/indian-express-malayalam/media/agency_attachments/RBr0iT1BHBDCMIEHAeA5.png)
Follow Us/indian-express-malayalam/media/media_files/2025/01/11/chovva-horoscope-2025-astrological-predictions.jpg)
ചൊവ്വ മിഥുനം രാശിയിൽ
2025 ജനുവരി 21 ന്, 1200 മകരം 8 ന് പ്രഭാതത്തിൽ ചൊവ്വ (Mars) കർക്കടകത്തിൽ നിന്നും വക്രഗതിയായി (Retrograde) മിഥുനത്തിലേക്ക് സഞ്ചരിക്കുന്നു. ഏപ്രിൽ 3 / മീനം 20 വരെ (ഏതാണ്ട് 70 ൽ അധികം ദിവസങ്ങൾ) ചൊവ്വ മിഥുനം രാശിയിൽ തുടരും. ഇക്കാലയളവിൽ ചൊവ്വ പുണർതം നക്ഷത്രത്തിലാണ് സഞ്ചരിക്കുക. അതിൽ ഫെബ്രുവരി 26 / കുംഭം 14 വരെ ചൊവ്വ വക്രഗതിയിലാണ് എന്നത് പ്രസ്താവ്യമാണ്. തുടർന്ന് നേർഗതി (Direct motion) യിലാവുന്നു.
കുജൻ്റെ ചുരുക്കെഴുത്തായ 'കു' എന്ന അക്ഷരത്താൽ ഗ്രഹനിലയിൽ അടയാളപ്പെടുത്തുന്ന ചൊവ്വയെ പുരുഷഗ്രഹം, പാപഗ്രഹം എന്നിങ്ങനെ ജ്യോതിഷം വർണ്ണിക്കുന്നു. ക്രൂരഗ്രഹം എന്ന വിശേഷണവുമുണ്ട്. നവഗ്രഹങ്ങളുടെ അധികാരശ്രേണിയിൽ സേനാനായക പദവിയാണ് ചൊവ്വയ്ക്ക് നൽകപ്പെട്ടിട്ടുള്ളത്. ഗ്രഹങ്ങൾക്കിടയിൽ ശത്രുമിത്രത്വമുണ്ട്. ചൊവ്വയ്ക്ക് ഒരു ശത്രുഗ്രഹമേയുള്ളൂ-- അത് ബുധനാണ്. ബുധൻ്റെ സ്വക്ഷേത്രമാണ് മിഥുനം രാശി. ശത്രുവിൻ്റെ രാശിയിലൂടെയാണ് അടുത്ത 70 ദിവസങ്ങൾ ചൊവ്വ കടന്നുപോകുന്നതെന്ന് ചുരുക്കം. ചൊവ്വ നൽകുന്ന ഫലങ്ങളെ അതും സ്വാധീനിക്കാം.
പാപഗ്രഹങ്ങൾ വക്രഗതിയിലാവുമ്പോൾ ശക്തി വർദ്ധിക്കും എന്നാണ് നിയമം. 'ശക്തൻ' എന്ന് വക്രസഞ്ചാരി ഗ്രഹത്തെ വിളിക്കുന്നു. ഫെബ്രുവരി 26 വരെ ചൊവ്വ വക്രഗതിയിൽ ( Retrograde motion) സഞ്ചരിക്കുകയാൽ ചൊവ്വ നൽകുന്ന അനുഭവങ്ങൾ ശക്തങ്ങളായിരിക്കും. നേർഗതിയിൽ സഞ്ചരിക്കുന്ന ഒടുവിലത്തെ പത്തുമുപ്പത്തഞ്ചു ദിവസങ്ങൾ ശത്രുക്ഷേത്രത്തിൽ ആകയാൽ ചൊവ്വയുടെ ദുർബലത വർദ്ധിപ്പിക്കാം.
ഭൂമി,വസ്തു, ദേഹബലം, ധൈര്യം, സാഹസികത, സാഹോദര്യം, അഗ്നി, ആയുധങ്ങൾ, ക്രമസമാധാന പാലനം, മിലിട്ടറി ഫോഴ്സ്, യുദ്ധം, നേതൃഗുണം ഇവയുടെ കാരകൻ ചൊവ്വയാണ്. ഗോചരാലും വ്യക്തികളുടെ ജാതകത്തിലും ചൊവ്വയെക്കൊണ്ട് ഇക്കാര്യങ്ങൾ പരിഗണിക്കുന്നു. ജന്മരാശിയിലും അഥവാ കൂറിലും ജനിച്ച കൂറിൻ്റെ 8,12 എന്നീ രാശികളിലും സഞ്ചരിക്കുമ്പോൾ ചൊവ്വയുടെ ക്രൗര്യം വർദ്ധിക്കും. ദോഷഫലങ്ങൾക്ക് മുൻതൂക്കമുണ്ടാവും.
ജനിച്ച കൂറിൻ്റെ 3, 6, 11 എന്നീ രാശികളിൽ സഞ്ചരിക്കുമ്പോൾ ഗുണാധിക്യം പ്രതീക്ഷിക്കാം. മറ്റുള്ള ആറ് ഭാവങ്ങളിൽ ശുഭാശുഭഫലങ്ങൾ സമ്മിശ്രമായി ചൊവ്വ നൽകുന്നു. മേടക്കൂറ് മുതൽ മീനക്കൂറു വരെയുള്ള പന്ത്രണ്ടു രാശികളിൽ ജനിച്ചവർക്ക് ചൊവ്വയുടെ 'മിഥുന രാശി സഞ്ചാരം' എപ്രകാരമുള്ള ഫലങ്ങൾ നൽകും എന്ന അന്വേഷണമാണ് ഇവിടെ നടക്കുന്നത്.
മേടക്കൂറിന് (അശ്വതി, ഭരണി, കാർത്തിക ഒന്നാം പാദം)
ഏതു പാപഗ്രഹവും മൂന്ന്, ആറ്, പതിനൊന്ന് എന്നീ ഭാവങ്ങളിൽ ശക്തരാണെന്നും ഗുണാനുഭവങ്ങൾ നൽകുമെന്നും ജ്യോതിഷ നിയമങ്ങൾ ഉറപ്പിക്കുന്നു. പാപഗ്രഹമായ ചൊവ്വ മേടക്കൂറുകാരുടെ മൂന്നാമെടമായ മിഥുനം രാശിയിൽ സഞ്ചരിക്കുന്നത് ശോഭന ഫലങ്ങൾക്ക് കാരണമാകും. മേടക്കൂറിൻ്റെ അധിപൻ കൂടിയാകയാൽ ചൊവ്വയുടെ അനുകൂലത ഇരട്ടി നേട്ടങ്ങൾ സൃഷ്ടിക്കുന്നതാണ്. കർമ്മമേഖലയിൽ ഉയർച്ചയുണ്ടാവും. ജീവിതത്തിന് ദിശാബോധം കൈവരും. നേതൃപദവി ശ്രമിക്കാതെ തന്നെ ലബ്ധമാകുന്നതാണ്. അടുക്കും ചിട്ടയും പ്രവൃത്തികളിൽ പ്രതിഫലിക്കും. ശത്രുപക്ഷത്തിനു നേരെ ഉരുക്കുകവചം തീർക്കുന്നതാണ്. സാമ്പത്തിക ഉന്നമനം ഉണ്ടാവും. വസ്തുവാങ്ങുന്നതിന് ശ്രമിക്കുന്നവർക്ക് കാര്യസാധ്യം ഭവിക്കും. സഹോദരാൽ തനിക്കും, തന്നാൽ സഹോദരർക്കും നേട്ടങ്ങൾ ഉണ്ടാവും. അമിതമായ ആത്മവിശ്വാസം ദോഷകരമായേക്കും.
ഇടവക്കൂറിന് (കാർത്തിക 2,3,4 പാദങ്ങൾ, രോഹിണി, മകയിരം 1,2 പാദങ്ങൾ)
കുജൻ അഥവാ ചൊവ്വ ഇടവക്കൂറിൻ്റെ രണ്ടാം ഭാവത്തിൽ സഞ്ചരിക്കുകയാണ്.വാക്ക്, വിദ്യ, കുടുംബം, ധനം തുടങ്ങിയവ രണ്ടാമെടം കൊണ്ട് കണക്കാക്കപ്പെടുന്നു. വാക്കുകൾ പരുഷങ്ങളാവാൻ സാധ്യതയുണ്ട്. തന്മൂലം ശത്രുക്കൾ പെരുകാം. വാഗ്ദാനലംഘനങ്ങൾ നഷ്ടങ്ങളും മനക്ലേശവും വരുത്തിയേക്കും. കുടുംബത്തിൽ സുഖവും സമാധാനവും കുറഞ്ഞും കൂടിയുമിരിക്കും. ആഭരണങ്ങൾ കളവ് പോകാനോ കളഞ്ഞ് പോകാനോ സാധ്യതയുണ്ട്. കുട്ടികളുടെ പഠനത്തിൽ മാതാപിതാക്കൾ പ്രത്യേകം ശ്രദ്ധ പുലർത്തേണ്ട സന്ദർഭമാണ്. കടം വാങ്ങി ചെലവ് ചെയ്യുന്ന സാഹചര്യം ഒഴിവാക്കപ്പെടണം. കാര്യസാധ്യത്തിനായി അലച്ചിലുണ്ടാവാൻ സാധ്യത കാണുന്നു. തൊഴിൽ രംഗത്തെ പുരോഗതി സാമാന്യമാവും. അനാവശ്യമായ തിടുക്കം ഒഴിവാക്കുക കരണീയം. ദൈവിക കാര്യങ്ങൾക്ക് മുടക്കം വരാതിരിക്കാൻ ശ്രദ്ധിക്കേണ്ടതുണ്ട്.
മിഥുനക്കൂറിന് (മകയിരം 3,4 പാദങ്ങൾ, തിരുവാതിര, പുണർതം 1,2,3 പാദങ്ങൾ)
ജന്മരാശിയിലാണ് ചൊവ്വയുടെ സഞ്ചാരം. ഫെബ്രുവരി അവസാനം വരെ വക്രഗതിയിലും തുടർന്ന് ഏപ്രിൽ മൂന്നുവരെ നേർഗതിയിലും ചൊവ്വ തുടരുന്നു. ജനിച്ച കൂറിൽ ചൊവ്വ സഞ്ചരിക്കുന്നത് അനുകൂല ഫലങ്ങൾ സൃഷ്ടിച്ചേക്കില്ല. തീരുമാനിച്ച കാര്യങ്ങൾ നീട്ടിവെക്കേണ്ടിവരും. ലഘുത്വം കൊണ്ട് നേടേണ്ടവ ക്ലേശിച്ച് കൈവരിക്കേണ്ട സ്ഥിതി വരാം. സ്വാശ്രയ ബിസിനസ്സുകളിൽ അധികം മുതൽ മുടക്കിന് ഇക്കാലം ഉചിതമാവില്ല. ആരോഗ്യപരമായി അനാസ്ഥയരുത്. ക്രയവിക്രയങ്ങളിൽ സൂക്ഷ്മത പുലർത്തണം. പ്രത്യേകിച്ചും ഭൂമി വ്യാപാരത്തിൽ. വാഹനം, അഗ്നി, ആയുധം, യന്ത്രം ഇവ കൈകാര്യം ചെയ്യുന്നതിൽ ഏറ്റവും ജാഗ്രത ആവശ്യമാണ്. സാഹസകർമ്മങ്ങൾ ഒഴിവാക്കുക ഉചിത്രം. നവസംരംഭങ്ങളിൽ നിന്നും പ്രതീക്ഷിച്ചത്ര പുരോഗതി വന്നേക്കില്ല. കഴിവിനനുസരിച്ചുള്ള സ്ഥാനക്കയറ്റം, ശമ്പള വർദ്ധന എന്നിവ വൈകിയേക്കാം. ഈശ്വരസമർപ്പണങ്ങൾ മുടങ്ങാതിരിക്കാൻ കരുതൽ വേണം.
കർക്കടകക്കൂറിന് (പുണർതം 4-ാം പാദം, പൂയം, ആയില്യം)
ജനിച്ച കൂറിൻ്റെ പന്ത്രണ്ടാം ഭാവത്തിൽ ചൊവ്വ സഞ്ചരിക്കുന്നതിനാൽ താരതമ്യേന പ്രതികൂല ഫലങ്ങൾ വന്നേക്കാം. ദൂരദിക്കിലേക്ക് സ്ഥിരമായോ താത്കാലികമായോ, വ്യക്തിപരമായോ തൊഴിൽപരമായോ മാറേണ്ടി വരുന്നതാണ്. വരവ് കുറയില്ലെങ്കിലും ചെലവ് കൂടുന്നതായിരിക്കും. സൗഹൃദം കൊണ്ട് ഗുണത്തോടൊപ്പം ദോഷവും ഭവിക്കാം. ബന്ധുക്കളുടെ പ്രശ്നങ്ങളിൽ ഇടപെട്ട് പേര് ചീത്തയാവാൻ ഇടയുണ്ട്. സ്വന്തമായി ചെയ്തുപോരുന്ന തൊഴിലിൽ സമ്മർദ്ദം ഉയർന്നേക്കും. പൊതു പ്രവർത്തകർക്ക് ശത്രുക്കളേറും. രോഗക്ലേശങ്ങൾ അലട്ടാം. ഭൂമി വ്യാപാരത്തിൽ അബദ്ധം പിണയും. വീഴ്ച, ചതവ്, ഒടിവ് ഇവ സാധ്യതയാകയാൽ കരുതൽ വേണ്ടതുണ്ട്. രഹസ്യ ശത്രുക്കൾ മൂലം ക്ലേശങ്ങൾ ഭവിച്ചേക്കാം. വിദേശത്ത് ജോലി തേടിപ്പോയവർക്ക് നല്ല അവസരങ്ങൾക്കായി കാത്തിരിപ്പ് തുടരേണ്ടി വരുന്നതായിരിക്കും.
ചിങ്ങക്കൂറിന് (മകം, പൂരം, ഉത്രം ഒന്നാം പാദം)
ചൊവ്വ ജന്മരാശിയുടെ പതിനൊന്നാമെട ത്തിൽ സഞ്ചരിക്കുന്നതിനാൽ ഗുണകരമായ കാലമാണ്. ന്യായമായ ആഗ്രഹങ്ങൾ നേടിയെടുക്കും. മത്സരങ്ങളിലും അഭിമുഖങ്ങളിലും വിജയിക്കുവാനാവും. തൊഴിലന്വേഷണം സഫലമാവുന്നതാണ്. വ്യവഹാരങ്ങളിൽ അനുകൂല വിധി വരാൻ സാധ്യത കാണുന്നു. വസ്തുവ്യാപാരം ലാഭമുണ്ടാക്കുന്നതാണ്. സ്വന്തമായി ചെയ്തുപോരുന്ന തൊഴിലിൽ കൂടുതൽ ഉന്മേഷത്തോടെ പ്രവർത്തിക്കും. രാഷ്ട്രീയത്തിൽ യശസ്സുണ്ടാവും. രോഗഗ്രസ്തർക്കും ശയ്യാവലംബികൾക്കും ആശ്വാസം വന്നെത്തുന്നതാണ്. കുടുംബ ജീവിതത്തിലെ പൊരുത്തക്കേടുകൾ അനുരഞ്ജനത്തിലെത്തിയേക്കാം. സഹോദരരിൽ നിന്നും സർവ്വാത്മനായുള്ള സഹകരണം ഭവിക്കും. സംഘടനകളിൽ നേതൃപദവി മത്സരം വിനാ കൈവരുന്നതാണ്. ശത്രുക്കളുടെ പ്രവർത്തനങ്ങളെ നിസ്തേജമാക്കും. സാമ്പത്തികമായും ഉന്നമനം ഉണ്ടാവുന്ന കാലമാണ്.
കന്നിക്കൂറിന് (ഉത്രം 2,3,4 പാദങ്ങൾ, അത്തം, ചിത്തിര 1,2 പാദങ്ങൾ)
ജന്മരാശിയുടെ പത്താം ഭാവത്തിൽ ചൊവ്വ സഞ്ചരിക്കുന്നത് കർമ്മരംഗത്ത് മൗഢ്യവും പ്രയാസങ്ങളും സൃഷ്ടിക്കാം. ദേഹാധ്വാനം കൂടുന്നതാണ്. എന്നാൽ പ്രയത്നത്തിന് തക്ക പ്രതിഫലം ഉണ്ടാവുകയുമില്ല. ബന്ധുകലഹങ്ങളിൽ മാധ്യസ്ഥത്തിന് മുതിരുന്നത് ദോഷമുണ്ടാക്കിയേക്കും. മേലധികാരികളുടെ അനിഷ്ടത്തിന് പാത്രമാവുന്നതാണ്. പുതുസംരംഭങ്ങൾ തുടങ്ങുവാൻ സർക്കാരിൽ നിന്നും മറ്റും തടസ്സങ്ങൾ അനുഭവപ്പെടും. അലച്ചിലും വഴിനടത്തയുമേറും. ആരോഗ്യപരമായി ശ്രദ്ധ വേണ്ടതുണ്ട്. പാരമ്പര്യസ്വത്തുക്കളുടെ നിയമവശം, രേഖകൾ എന്നിവ പരിശോധിച്ച് കൈവശം സൂക്ഷിക്കുന്നത് ഉചിതമാവും. സഹായവാഗ്ദാനങ്ങൾ പ്രയോജനപ്പെടണമെന്നില്ല. കടം വാങ്ങുന്ന സാഹചര്യം വരാം. വായ്പകളുടെ തിരിച്ചടവിന് സമ്മർദ്ദമുണ്ടായേക്കും. തിടുക്കത്തിൽ തീരുമാനം കൈക്കൊള്ളുന്നതിനാൽ അബദ്ധങ്ങൾ പറ്റാം.
തുലാക്കൂറിന് (ചിത്തിര 3,4 പാദങ്ങൾ, ചോതി, വിശാഖം 1,2,3 പാദങ്ങൾ)
ജനിച്ച കൂറിൻ്റെ ഒമ്പതാമെടത്താണ് ചൊവ്വയുടെ സഞ്ചാരം. ഒമ്പതാമെടം ഭാഗ്യസ്ഥാനമെന്ന് അറിയപ്പെടുന്നു. ഭാഗ്യസ്ഥാനത്ത് പാപഗ്രഹമായ ചൊവ്വ വരികയാൽ ഭാഗ്യാനുഭവങ്ങൾ ശിഥിലമാവുകയോ കുറയുകയോ ചെയ്യാം. സുഗമത പ്രതീക്ഷിച്ച കാര്യനിർവഹണങ്ങൾ ക്ലേശഭൂയിഷ്ഠമാവും. ചെറിയ പ്രശ്നങ്ങൾ ചിലപ്പോൾ വലിയ പ്രശ്നങ്ങളാവാം. രോഗങ്ങൾക്ക് ചികിൽസ വൈകിക്കരുത്. ഒമ്പതാം ഭാവം ഗുരു, പിതാവ് എന്നിവരേയും സൂചിപ്പിക്കുന്നു. അച്ഛൻ്റെ ഔദ്യോഗിക രംഗത്ത് ഉയർച്ച പതുക്കെയാവും. കൃത്യനിർവഹണത്തിൽ ആലസ്യത്തിനിടയുണ്ട്. സ്വന്തം ബിസിനസ്സിൽ ലാഭം കുറയുന്നതാണ്. വിവാദങ്ങളിൽ നിന്നും വിട്ടുനിൽക്കാൻ ശ്രദ്ധിക്കണം. കുടുംബ ക്ഷേത്രത്തിൻ്റെ ജീർണ്ണോദ്ധാരണം ധനക്കമ്മിയാൽ നിലച്ചേക്കാനിടയുണ്ട്. വിദ്യാർത്ഥികൾക്ക് ഉപരിവിദ്യാഭ്യാസം സംബന്ധിച്ചുള്ള ആശയക്കുഴപ്പം ഉദിക്കാം. ദാമ്പത്യത്തിൽ പിണക്കങ്ങളും പരിഭവങ്ങളും ആവർത്തിച്ചേക്കും.
വൃശ്ചികക്കൂറിന് (വിശാഖം 4-ാം പാദം, അനിഴം, തൃക്കേട്ട)
വൃശ്ചികക്കൂറിൻ്റെ അധിപൻ കൂടിയാണ് ചൊവ്വ. അഷ്ടമരാശിയിൽ സഞ്ചരിക്കുന്നത് കാര്യതടസ്സങ്ങൾ സൃഷ്ടിക്കാം. തീരുമാനങ്ങൾ ബുദ്ധിപൂർവ്വം കൈക്കൊള്ളേണ്ട സമയമാണ്. ദുഷ്പ്രേരണകൾ തിരിച്ചറിയപ്പെടണം. കൂട്ടുകെട്ടുകളിൽ വിവേകം പുലർത്തുകയും വേണം. സാമ്പത്തികമായി കബളിപ്പിക്കപ്പെടാനും ഇടയുണ്ട്. ഔദ്യോഗികമായി അധികച്ചുമതലകൾ വന്നുചേരുന്നതാണ്. എന്നാൽ അവയിൽ ശോഭിക്കുക എളുപ്പമായേക്കില്ല. ഒപ്പമുള്ളവർ പരസ്യമായി പിന്തുണക്കാം. എന്നാലത് ആത്മാർത്ഥതയുള്ളത് ആയേക്കില്ല. കുടുംബച്ചുമതലകളിൽ വീഴ്ച വരാനിടയുണ്ട്. പുതുവാഹനം വാങ്ങാൻ അനുഗുണമായ കാലമല്ലെന്നത് ഓർമ്മയിലുണ്ടാവണം. ബിസിനസ്സിൽ വലിയ തോതിൽ പണം മുടക്കിയുള്ള വിപുലീകരണം കൈനഷ്ടം വരുത്താം. സാഹസങ്ങൾ ഒഴിവാക്കണം. ആരോഗ്യകാര്യത്തിൽ ജാഗരൂകരാവണം. ഉന്നത വ്യക്തികളുടെ വിരോധം സമ്പാദിക്കാനിടയുണ്ട്.
ധനുക്കൂറിന് (മൂലം, പൂരാടം, ഉത്രാടം ഒന്നാം പാദം)
ഏഴാം ഭാവത്തിലാണ് കുജൻ സഞ്ചരിക്കുന്നത്. കൂട്ടുകച്ചവടത്തിൽ സ്വൈരം കുറയുന്നതാണ്. നിരന്തര യാത്രകൾ ഉണ്ടാവും. യാത്രാക്ലേശം സാധ്യതയാണ്.
അന്യനാട്ടിൽ പോകാൻ ഒരുങ്ങിയിരിക്കുന്നവർക്ക് അവസരം വന്നെത്തിയേക്കും. പ്രണയികൾക്കിടയിൽ പിണക്കം വരാനിടയുണ്ട്. ദാമ്പത്യത്തിലും സ്ഥിതി വ്യത്യസ്തമാവില്ല. സുഹൃൽ ബന്ധങ്ങൾക്ക് രമ്യത കുറയുന്നതായി അനുഭവപ്പെടും. വിവാഹാലോചനകൾ അവസാന നിമിഷം വേണ്ടെന്ന് വെക്കപ്പെടാം. വായ്പകൾക്കായുള്ള ശ്രമം തുടരേണ്ടിവരും. വിദേശത്തു കഴിയുന്നവർക്ക് പ്രതീക്ഷിച്ച പുതുജോലി കിട്ടിയേക്കില്ല. ഭൂമിതർക്കങ്ങൾക്ക് പരിഹാരം കിട്ടാതെ വിഷമിക്കും. കച്ചവടക്കാർ അല്പലാഭം പ്രതീക്ഷിച്ചാൽ മതി. ആവശ്യത്തിലധികം ഉല്പന്നങ്ങൾ ശേഖരിക്കുന്നത് ഗുണമാവില്ല. കൈവായ്പകൾ വാങ്ങേണ്ടി വരുന്നതാണ്.
മകരക്കൂറിന് (ഉത്രാടം 2,3,4 പാദങ്ങ, തിരുവോണം, അവിട്ടം 1,2 പാദങ്ങൾ)
ഇഷ്ടഭാവമായ ആറാമെടത്തിലാണ് ചൊവ്വ. അതിനാൽ തൊഴിലിടം ശാന്തമാവുന്നതാണ്. മാനസികവ്യഥകൾക്ക് പരിഹാരമുണ്ടാവും. കർമ്മപരമായി മെച്ചം വന്നു ചേരുന്നതാണ്. അർഹതക്കനുസരിച്ചുള്ള തൊഴിൽ ലഭിക്കാം. മത്സരങ്ങളിൽ വിജയിക്കുന്നതാണ്. വ്യാപാരികൾക്ക് കച്ചവടത്തിൽ വിപുലനം സാധ്യമാവും. ഉപഭോക്താക്കളുടെ പൂർണ്ണ പിന്തുണ ഉണ്ടാവുന്നതാണ്. വിദ്യാഭ്യാസത്തിൽ ലക്ഷ്യബോധം വളരും. സമൂഹത്തിൻ്റെ ബഹുമാനം നേടുന്നതാണ്. കുടുംബ പ്രശ്നങ്ങൾക്ക് സമയോചിതമായി പരിഹാരം കാണുവാനാവും. ഇളം തലമുറയേയും മുതിർന്നവരേയും ഒരുമിച്ചു നിർത്തും. ദാമ്പത്യത്തിലെ അസ്വാരസ്യങ്ങൾ നീങ്ങിയേക്കും. സാമ്പത്തികമായി ഒട്ടൊക്കെ സുസ്ഥിരത ഉണ്ടാവുന്ന കാലമാണ്. രോഗഗ്രസ്തർക്ക് ചികിൽസ ഫലിക്കുന്നതായിരിക്കും. ആത്മവിശ്വാസം വർദ്ധിക്കുമെന്നതാണ് ഏറ്റവും മുഖ്യം.
കുംഭക്കൂറിന് (അവിട്ടം 3,4 പാദങ്ങൾ, ചതയം, പൂരൂരുട്ടാതി 1,2,3 പാദങ്ങൾ)
ആറാം ഭാവത്തിൽ അനുകൂല നിലയിലായിരുന്നു ചൊവ്വ. ഇപ്പോൾ മുതൽ അഞ്ചാം ഭാവത്തിൽ സഞ്ചരിക്കുന്നത് സമ്മിശ്ര ഫലങ്ങൾ സൃഷ്ടിക്കും. നിർബന്ധ ശീലം മിത്രങ്ങളുടെ പോലും ശത്രുതയ്ക്ക് കാരണമാകുന്നതാണ്. വിട്ടുവീഴ്ചയ്ക്ക് മുതിരാത്തത് കുടുംബത്തിൽ പലതരം പ്രശ്നങ്ങളുണ്ടാക്കും. തൊഴിൽ മേഖലയിൽ അവസരങ്ങൾ നഷ്ടപ്പെടാതെ നോക്കണം. ഉദാസീനത പഠിപ്പിനെ ബാധിക്കുന്നതാണ്. ഏല്പിച്ച ദൗത്യങ്ങൾ നീട്ടിവെക്കുന്നതിനാൽ മേലധികാരികളുടെ അപ്രീതി നേടും. പഞ്ചമഭാവം സന്താനസ്ഥാനമാകയാൽ മകൻ്റെ ശാഠ്യശീലം വിഷമിപ്പിച്ചേക്കും. ധാർമ്മികവും മതപരവുമായ കാര്യങ്ങളിൽ തടസ്സം വരാനിടയുണ്ട്. കരുതി വെച്ചിരുന്ന ധനം മറ്റാവശ്യങ്ങൾക്ക് ചെലവഴിക്കും. എന്നാൽ ധനകാര്യത്തിൽ ഉൽക്കണ്ഠയുണ്ടാവില്ല. ഗർഭിണികളുടെ ആരോഗ്യസ്ഥിതിയിൽ ജാഗ്രതയുണ്ടാവണം.
മീനക്കൂറിന് (പൂരൂരുട്ടാതി 4-ാം പാദം, ഉത്രട്ടാതി, രേവതി)
ചൊവ്വ കർക്കടകം രാശിയിൽ സഞ്ചരിച്ചപ്പോഴെന്നപോലെ, മിഥുനം രാശിയിൽ സഞ്ചരിക്കുമ്പോഴും ഗുണാനുഭവങ്ങൾ കുറയുന്നതാണ്. ആപ്തമിത്രങ്ങളുമായി പിണങ്ങാനിടയുണ്ട്. അകാരണമായ മനക്ലേശമുണ്ടാവും. ദേഹസ്വസ്ഥത ഇടക്കിടെ കുറയാം. അയൽക്കാരുമായി വിരോധിക്കാനുള്ള സാഹചര്യം ഉടലെടുത്തേക്കും. ബന്ധുക്കളുടെ തർക്കത്തിൽ ഇടപെടുന്നത് കരുതലോടെ വേണം. സ്വന്തം തീരുമാനങ്ങൾ മറ്റുള്ളവരുടെ മേൽ അടിച്ചേല്പിക്കുകയാണ് എന്ന ആരോപണം കുടുംബത്തിൽ നിന്നുതന്നെ ഉയരുന്നതാണ്. ധനപരമായി കൃത്യത പുലർത്താൻ ശ്രദ്ധിക്കണം. നാലാമെടം വാഹനങ്ങളെ സൂചിപ്പിക്കുന്നു. വാഹനങ്ങൾക്ക് അറ്റകുറ്റപ്പണി വരാം. ഗൃഹനിർമ്മാണത്തിൽ വിളംബം ഭവിക്കുന്നതാണ്. വൃദ്ധരായ മാതാപിതാക്കളുടെ ആരോഗ്യ പരിപാലനത്തിൽ അലംഭാവമരുത്. ഏതുകാര്യവും ആലോചനാപൂർവ്വം നടപ്പിൽ വരുത്തുവാൻ കരുതലുണ്ടാവണം.
Read More
Stay updated with the latest news headlines and all the latest Lifestyle news. Download Indian Express Malayalam App - Android or iOS.