Weekly Horoscope May 04- May 10: സമ്പൂർണ വാരഫലം, അശ്വതി മുതൽ രേവതി വരെ

Weekly Horoscope May 04 to May 10 2025: ആദിത്യൻ മേടം രാശിയിൽ ഭരണി ഞാറ്റുവേലയിൽ. ചന്ദ്രൻ വെളുത്ത സപ്തമി മുതൽ ത്രയോദശി വരെയുള്ള തിഥികളിൽ. പൂയത്തിൽ തുടങ്ങി ചിത്തിര വരെയാണ് ഈ ആഴ്ചത്തെ നക്ഷത്രങ്ങൾ. ബുധൻ മീനം രാശിയിലാണ്. മേയ് 7 ന് മേടത്തിൽ പ്രവേശിക്കുന്നു. അപ്പോൾ രേവതിയിൽ നിന്നും അശ്വതിയിലാവും ബുധസഞ്ചാരം. ചൊവ്വ നീചക്ഷേത്രമായ കർക്കടകത്തിൽ പൂയം നക്ഷത്രത്തിൽ സഞ്ചരിക്കുകയാണ്.  

ശുക്രൻ ഉച്ചരാശിയായ മീനത്തിൽ ഉത്രട്ടാതി നക്ഷത്രത്തിലാണ്. ശനിയും ഉത്രട്ടാതി നക്ഷത്രത്തിൽ സഞ്ചരിക്കുന്നുണ്ട്. വ്യാഴം ഇടവം രാശിയിൽ മകയിരം നക്ഷത്രത്തിലാണ്. വ്യാഴം ഇടവം രാശിയിൽ സഞ്ചരിക്കുന്ന ഒടുവിലത്തെ ആഴ്ചയാണിതെന്ന സവിശേഷതയുണ്ട്. 

ശനി മീനം രാശിയിൽ ഉത്രട്ടാതിയിൽ സഞ്ചരിക്കുന്നു. രാഹു മീനം രാശിയിൽ പൂരൂരുട്ടാതിയിലാണ്. മീനം രാശിയുടെ ഒരു ഡിഗ്രിയിൽ നിന്നും പൂജ്യം ഡിഗ്രിയിൽ പിൻഗതിയായാണ് രാഹുവിൻ്റെ സഞ്ചാരം കൃത്യമായും രാശിസന്ധിയിലാണ് രാഹു. ഗ്രഹത്തിൻ്റെ ദോഷശക്തി ഏറ്റവും തീവ്രമാവും, രാശിസന്ധിയിൽ എത്തുമ്പോൾ. സ്വാഭാവികമായും കേതുവും രാശിസന്ധിയിലാണ്. കന്നിരാശിയുടെ 1 ഡിഗ്രിയിൽ നിന്നും പൂജ്യം ഡിഗ്രിയിലേക്കാണ് കേതുവിൻ്റെ സഞ്ചാരം. 

ഈ ഗ്രഹനിലയുടെ പശ്ചാത്തലത്തിൽ അശ്വതി മുതൽ രേവതി വരെയുള്ള നാളുകളിൽ ജനിച്ചവരുടെ വാരഫലം ഇവിടെ അപഗ്രഥിക്കുന്നു.

അശ്വതി

ജോലിസ്ഥലത്ത് സ്വാതന്ത്രം അഭംഗുരമാവും. ആദിത്യൻ രണ്ടാം നക്ഷത്രത്തിൽ സഞ്ചരിക്കുകയാൽ വാക്കുകൾ പരുഷങ്ങളാവാൻ സാധ്യതയുണ്ട്. ഇടക്കിടെ ആലസ്യം പിടികൂടാം. മുൻപില്ലാത്ത വിധം കാര്യങ്ങൾ പിന്നീടത്തേക്ക് മാറ്റാനുള്ള ശ്രമമുണ്ടാവുന്നത് പന്ത്രണ്ടിലെ ശനി - രാഹു സ്വാധീനം കൊണ്ടാണ്. ബന്ധുത്വവും സൗഹൃദവും ഗുണത്തിന് മാത്രമല്ലെന്ന് ബോധ്യമാവും. ഞായർ മുതൽ ചൊവ്വവരെ ഈർഷ്യയും തൃപ്തികുറവും ഭവിക്കുന്നതാണ്. ബുധനാഴ്ച തൊട്ട് കൂടുതൽ മാനസിക സൗഖ്യവും കർമ്മപുഷ്ടിയും ഉണ്ടാവുന്നതാണ്. മേലധികാരികളുടെ അനുമോദനം ലഭിക്കും.

ഭരണി

പന്ത്രണ്ടാം ഭാവത്തിലെ ശനിരാഹു യോഗം ദുർവ്യയത്തിന് കാരണമാകും. വഴിനടത്തം മൂലം ക്ലേശങ്ങൾ ഉണ്ടാവുന്നതാണ്. വിലപിടിച്ച വസ്തുക്കൾ അപഹരിക്കപ്പെടാം. സമയനിഷ്ഠ പാലിക്കാൻ കഴിയണമെന്നില്ല. മക്കളുടെ ആവശ്യങ്ങൾ നടത്തിക്കൊടുക്കും. വാഹന യാത്രയിൽ കരുതൽ വേണ്ടതുണ്ട്. നാലാം ഭാവത്തിൽ  ചൊവ്വയുളളത് മനക്ലേശത്തിന് കാരണമാകും. ബന്ധുവിരോധത്തിന് സാധ്യത കാണുന്നു. പരാശ്രയം വേണ്ടെന്നു കരുതിയാലും പലരുടേയും സഹായം ആവശ്യമാവും. ആരോഗ്യ പരിപാലനത്തിൽ അലംഭാവമരുത്.

കാർത്തിക

നക്ഷത്രാധിപൻ്റെ ഉച്ചസ്ഥിതി ഏതെങ്കിലും തരത്തിൽ ഗുണം ചെയ്യുന്നുണ്ടാവും. ഇടവക്കൂറുകാർക്ക് രാശ്യധിപനായ ശുക്രനും ഉച്ചത്തിലാണ്. ആകയാൽ ജീവിതം സുഗമമാവും. തടസ്സങ്ങളെ നന്നായി അതിജീവിക്കാനാവും. തൊഴിലിൽ  ശ്രദ്ധപുലർത്തുക മൂലം മേലധികാരികളുടെ പ്രീതിയുണ്ടാവും. ഭൗതികമായി സംതൃപ്തി ഭവിക്കും.  ജീവിത നിലവാരം ഉയരുന്നതാണ്. മേടക്കൂറുകാർക്ക് നാലിൽ ചൊവ്വ സഞ്ചരിക്കുന്നതിനാൽ മനക്ലേശങ്ങളുണ്ടാവും. കുടുംബകാര്യങ്ങളിൽ തൃപ്തി കുറയും. ഇടവക്കൂറുകാർക്ക് സഹായിക്കാനും പിന്തുണക്കാനും പലരും ഉണ്ടെന്ന തോന്നൽ ശക്തമാവും. ഞായർ, വ്യാഴം, ശനി കൂടുതൽ മെച്ചമുള്ള ദിവസങ്ങൾ.

രോഹിണി

നക്ഷത്രാധിപനായ ചന്ദ്രന് കുജയോഗം വരുന്നതിനാൽ ഞായർ, തിങ്കൾ ദിവസങ്ങളിൽ സ്വന്തം നിർബന്ധശീലം ശത്രുക്കളെ സൃഷ്ടിക്കുന്നതാണ്. ദുസ്സാഹസങ്ങൾക്ക് മുതിർന്നേക്കും. ഇല്ലാത്ത കഴിവുകൾ ഉണ്ടെന്ന് ഭാവിക്കാൻ സാധ്യതയുണ്ട്. വെള്ളി, ശനി ദിവസങ്ങളിൽ ചന്ദ്രന് കേതുയോഗം വരുന്നുണ്ടു. മനക്ലേശമുണ്ടാവും. ഏറ്റെടുത്ത കരാറുകൾ തടസ്സപ്പെടാം. അകാരണമായ ഭയം ഭവിക്കുന്നതാണ്. മറ്റു ദിവസങ്ങളിൽ കാര്യവിജയം പ്രതീക്ഷിക്കാം. ശുഷ്കാന്തിയോടെ പ്രവർത്തിക്കാനാവും. കലാരംഗത്ത് ഉന്മേഷം പ്രകടമാവും. ധനപരമായി സ്വസ്ഥതവരും.

മകയിരം

നക്ഷത്രത്തിൽ വ്യാഴം സഞ്ചരിക്കുന്നതിനാൽ സ്വസ്ഥത കുറയാം. അലച്ചിലുണ്ടാവും. പലകാര്യങ്ങളിലും ആശയക്കുഴപ്പം തുടരുന്നതാണ്. ധനപരമായി മെച്ചമുണ്ടാവുന്ന കാലമായിരിക്കും. സംരംഭങ്ങളിൽ ഉണർവ്വ് പ്രതീക്ഷിക്കാം. ന്യായമായ ആവശ്യങ്ങൾ നടന്നുകിട്ടും. എന്നാൽ തത്കാലം പുതുകാര്യങ്ങൾ തുടങ്ങരുത്. നക്ഷത്രാധിപനായ ചൊവ്വയുടെ അനുകൂലത കുറവുള്ള കാലമായതിനാൽ ആത്മവിശ്വാസം ചോരാം. ചില ചോദ്യങ്ങൾ ഉത്തരം കിട്ടാതെ തുടരുന്നതാണ്. ഗാർഹികമായി അത്ര സൗഖ്യം ഉണ്ടാവില്ല. മൗനം ഭൂഷണമാവും. 

തിരുവാതിര

സ്വയം തീരുമാനിക്കാൻ കഴിയുന്ന കാര്യങ്ങൾ ഭംഗിയായി നിർവഹിക്കും. പരാശ്രയത്വത്തിൽ താല്പര്യമുണ്ടാവില്ല. ഉദ്യോഗസ്ഥർക്ക് സമ്മർദ്ദമില്ലാതെ ജോലി ചെയ്യാൻ കഴിയുന്നതാണ്. ബിസിനസ്സ് യാത്രകൾ കൂടുന്നതായിരിക്കും. പിതൃബന്ധുക്കളെ സന്ദർശിക്കുവാൻ അവസരമുണ്ടാവും. കച്ചവടത്തിൽ സാമ്പത്തികമായ ഉന്നമനം കൈവരും. വിദ്യാർത്ഥികളുടെ ഉപരിപഠനകാര്യത്തിൽ ഉചിത തീരുമാനം ഉണ്ടാകുന്നതാണ്. താത്കാലികമായി വാടകവീട്ടിലേക്ക് മാറാനാവും. ബുധൻ, വ്യാഴം ദിവസങ്ങൾ കൂടുതൽ സുഖകരമാവും. സാമൂഹിക മാധ്യമങ്ങളെ കൂടുതലായി പിന്തുടരും. 

പുണർതം

തൊഴിലിൽ മെച്ചം ഉണ്ടാവും. പോരായ്മകൾ തിരിച്ചറിഞ്ഞ് പരിഹരിക്കും.  സഹപ്രവർത്തകരുടെ പിന്തുണ ഉറപ്പിക്കാനാവും. ബിസിനസ്സിലും വളർച്ച വരുന്ന കാലമാണ്. സർക്കാരിൽ സമർപ്പിച്ച  അപേക്ഷകൾ അനുവദിക്കപ്പെടും. ആരോഗ്യപരമായി കരുതൽ വേണം. വൈദ്യ പരിശോധന, മരുന്നുകൾ കഴിക്കുക ഇവയിൽ ഉദാസീനതയരുത്. ചൊവ്വയും ശനിയും രാഹുവും  അനുകൂലരല്ല എന്ന കാര്യം എപ്പോഴും ഓർമ്മിക്കണം. പുനരാലോചനകളിലൂടെ എല്ലാ വശങ്ങളും പരിശോധിച്ച ശേഷമാവണം മുഖ്യകാര്യങ്ങൾ നിർവഹിക്കാൻ. കുടുംബാംഗങ്ങളെ ഒത്തൊരുമിപ്പിക്കുക എളുപ്പമായേക്കില്ല.

പൂയം

ചന്ദ്രനും ചൊവ്വയും ജന്മരാശിയിൽ, ജന്മനക്ഷത്രത്തിൽ സഞ്ചരിക്കുകയാൽ സമ്മർദ്ദങ്ങളെ അഭിമുഖീകരിക്കേണ്ടി വന്നേക്കും. അല്പസന്തോഷങ്ങൾ കുറയില്ല. പാരിതോഷികം ലഭിക്കാം. ഇഷ്ടജനങ്ങളെ കാണാനാവും. മംഗളകർമ്മങ്ങളിൽ സംബന്ധിക്കുന്നതാണ്. തൊഴിലിടത്തിൽ മനസ്സമാധാനം പ്രതീക്ഷിക്കാം. മുൻ തീരുമാനങ്ങൾ പ്രാവർത്തികമാക്കാൻ സാധിച്ചേക്കും. സഹപ്രവർത്തകരുടെ വാക്കുകൾ സ്വീകാര്യമാവുന്നതാണ്. പ്രകോപനങ്ങളെ കേട്ടില്ലെന്നു നടിക്കുക. ക്ഷോഭശീലം ഒഴിവാക്കണം. ധനപരമായി സംതൃപ്തിയുണ്ടാവും.

ആയില്യം

പ്രതികൂലവും അനുകൂലവുമായ കാര്യങ്ങളുടെ സമവായമാണല്ലോ ജീവിതം. അതിൻ്റെ മിനിപ്പതിപ്പാവും ഈ വാരം. പെട്ടെന്ന് കോപിക്കാം. ഉറ്റോരോടുപോലും നിലമറന്ന് സംസാരിക്കാനിടയുണ്ട്. ജന്മരാശിയിലെ ചൊവ്വ വൈകാരിക ദുർബലതയുണ്ടാക്കും. അതിനാൽ ആത്മനിയന്ത്രണം പുലർത്തണം. വ്യാഴം, ആദിത്യൻ എന്നീ ഗ്രഹങ്ങൾ സമൂഹത്തിൽ ആദരവ് ഉയർത്തുന്നതാണ്. ചെയ്യുന്ന തൊഴിലിൽ അംഗീകാരവും ധനലാഭവും കൈവരും. മുൻപ് കഠിനമായി തോന്നിയ ചില കാര്യങ്ങൾ ഇപ്പോൾ ലഘുപ്രയത്നത്താൽ സാധ്യമാകും. ഞായർ, ബുധൻ, വ്യാഴം എന്നീ ദിവസങ്ങൾക്ക് ഗുണം കുറയാം.

മകം

അഷ്ടമഭാവത്തിൻ്റെ അലോസരങ്ങൾ തുടരുകയാൽ എല്ലാക്കാര്യത്തിലും ജാഗ്രതയുണ്ടാവണം. അപരിചിതരുമായുള്ള ക്രയവിക്രയങ്ങൾ ഒഴിവാക്കേണ്ടതാണ്. സൗഹൃദങ്ങളിൽ കരുതൽ വേണം. ബന്ധുകലഹത്തിന് സാഹചര്യം വരാം. തൊഴിലിടത്തിൽ സമാധാനമുണ്ടാവുന്നതായിരിക്കും. നറുക്കെടുപ്പ് / ചിട്ടി ഇവ ഗുണകരമാവുന്നതാണ്  പിതാവിൽ നിന്നും ധനസഹായം പ്രതീക്ഷിക്കാം. കുടുംബ ജീവിതത്തിൽ സാമാന്യമായ സംതൃപ്തി വന്നെത്തും. ജോലിക്കാര്യത്തിനായി ചെറുപ്പക്കാർക്ക് അലച്ചിലുണ്ടാവും. തിങ്കൾ, ചൊവ്വ, ശനി ദിവസങ്ങളിൽ സ്വൈരം കുറയുന്നതാണ്.

പൂരം

ഔദ്യോഗികമായി കുറച്ച് തിരക്കുകൾ വന്നെത്തും.  സംഘടനാ പ്രവർത്തനത്തിൽ സജീവമാകുന്നതാണ്. ചൊവ്വ, ശനി, രാഹു തുടങ്ങിയ ഗ്രഹങ്ങൾ പ്രതികൂലരാവുകയാൽ സമ്മർദ്ദം നിഴൽ പോലെ കൂടെയുണ്ടാവും. എന്തു ചെയ്യുമ്പോഴും ഇക്കാര്യം മനസ്സിലുണ്ടാവണം. ബിസിനസ്സ് ചെയ്യുന്നവർക്ക് കടം വസൂലാക്കുക എളുപ്പമായേക്കില്ല. ഊഹക്കച്ചവടത്തിൽ പണം നിക്ഷേപിക്കുന്നത് കരുതലോടെയാവണം. ദാമ്പത്യത്തിൽ അനുരഞ്ജനവും മനസ്സിലാക്കലും അനിവാര്യമാണ്. കലാപ്രവർത്തനത്തിന് സമയം കിട്ടും. ഞായർ, ബുധൻ, വ്യാഴം ദിവസങ്ങൾക്ക് മേന്മ കൂടും.

ഉത്രം

സ്വതസ്സിദ്ധമായ കഴിവുകൾ പ്രയോജനപ്പെടുത്തും. ഉദ്യോഗസ്ഥർക്ക് ജോലിഭാരം കൂടും. സഹപ്രവർത്തകർക്കിടയിൽ അംഗീകാരം ഉയരുന്നതാണ്. തൊഴിൽ തേടുന്നവർക്ക് സ്വകാര്യ സ്ഥാപനത്തിൽ ജോലി കിട്ടാനിടയുണ്ട്. ബന്ധുക്കളുടെ തെറ്റിദ്ധാരണ നീക്കാനുള്ള ശ്രമം ഫലവത്തായേക്കില്ല. കന്നിക്കൂറുകാർക്ക് ഭൂമിയിൽ നിന്നും ചെറിയ ആദായമെങ്കിലും വന്നുചേരും. ചിങ്ങക്കൂറുകാർക്ക് ഭൂമിയിൽ ചെലവുണ്ടാവും. പുതിയ വരുമാനമാർഗം കണ്ടെത്തുന്നതിൽ വിജയിക്കും. കമ്മീഷൻ തുക തൃപ്തിയുണ്ടാക്കും.

അത്തം

നക്ഷത്രാധിപനായ ചന്ദ്രൻ പക്ഷബലവാനാകയാൽ ഗുണാനുഭവങ്ങൾ മുന്നിട്ടു നിൽക്കും. മനസ്സിൻ്റെ നിയന്ത്രണശക്തി നഷ്ടപ്പെട്ടില്ല. വിപണന തന്ത്രങ്ങൾ ഫലവത്താകയാൽ കച്ചവടം മെച്ചപ്പെടും. ഓൺലൈൻ ബിസിനസ്സിൻ്റെ വിപുലീകരണത്തിനായി പരസ്യം നൽകിയേക്കും. ഭാഗ്യപുഷ്ടി പ്രതീക്ഷിക്കാം. ധാർമ്മികവും ജീവകാരുണ്യ പരവുമായ കൃത്യങ്ങൾ ഫലമടയുന്നതാണ്. അതിൻ്റെ പേരിൽ അഭിനന്ദനം ലഭിക്കാം. ഞായർ തിങ്കൾ, വ്യാഴം, വെള്ളി ദിവസങ്ങളിൽ ധനലാഭം ഉണ്ടാവും. മറ്റു ദിവസങ്ങളിൽ ക്ലേശമോ അലച്ചിലോ വരുന്നതാണ്.

ചിത്തിര

ലഘുപ്രയത്നം കൊണ്ടുതന്നെ നേട്ടങ്ങൾ സ്വായത്തമാക്കും. ചിന്തിച്ച് തീരുമാനങ്ങൾ കൈക്കൊള്ളുവാൻ കഴിയുന്നതാണ്.  പുതിയ കാര്യങ്ങളോട് പുറന്തിരിഞ്ഞു നിൽക്കുന്ന പ്രവണത ഗുണം ചെയ്തേക്കില്ല. പാരമ്പര്യമായി ചെയ്തുപോരുന്ന തൊഴിൽ മെച്ചപ്പെടും. സ്വകാര്യ സ്ഥാപനത്തിലെ ഉദ്യോഗസ്ഥർക്ക് അസൗകര്യപ്രദമായ ഷിഫ്റ്റുകളിൽ ജോലി ചെയ്യേണ്ട സാഹചര്യം വന്നേക്കാം. പ്രധാനകാര്യങ്ങളിൽ കുടുംബാംഗങ്ങളുടെ അഭിപ്രായം ആരായുന്നത് ഉചിതമാവും. ആഢംബരച്ചെലവുകൾ ഉണ്ടാവുന്നതാണ്. ചൊവ്വ, ശനി ദിവസങ്ങളിൽ ശുഭാരംഭം വർജ്യം.

ചോതി

അഷ്ടമരാശി കഴിഞ്ഞതിനാൽ പുത്തൻ ഉണർവ്വ് അനുഭവപ്പെടും. ന്യായമായ ആവശ്യങ്ങൾ നടന്നുകിട്ടുന്നതാണ്. എല്ലാ സുഹൃത്തുക്കളും മാലാഖമാരാണെന്നു കരുതരുത്. കർമ്മരംഗത്ത് അധികാരമുണ്ടാവും. ദുസ്സ്വാതന്ത്ര്യം എടുക്കുന്നവരോട് കർശനമായ ഭാഷ ഉപയോഗിക്കേണ്ടി വരുന്നതാണ്. വ്യാപാര പുരോഗതി തൃപ്തികരമാവും. മകളുടെ ഉപരിപഠനത്തിൽ ചില ആശങ്കകൾ ഉണ്ടാവാനിടയുണ്ട്. സകുടുംബം ഉത്സവം, തീർത്ഥയാത്ര മുതലായവയിൽ സംബന്ധിക്കുന്നതാണ്. ഊഹക്കച്ചവടത്തിൽ കരുതൽ വേണം. ബിസിനസ്സ് രഹസ്യങ്ങൾ ആരോടും പങ്കുവെക്കരുത്.

വിശാഖം

തുലാക്കൂറുകാർക്ക് പ്രവർത്തനങ്ങളിൽ വിജയമുണ്ടാവും. ബിസിനസ്സ് ചർച്ചകൾ ഫലപ്രദമായേക്കും. പൊതുപ്രവർത്തനത്തിൽ ജനകീയ അടിത്തറ ബലപ്പെടുന്നതാണ്. പ്രൊഫഷണൽ രംഗത്ത് കിടമത്സരങ്ങൾ ഉണ്ടാവുമെങ്കിലും വിജയിക്കാൻ കഴിഞ്ഞേക്കും. പ്രണയ സ്വപ്നങ്ങൾ പേറുന്നവർക്ക് കാലം ഗുണകരമാവില്ല. എഴുത്തുകാർക്ക് ഭാവന പുഷ്ടിപ്പെടും. വൃശ്ചികക്കൂറുകാർക്ക് ദാമ്പത്യത്തിൽ സംതൃപ്തിയുണ്ടാവും. വാരാദ്യ ദിവസങ്ങൾക്ക് വേണ്ടത്ര ഗുണമുണ്ടാവില്ല. മറ്റു ദിവസങ്ങളിൽ പുതിയ കാര്യങ്ങൾ പഠിക്കാൻ സന്ദർഭമുണ്ടാവും.

അനിഴം

നക്ഷത്രനാഥനായ ശനി അഞ്ചാം ഭാവത്തിൽ ശുക്രനോടൊപ്പം ഉത്രട്ടാതിയിൽ സഞ്ചരിക്കുന്നു. തന്മൂലം സ്ത്രീസൗഹൃദം പുഷ്ടിപ്പെടുന്നതാണ്. കലാപരമായ വാസനകൾ പ്രദർശിപ്പിക്കാനവസരം വന്നു ചേരും. കൂട്ടുബിസിനസ്സുകൾ വിജയം വരിക്കുന്നതാണ്. ഭാഗ്യധിപനായ ചന്ദ്രന് രാശ്യധിപനായ ചൊവ്വയുമായി ബന്ധം വരികയാൽ ശുഭകാര്യങ്ങൾ, മികച്ച സഹവർത്തിത്വം ഇവ പ്രതീക്ഷിക്കാം. ധനപരമായ തടസ്സങ്ങൾ നീങ്ങാം. കുടുംബാന്തരീക്ഷം സ്നേഹപൂർണ്ണമാവും. പിതൃ- പുത്ര ബന്ധം മെച്ചപ്പെടുന്നതാണ്.

തൃക്കേട്ട

ജന്മനക്ഷത്രാധിപനായ ബുധൻ്റെ മൂന്നുമാസത്തോളം നീണ്ട നീചസ്ഥിതി അവസാനിക്കുന്ന വാരമാണ്. ആറാം ഭാവത്തിൽ ബുധാദിത്യന്മാർ സഞ്ചരിക്കുന്നത് പ്രവൃത്തിയിൽ നൈപുണ്യം ഉണ്ടാക്കും. കഴിവുകൾ മേലധികാരികളാൽ പ്രശംസിക്കപ്പെടും. നവസംരംഭങ്ങൾ ജനശ്രദ്ധയെ ആകർഷിച്ചേക്കാം. അധ്വാനത്തിൽ ആത്മസംതൃപ്തി അനുഭവിക്കും. കുടുംബകാര്യങ്ങളിൽ യുക്തമായ തീരുമാനങ്ങൾ കൈക്കൊള്ളും. ഉപരിപഠനകാര്യത്തിൽ തീർപ്പുണ്ടാവുന്നതാണ്. ഞായർ, തിങ്കൾ, ശനി ദിവസങ്ങൾക്ക് അല്പം മേന്മ കുറയാം. ആരോഗ്യകാര്യങ്ങളിൽ ശ്രദ്ധ വേണം.

മൂലം

ഞായർ ബന്ധുസമാഗമം, കുടുംബത്തിനൊപ്പം ലഘുവിനോദയാത്ര, പുറമേ നിന്നും ഭക്ഷണം കഴിക്കൽ ഇവയുണ്ടാവും. തിങ്കളും ചൊവ്വയും ചന്ദ്രൻ അഷ്ടമരാശിയിൽ സഞ്ചരിക്കുകയാൽ മനക്ലേശം വരാം. ദേഷ്യം കൂടുന്നതാണ്. ചിലരുടെ വിരോധം സമ്പാദിക്കാനിടയുണ്ട്. ബുധൻ സമ്മിശ്രമായ അനുഭവങ്ങൾ ഭവിക്കാം. മറ്റുദിവസങ്ങളിൽ പലതരത്തിലുള്ള ഗുണഫലങ്ങൾ ഉണ്ടാവുന്നതാണ്. കച്ചവടത്തിൽ കൂടുതൽ ശ്രദ്ധചെലുത്താൻ കഴിയും. സംഘടനയിൽ ബഹുമാന്യത ഉയരും. ഭാവിയെക്കുറിച്ച് ഗൗരവത്തോടെ ആലോചിക്കുവാനും നല്ല തീരുമാനങ്ങൾ കൈക്കൊള്ളാനുമാവും.

പൂരാടം

കർമ്മമേഖലയിൽ ഗുണം ഭവിക്കാൻ കൂടുതൽ അധ്വാനം ആവശ്യമാവും. മറ്റുള്ളവരെ ആശ്രയിക്കുന്ന കാര്യങ്ങൾ സാർത്ഥകമാവാൻ തുടർസമ്മർദ്ദം വേണ്ടതുണ്ട്. നവസംരംഭങ്ങളുടെ പ്രാരംഭ നടപടികൾ ആരംഭിക്കും. ഗൃഹാന്തരീക്ഷം കുറച്ചൊക്കെ സമാധാനം നൽകും. ധനവരവ് തൃപ്തിയേകുമെങ്കിലും മിതവ്യയം പാലിക്കാനായേക്കില്ല.  തിങ്കളും ചൊവ്വയും എല്ലാക്കാര്യങ്ങളിലും കരുതലുണ്ടാവണം. ഉപാസനാദികൾക്ക് മുടക്കം വരാനിടയുണ്ട്. മംഗളകർമ്മങ്ങളിൽ സംബന്ധിക്കും. പാരിതോഷികങ്ങൾ ലഭിക്കാം.

ഉത്രാടം

ജോലിത്തിരക്കുകൾക്കിടയിൽ സ്വന്തം കാര്യം മറക്കും. സംഘടനാ ചുമതലകൾ ഒഴിയാൻ തീരുമാനിച്ചാലും തുടരാനുള്ള സമ്മർദ്ദം ഉണ്ടാവും. കരാർ പണികൾ നീട്ടിക്കിട്ടും. ബിസിനസ്സിനായി ലോൺ സ്വീകരിക്കും. ബന്ധുകലഹങ്ങളിൽ മാധ്യസ്ഥം വഹിക്കും. പുതിയ സാങ്കേതികവിദ്യ പഠിക്കാൻ ഓഫീസിൽ നിന്നും നിർദ്ദേശം ലഭിക്കാം. ഔദ്യോഗിക - അനൗദ്യോഗിക യാത്രകൾ വേണ്ടി വരുന്നതാണ്.  ഗൃഹനിർമ്മാണം തടസ്സപ്പെടാതിരിക്കാൻ സ്വർണ്ണപ്പണയമോ കൈവായ്പയോ വേണ്ടിവരാം. ചൊവ്വ, ബുധൻ, വ്യാഴം ദിവസങ്ങൾക്ക് മേന്മ കുറയാം.

തിരുവോണം

പദവി ഉയർന്നില്ലെങ്കിലും  ചുമതലകൾ കൂടാം. വേതനം വർദ്ധിച്ചില്ലെങ്കിലും ജോലിഭാരം കുറയില്ല. അധികാരികൾ കൂടുതൽ നിർദ്ദേശങ്ങൾ മുന്നോട്ടുവെക്കും. പ്രണയത്തിൽ നിന്നും പിന്മാറാൻ ഏഴാം ഭാവത്തിൽ സഞ്ചരിക്കുന്ന ചൊവ്വ കാരണമാകാം. ഗൃഹത്തിൻ്റെ അറ്റകുറ്റപ്പണിക്കായി ചെലവേറുന്നതാണ്. ആവശ്യത്തിന് വിശ്രമം കിട്ടിയേക്കില്ല. ഞായർ തിങ്കൾ ദിവസങ്ങളിൽ സുഹൃൽ സമാഗമം സന്തോഷമേകും. ചൊവ്വ, ബുധൻ ദിവസങ്ങൾ അഷ്ടമരാശിയാകയാൽ എല്ലാക്കാര്യത്തിലും കരുതൽ ആവശ്യമാണ്. കുടുംബാംഗങ്ങളുടെ പിന്തുണ കുറയും.

അവിട്ടം

പ്രവർത്തനത്തിൽ അപ്രതീക്ഷിത തടസ്സമോ മേലധികാരികളുടെ ഇടപെടലുകളോ ഭവിക്കാം. സഹപ്രവർത്തകരുമായി വാക്കുതർക്കങ്ങൾ ഉണ്ടാവാനിടയുണ്ട്. കുടുംബ സുഖവും ദാമ്പത്യത്തിൽ തൃപ്തിയും അനുഭവപ്പെടും. മകളുടെ പരീക്ഷാവിജയം ആനന്ദിപ്പിക്കും. ഇഷ്ടജനങ്ങളുമായി ഒത്തുചേരൽ,  ഉല്ലാസം ഇവയുണ്ടാവും. കുംഭക്കൂറുകാർക്ക് കൃഷിയിൽ ആഭിമുഖ്യം വളരുന്നതാണ്. ഭൂമിയിൽ നിന്നും ചെറിയ ആദായം പ്രതീക്ഷിക്കാം. മകരക്കൂറുകാർക്ക് വാടകവീട് ലഭിക്കും. വ്യാപാര കാര്യങ്ങളിൽ ശ്രദ്ധ കുറയാനിടയുണ്ട്. വാരമധ്യത്തിലെ ദിവസങ്ങളിൽ സുഗമത ലോപിക്കാം.

ചതയം

കുടുംബകാര്യങ്ങളിൽ അഭിപ്രായൈക്യം കുറയാം. മകൻ്റെ മികച്ച വിജയം പിണക്കങ്ങളെ പരിഹരിക്കുന്നതാണ്. രോഗാവസ്ഥയിലുള്ളവർക്ക് വിദഗ്ദ്ധ ചികിൽസ വേണ്ടിവരാം. ആദർശ ചിന്തകളെ പ്രായോഗികമാക്കാൻ ശ്രമിച്ചേക്കും. തൊഴിലിടത്തിലെ എതിർപ്പുകളെ തമസ്കരിച്ച് മുന്നേറും. ഉൽസവാദികളിൽ പങ്കെടുക്കുന്നതാണ്. യോഗ, പ്രഭാഷണങ്ങൾ ഇവയ്ക്കായും സമയം കണ്ടെത്തും. സ്വന്തം സംരംഭങ്ങൾ പ്രവർത്തനക്ഷമമാവാൻ അല്പം കൂടി കാത്തിരിക്കണം. വ്യവഹാരങ്ങൾ കോടതിക്ക് പുറത്തുവെച്ച് പരിഹരിക്കാൻ എതിർകക്ഷികൾ താല്പര്യപ്പെടാം.

പൂരൂരുട്ടാതി

രാഹു പൂരൂരുട്ടാതിയിൽ ഇനി കുറേക്കാലം ഉണ്ടാവും. ഇപ്പോൾ നാലാംപാദത്തിൽ നിന്നും മൂന്നാം പാദത്തിലേക്ക് കടക്കാൻ പോവുന്നു. ചിന്തകൾ പിന്നിലോട്ട് പോവാം. ക്രിയാശേഷി കുറയാനുമിടയുണ്ട്.  കാര്യസാധ്യത്തിന് കുറുക്കുവഴികൾ തേടുന്നതാണ്. ഗൃഹജീവിതത്തിൽ പൂർണതൃപ്തി പറയാനാവില്ല. സുഖസൗകര്യങ്ങൾക്കായി കൂടുതൽ ചെലവ് ചെയ്യും. ദുശ്ശീലങ്ങളുള്ളവർ സ്വയം നിയന്ത്രിക്കണം. വലിയ മുതൽമുടക്കി പുതിയ കാര്യങ്ങൾ ഇപ്പോൾ തുടങ്ങരുത്. ജോലി ഉപേക്ഷിച്ചാൽ പുതിയതുകിട്ടാൻ വൈകുന്നതാണ്. വെള്ളി, ശനി ദിവസങ്ങളിൽ കരുതൽ വേണം.

ഉത്രട്ടാതി

ശനിയും ശുക്രനും ഉത്രട്ടാതിയിൽ സഞ്ചരിക്കുന്നു. പൊതുവേ സമ്മർദ്ദങ്ങൾ പിടിമുറുക്കും. ഉത്തരവാദിത്വങ്ങൾ നിർവഹിക്കുന്നതിൽ തടസ്സങ്ങളുണ്ടാവാം. ജന്മരാശിയിൽ രാഹുവും തുടരുകയാൽ ദുർബോധനങ്ങൾക്ക് വിധേയരാവേണ്ടി വരാം. പഞ്ചമത്തിലെ ചൊവ്വ അനാവശ്യമായ കാര്യങ്ങളിൽ ശാഠ്യമുണ്ടാക്കും. ദാമ്പത്യത്തിൽ പാരസ്പര്യം കുറയുന്നതാണ്. ചില തെറ്റിദ്ധാരണകൾ ഗൃഹാന്തരീക്ഷത്തെ കലുഷമാക്കാം. ധനപരമായി സ്വസ്ഥതയുണ്ടാവും. വായ്പകളുടെ തിരിച്ചടവ് മുടങ്ങില്ല. അന്യനാട്ടിൽ കഴിയുന്നവർക്ക് നാട്ടിലെത്താൻ കാത്തിരിക്കേണ്ടിവരും.

രേവതി

സമയബന്ധിതമായി പ്രവർത്തിക്കാൻ മടിക്കും. ചിലതൊക്കെ പിന്നീടത്തേക്ക് മാറ്റിവെക്കുന്നതാണ്. വാതരോഗം ഉപദ്രവിക്കാം. സാമ്പത്തികമായ അമളി പിണയാനിടയുണ്ട്. അനർഹർക്ക് അവസരം കിട്ടുന്നതിൽ ക്ഷോഭിച്ചേക്കും. പ്രതിഷേധം അതിരുകവിയരുത്. പിതൃസ്വത്തിന്മേൽ തർക്കങ്ങൾ ഉടലെടുക്കാനിടയുണ്ട്. ജീവകാരുണ്യത്തിന് സമയം കണ്ടെത്തുന്നതാണ്. കുടുംബത്തിൻ്റെ, ജന്മനാട്ടിൻ്റെ വേരുകൾ അന്വേഷിക്കുന്നതിൽ ഔത്സുക്യം ഉണ്ടാവും. ആഢംബരച്ചെലവുകൾ വന്നേക്കും. മകൻ്റെ പഠനാവശ്യത്തിന് കരുതൽ ധനമുണ്ടാവും.

Read More

• Weekly Horoscope (May 04 - May 10, 2025): ഈ ആഴ്‌ച നിങ്ങൾക്കെങ്ങനെ?
• Jupiter Transit 2025: വ്യാഴം രാശിമാറുന്നു, ഗുണം ഏതൊക്കെ കൂറുകൾക്ക്? അശ്വതി മുതൽ രേവതിവരെ
• Medam Month Horoscope: മേട മാസത്തെ സമ്പൂർണ നക്ഷത്രഫലം, അശ്വതി മുതൽ രേവതിവരെ
• Vishu Phalam 2025: സമ്പൂർണ വിഷു ഫലം; അശ്വതി മുതൽ രേവതി വരെ, എസ് ശ്രീനിവാസ അയ്യർ എഴുതുന്നു
• Vishu Phalam 2025: വിഷു ഫലം; അശ്വതി മുതൽ രേവതി വരെ, സി വി ഗോവിന്ദൻ എടപ്പാൾ എഴുതുന്നു