുക്കാനാവും. വസ്തുവില്പനയിൽ കാലവിളംബം വരാം. ഡോക്ടറുടെ ഉപദേശമനുസരിച്ച് ഭക്ഷണശീലത്തിൽ ക്രമീകരണം കൊണ്ടുവരുന്നതാണ്. വർഷത്തിൻ്റെ ആദ്യ പകുതി കൂടുതൽ മെച്ചപ്പെട്ടതായിരിക്കും.

ഉത്രട്ടാതി

പൊതുവേ അനുകൂലമായ ഫലങ്ങളാണ് മേടസംക്രമം മൂലം ഉത്രട്ടാതി നാളുകാർക്ക് ഉണ്ടാവുന്നത്. ശുഭപ്രതീക്ഷകൾ സഫലമാകുന്നതാണ്. സമൂഹത്തിനു കൂടി പ്രയോജനമുള്ള കാര്യങ്ങളിൽ മുഴുകും. മൂല്യാധിഷ്ഠിത ജീവിതം നയിക്കേണ്ടതിനെപ്പറ്റി പുതുതലമുറയെ ഉപദേശിച്ചേക്കും. ഗൃഹനിർമ്മാണത്തിലെ തടസ്സങ്ങൾ നീങ്ങുന്നതാണ്. മകൻ്റ ഉപരിവിദ്യാഭ്യാസത്തിന് ലോൺ നേടാനാവും. വളർത്തുമൃഗങ്ങളെ പരിപാലിക്കുന്നതിൽ ഔത്സുക്യം ഉണ്ടാവും. സാമ്പത്തികമായി  അച്ചടക്കം പുലർത്തും. പൂർവ്വസുഹൃത്തുക്കളെ കണ്ടെത്തുന്നതാണ്. ബിസിനസ്സ് രംഗം വളരുന്നതിന് കഠിനമായ അദ്ധ്വാനം ആവശ്യമായി വരും. മാതാപിതാക്കളെ സംരക്ഷിക്കാൻ നാട്ടിൽ തങ്ങേണ്ട സ്ഥിതിയുണ്ടാവും. തീരുമാനങ്ങൾ ഏകപക്ഷീയമാവുന്നത് കുടുംബത്തിൽ പ്രശ്നങ്ങൾക്ക് കാരണമായേക്കാം.

രേവതി

മുൻപുണ്ടായ തിരിച്ചടികളേയും കഷ്ടങ്ങളേയും അതിജീവിക്കുവാനാവുമെന്ന് വിഷുഫലം വ്യക്തമാക്കുന്നു. ജീവിതം കൂടുതൽ സുഗമമാവുന്നതാണ്. സാമൂഹ്യമായ അംഗീകാരം ഉണ്ടാവും. കിട്ടാക്കടങ്ങൾ കൈവന്നേക്കും. സഹജമായ കഴിവുകൾ പുറത്തെടുക്കാനാവും. ബിസിനസ്സിൽ ഉപഭോക്താക്കളെ ആകർഷിക്കുന്ന പുതിയ തന്ത്രങ്ങൾ ആവിഷ്കരിക്കും. കലാകാരന്മാർക്ക് നല്ല അവസരങ്ങൾ കൈവരുന്നതാണ്. പുരസ്കാരങ്ങൾ കിട്ടിയേക്കും. പാരമ്പര്യ തൊഴിലുകളിൽ വിജയം നേടുവാനാവും. ഭൂമി നല്ല വിലയ്ക്ക് വിറ്റഴിക്കാൻ സാധിക്കുന്നതാണ്. ഇടവം, ചിങ്ങം, ധനു, മകരം എന്നീ മാസങ്ങൾക്ക് ഗുണമേറുന്നതാണ്. ദാമ്പത്യത്തിൽ കൂടുതൽ പൊരുത്തവും സ്നേഹവും വന്നെത്തും. അയൽ തർക്കങ്ങളെ സമാധാനപൂർവ്വം പരിഹരിച്ചേക്കും.

പൂയം

ഉദ്യോഗസ്ഥർക്ക് ഉന്നമനം ഉണ്ടാവുന്ന കാലമാണ്.  മുൻപ് ശ്രമിച്ചു പരാജയപ്പെട്ട കാര്യങ്ങളിൽ വിജയിക്കാനായേക്കും. വിവാദങ്ങളിലും തർക്കങ്ങളിലും സ്വാഭിപ്രായം ശക്തമായി അവതരിപ്പിക്കും. കുടുംബകാര്യങ്ങളിൽ ശ്രദ്ധ കുറയാം. ഊഹക്കച്ചവടത്തിൽ നേട്ടങ്ങളുണ്ടാക്കും. വിദ്യാർത്ഥികൾ പ്രൊഫഷണൽ കോഴ്സുകളിലേക്ക് ഒരുക്കം തുടങ്ങുന്നതാണ്. കമ്മീഷൻ വ്യാപാരത്തിൽ വേണ്ടത്ര ലാഭം കിട്ടിയേക്കില്ല.

ആയില്യം

ഭൗതിക നേട്ടങ്ങൾ സന്തോഷിപ്പിക്കും. വേർപിരിഞ്ഞവർക്ക് ഇണങ്ങിച്ചേരാൻ സാഹചര്യം അനുകൂലമാവും. വാരാദ്യത്തിൽ ചില സമ്മർദ്ദങ്ങളെ നേരിടേണ്ടി വന്നേക്കാം. ചെലവ് കൂടുന്നതിൽ അസ്വസ്ഥതയുണ്ടാവും. മകൻ്റെ ജോലിക്കാര്യത്തിൽ ശുഭസൂചനകൾ ലഭിക്കുന്നതാണ്. വസ്തു വ്യാപാരത്തിൽ തടസ്സം തുടരപ്പെടും. അനുരാഗികൾക്ക് ഹൃദയബന്ധം ഊഷ്മളമാവുന്നതാണ്. സാമൂഹ്യ പ്രവർത്തനത്തിലെ എതിർപ്പുകൾ നിസ്സാരീകരിക്കും. വിദേശ പഠന സാധ്യത ആരായുന്നതാണ്. 

Read More

• ഈ ആഴ്ച നിങ്ങളെ കാത്തിരിക്കുന്നതെന്ത്? സംഖ്യാശാസ്ത്ര ഫലങ്ങളിങ്ങനെ: Numerology Predictions 2024 April 08 to April 14
• സമ്പൂര്‍ണ വാരഫലം, അശ്വതി മുതൽ രേവതി വരെ; April 07-April 13, 2024, Weekly Horoscope
• Weekly Horoscope (April 7– April 13, 2024): ഈ ആഴ്‌ച നിങ്ങൾക്കെങ്ങനെ?
• 2024 ഏപ്രിൽ മാസത്തിലെ സമ്പൂർണ്ണ നക്ഷത്രഫലം, അശ്വതി മുതൽ രേവതി വരെ: April 2024 Horoscope