ഭക്ഷണം 10 മിനിറ്റിനുള്ളിൽ കഴിച്ചാൽ ശരീരത്തിന് എന്ത് സംഭവിക്കുമെന്ന് അറിയാമോ?

തിരക്കേറിയ സമയങ്ങളിൽ ഭക്ഷണം പെട്ടെന്ന് കഴിച്ചു തീർക്കാനാണ് പലരും ശ്രമിക്കാറുള്ളത്. പലരും 10 മിനിറ്റോ അതിൽ കുറവോ സമയത്തിനുള്ളിൽ ഭക്ഷണം കഴിച്ചു തീർക്കുന്നു. എന്നാൽ, ഇത് ശരീരത്തിന് ദോഷം ചെയ്യുമെന്ന് ചിന്തിച്ചിട്ടുണ്ടോ?. ഈ ശീലം ദഹനത്തെയും, ഉപാപചയപ്രവർത്തനത്തെയും, മൊത്തത്തിലുള്ള ആരോഗ്യത്തെയും ദോഷകരമായി ബാധിക്കും. വേഗത്തിൽ ഭക്ഷണം കഴിക്കുന്നത് സമയം ലാഭിക്കുമെങ്കിലും, അത് ദീർഘകാല ആരോഗ്യപ്രശ്നങ്ങൾക്ക് കാരണമായേക്കാം. വേഗത്തിൽ ഭക്ഷണം കഴിക്കുമ്പോൾ ശരീരത്തിന് എന്ത് സംഭവിക്കുന്നുവെന്നതിനെക്കുറിച്ച് വിദഗ്ധർ സംസാരിക്കുന്നു.

10 മിനിറ്റോ അതിൽ കുറവോ സമയത്തിനുള്ളിൽ ഭക്ഷണം കഴിക്കുന്നത് ദഹന പ്രക്രിയയെയും പോഷകങ്ങളുടെ ആഗിരണത്തെയും തടസപ്പെടുത്തുമെന്ന് ന്യൂട്രീഷ്യനിസ്റ്റ് ആശ്ലേഷ ജോഷി പറഞ്ഞു. തിടുക്കത്തിൽ ഭക്ഷണം കഴിക്കുന്നതുകൊണ്ട് അർത്ഥമാക്കുന്നത്, ശരിയായ രീതിയിൽ ഭക്ഷണം ചവയ്ക്കുന്നില്ലെന്നാണ്. ഇതിലൂടെ ഭക്ഷണം വലിയ കഷ്ണങ്ങളായി ആമാശയത്തിലേക്ക് ചെല്ലുന്നു. ഇത് ആമാശയത്തിലും കുടലിലും ഭക്ഷണം വിഘടിക്കാൻ അധിക സമ്മർദം ചെലുത്തുന്നു. ദഹനക്കേട്, വയർ വീർക്കൽ തുടങ്ങിയ പ്രശ്നങ്ങൾക്ക് ഇടയാക്കുമെന്ന് അവർ അഭിപ്രായപ്പെട്ടു. 

ഭക്ഷണം ശരിയായ രീതിയിൽ ചവയ്ക്കാതെ വരുമ്പോൾ, ചവയ്ക്കുന്നതിന്റെ അപര്യാപ്തത നികത്താൻ ഗ്യാസ്ട്രിക് ആസിഡ് ഉൽപാദനം കൂടുന്നു. ഇത് നെഞ്ചെരിച്ചിലും അസ്വസ്ഥതയും ഉണ്ടാക്കാൻ സാധ്യതയുണ്ടെന്ന് ഡയറ്റീഷ്യൻ കനിക മൽഹോത്ര അഭിപ്രായപ്പെട്ടു. മാത്രമല്ല, വയറു നിറയുന്നതിനെ സൂചിപ്പിക്കുന്ന ലെപ്റ്റിൻ പോലുള്ള ഹോർമോണുകൾ സജീവമാകാൻ 20-30 മിനിറ്റ് എടുക്കും. വേഗത്തിൽ ഭക്ഷണം കഴിക്കുമ്പോൾ ഹോർമോൺ സജീവമാകാൻ വേണ്ടത്ര സമയം ലഭിക്കാതെ വരികയും അമിതമായി ഭക്ഷണം കഴിക്കുന്നതിനും പോഷകങ്ങൾ ആഗിരണം ചെയ്യുന്നത് തടസപ്പെടാനും കാരണമാകുന്നു. ഇത് പൊണ്ണത്തടി, മെറ്റബോളിക് സിൻഡ്രോം പോലുള്ള ദീർഘകാല ആരോഗ്യ പ്രശ്നങ്ങൾക്ക് കാരണമാകുമെന്ന് അവർ വ്യക്തമാക്കി.

വളരെ വേഗത്തിൽ ഭക്ഷണം കഴിക്കുന്നത് ശരീര ഭാരം കൂടൽ, ആസിഡ് റിഫ്ലക്സ്, മെറ്റബോളിക് ഇംബാലൻസ് തുടങ്ങിയ ദീർഘകാല ആരോഗ്യ പ്രശ്നങ്ങൾക്ക് കാരണമാകും. ദഹനക്കേട്, വയർ വീർക്കൽ എന്നിവയ്ക്കുള്ള സാധ്യത വർധിപ്പിക്കുന്നുവെന്ന് മൽഹോത്ര പറഞ്ഞു. ടിവി കാണുന്നതിനിടയിലോ, ജോലി ചെയ്യുന്നതിനിടയിലോ, ഫോണിൽ സ്ക്രോൾ ചെയ്യുന്നതിനിടയിലോ ഭക്ഷണം കഴിക്കുന്നത് ഭക്ഷണ സമയത്തെക്കുറിച്ചുള്ള അവബോധം കുറയ്ക്കും, ഇത് വ്യക്തികൾ അറിയാതെ തന്നെ വേഗത്തിൽ ഭക്ഷണം കഴിക്കാൻ ഇടയാക്കുമെന്ന് ജോഷി പറഞ്ഞു.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• ഡയറ്റ് നോക്കാതെ ശരീര ഭാരം നിലനിർത്താം, 6 വഴികൾ
• പ്രഭാതഭക്ഷണത്തിനൊപ്പം ജ്യൂസ് വേണ്ട, ഗുണത്തെക്കാളേറെ ദോഷം
• വടിവൊത്ത ശരീരം തിരികെ നേടാം, കട്ടൻ കാപ്പി കുടിക്കൂ
• നന്നായി ഉറങ്ങാം, കൊളസ്ട്രോൾ കുറയ്ക്കാം; രാത്രിയിൽ 1 ഗ്ലാസ് ബീറ്റ്റൂട്ട് ജ്യൂസ് കുടിക്കൂ