ഒരു മാസം ദിവസവും രാവിലെ കട്ടൻ കാപ്പി കുടിച്ചാൽ എന്ത് സംഭവിക്കും?

ഒരു കപ്പ് കട്ടൻ കാപ്പി കുടിച്ചുകൊണ്ട് ദിവസം ആരംഭിക്കുക എന്നത് പലരുടെയും ദിനചര്യയുടെ ഭാഗമാണ്. പെട്ടെന്ന് ഊർജം വർധിപ്പിക്കാൻ ആഗ്രഹിക്കുന്നവർക്കും അല്ലെങ്കിൽ ഉപാപചയപ്രവർത്തനം പുനരാരംഭിക്കാൻ ആഗ്രഹിക്കുന്നവർക്കും കാപ്പി നല്ലൊരു ഓപ്ഷനാണ്. എന്നാൽ, ഒരു മാസത്തേക്ക് എല്ലാ ദിവസവും രാവിലെ കട്ടൻ കാപ്പി കുടിക്കുമ്പോൾ ശരീരത്തിന് എന്താണ് സംഭവിക്കുന്നത്?.

"ഒരു മാസത്തേക്ക് ദിവസവും കട്ടൻ കാപ്പി കുടിക്കുന്നത് നിരവധി ആരോഗ്യ ഗുണങ്ങൾ നൽകും. അവ ആന്റിഓക്‌സിഡന്റുകൾ, കഫീൻ, ബി വിറ്റാമിനുകൾ പോലുള്ള അവശ്യ പോഷകങ്ങൾ നിറഞ്ഞിരിക്കുന്നു," ബെംഗളൂരുവിലെ ഗ്യാസ്ട്രോഎൻട്രോളജിസ്റ്റ് ഡോ. പ്രണവ് ഹൊന്നവാര ശ്രീനിവാസൻ ഇന്ത്യൻ എക്സ്പ്രസ് ഡോട് കോമിനോട് പറഞ്ഞു.

മാനസിക ജാഗ്രതയും ഏകാഗ്രതയും: കട്ടൻ കാപ്പി കുടിക്കുന്നതു മൂലം പെട്ടെന്ന് ലഭിക്കുന്ന ഗുണങ്ങളിലൊന്ന് മാനസിക ജാഗ്രതയിലുള്ള സ്വാധീനമാണ്. കാപ്പിയിലെ കഫീൻ ഒരു കേന്ദ്ര നാഡീവ്യൂഹ ഉത്തേജകമായി പ്രവർത്തിക്കുകയും തലച്ചോറിലെ അഡിനോസിൻ റിസപ്റ്ററുകളെ തടയുകയും ഡോപാമൈൻ, നോർപിനെഫ്രിൻ തുടങ്ങിയ ന്യൂറോ ട്രാൻസ്മിറ്ററുകളുടെ ഉത്പാദനം പ്രോത്സാഹിപ്പിക്കുകയും ചെയ്യുന്നു.

മെച്ചപ്പെട്ട ശാരീരിക പ്രകടനം: കഫീൻ രക്തത്തിലെ അഡ്രിനാലിൻ അളവ് വർധിപ്പിക്കുന്നു. ഇത് ശാരീരിക പ്രകടനം വർധിപ്പിക്കും.

ഉപാപചയപ്രവർത്തനവും കൊഴുപ്പ് കത്തുന്നതും വർധിപ്പിക്കും: കട്ടൻ കാപ്പി ഉപാപചയ നിരക്ക് 3-11% വർധിപ്പിക്കുമെന്ന് തെളിയിക്കപ്പെട്ടിട്ടുണ്ട്, ഇത് കൊഴുപ്പ് കൂടുതൽ കാര്യക്ഷമമായി കത്തിക്കാൻ സഹായിക്കും.

ആന്റിഓക്‌സിഡന്റുകളുടെ സമ്പന്നമായ ഉറവിടം: കാപ്പിയിൽ ആന്റിഓക്‌സിഡന്റുകൾ അടങ്ങിയിട്ടുണ്ട്. ഇത് ശരീരത്തിലെ ഫ്രീ റാഡിക്കലുകളെ ചെറുക്കാൻ സഹായിക്കുന്നു. ഈ ആന്റിഓക്‌സിഡന്റുകൾ വീക്കം കുറയ്ക്കുകയും മൊത്തത്തിലുള്ള കോശാരോഗ്യത്തെ സഹായിക്കുകയും ചെയ്യും.

കാപ്പി കുടിക്കുന്ന സമയത്തിൽ ശ്രദ്ധ വേണം. ഒരു മാസത്തേക്ക് സമയം പരിഗണിക്കാതെ ദിവസവും കാപ്പി കുടിച്ചാൽ ഉറക്കത്തെയും മൊത്തത്തിലുള്ള ആരോഗ്യത്തെയും ബാധിക്കും. ഉറങ്ങുന്നതിന് കുറഞ്ഞത് 6 മണിക്കൂർ മുമ്പെങ്കിലും കാപ്പി കുടിക്കുന്നത് ഒഴിവാക്കുക. കട്ടൻ കാപ്പിയുടെ ഗുണങ്ങൾ ആസ്വദിക്കുന്നതിന് എപ്പോഴും മിതമായ അളവിൽ കുടിക്കുക.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• 6 ദിവസം കൊണ്ട് കുറച്ചത് 4 കിലോ; പുതിയ ഡയറ്റ് പരിചയപ്പെടുത്തി മോഡൽ
• ദിവസവും രാവിലെ ഇതിൽ ഒരു ജ്യൂസ് കുടിച്ചു നോക്കൂ, കൊളസ്ട്രോൾ കുറയ്ക്കാൻ സഹായിക്കും
• ചായയോ കാപ്പിയോ കുടിച്ചാൽ തലവേദന മാറുമോ?
• മരുന്ന് മാത്രമല്ല കൊളസ്ട്രോൾ കൈപ്പിടിയിലാക്കാനുള്ള മറ്റ് വഴികൾ അറിയാമോ?