ചായയോ കാപ്പിയോ കുടിച്ചാൽ തലവേദന മാറുമോ?

തലവേദന പലരെയും ശാരീരികമായും മാനസികമായും ബുദ്ധിമുട്ടിക്കാറുണ്ട്. പെട്ടെന്നുണ്ടാകുന്ന തലവേദന അസ്വസ്ഥത ഉളവാക്കുന്ന ഒന്നാണ്. ചിലർ വേദന അകറ്റാനായി മരുന്നുകളെ ആശ്രയിക്കാറുണ്ട്. മറ്റു ചിലരാകട്ടെ, തലവേദന അകറ്റാനായി ഒരു കപ്പ് ചായയോ കാപ്പിയോ കുടിക്കുന്നു. കഫീൻ പ്രേമികൾക്ക് ഈ രണ്ട് പാനീയങ്ങളും ആശ്വാസം നൽകുന്നതായി തോന്നിയേക്കാം. എന്നാൽ, യഥാർത്ഥത്തിൽ ചായയോ കാപ്പിയോ കുടിച്ചാൽ തലവേദന മാറുമോ? അതോ കൂടുതൽ വഷളാകുമോ?. ഡയറ്റീഷ്യൻ സേജൽ അഹൂജ അടുത്തിടെ ഇൻസ്റ്റാഗ്രാമിൽ ഇതിനെക്കുറിച്ച് വിശദീകരിക്കുകയുണ്ടായി. 

സേജലിന്റെ അഭിപ്രായത്തിൽ, കഫീൻ താൽക്കാലിക ആശ്വാസം നൽകുന്നു. എന്നാൽ, ദീർഘകാലാടിസ്ഥാനത്തിൽ തലവേദന കൂടുതൽ വഷളാക്കും. സമ്മർദ്ദം, ഉത്കണ്ഠ, നിർജ്ജലീകരണം അല്ലെങ്കിൽ മറ്റ് ആരോഗ്യ പ്രശ്നങ്ങൾ പോലുള്ള വിവിധ ഘടകങ്ങൾ തലവേദനയ്ക്ക് കാരണമാകാറുണ്ട്. തലവേദന നിർജലീകരണം മൂലമാണെങ്കിൽ, ചായയോ കാപ്പിയോ കുടിക്കുന്നത് കൂടുതൽ വഷളാക്കും, കാരണം കഫീന് നിർജ്ജലീകരണ ഇഫക്ടുണ്ട്. അങ്ങനെയെങ്കിൽ, പെട്ടെന്ന് ഊർജവും ആശ്വാസവും അനുഭവപ്പെടുമെങ്കിലും, ആ തലവേദന തിരിച്ചുവരാൻ അധികം സമയമെടുക്കില്ല.

തലവേദനയ്ക്ക് മറ്റ് ഏതൊക്കെ പാനീയങ്ങൾ കുടിക്കാം?

തലവേദന ഒഴിവാക്കാൻ, ചായയ്ക്കും കാപ്പിക്കും പകരം മറ്റ് മാർഗങ്ങൾ പരിഗണിക്കാവുന്നതാണ്. ധാരാളം വെള്ളമോ മറ്റ് ദ്രാവകങ്ങളോ കുടിക്കുക. ജിഞ്ചർ ടീ, ഗ്രീൻ ടീ പോലുള്ള മാർഗങ്ങൾ പരീക്ഷിക്കുക. ഒരു ചെറിയ കഷണം ഡാർക്ക് ചോക്ലേറ്റ് തലവേദന ലക്ഷണങ്ങൾ കുറയ്ക്കാൻ സഹായിച്ചേക്കാം. തലവേദന അസഹനീയമാണെങ്കിൽ ഒരു ആരോഗ്യ വിദഗ്‌ധനെ സമീപിക്കുക.

View this post on Instagram

A post shared by Dt.Sejal Ahuja || DIETITIAN (@nutritics_by_sejal)

എത്ര കപ്പ് ചായയോ കാപ്പിയോ കുടിക്കാം? 

മുതിർന്നവർക്ക് പ്രതിദിനം 400 മില്ലിഗ്രാം വരെ കഫീൻ (ഏകദേശം 4 കപ്പ് കാപ്പി അല്ലെങ്കിൽ 8 കപ്പ് ചായ) സുരക്ഷിതമാണെന്ന് വിദഗ്ധർ അഭിപ്രായപ്പെടുന്നു. എന്നിരുന്നാലും, അസ്വസ്ഥത അനുഭവപ്പെടുകയോ ഇടയ്ക്കിടെ തലവേദന അനുഭവപ്പെടുകയോ ചെയ്താൽ നിങ്ങൾ കഴിക്കുന്ന അളവ് കൂടുതലാണെന്ന് തിരിച്ചറിഞ്ഞ് കഫീൻ ഉപഭോഗം നിയന്ത്രിക്കുക.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• മരുന്ന് മാത്രമല്ല കൊളസ്ട്രോൾ കൈപ്പിടിയിലാക്കാനുള്ള മറ്റ് വഴികൾ അറിയാമോ?
• ബ്ലഡ് ഷുഗർ നിയന്ത്രണത്തിലാക്കാൻ ഏത് ഇനം ഈന്തപ്പഴം തിരഞ്ഞെടുക്കണം?
• 30 മിനിറ്റ് മുൻപേ കഴിക്കാം, ഈ ഭക്ഷണങ്ങൾ പ്രമേഹം നിയന്ത്രിക്കാം
• 30കളിലെ പ്രമേഹം തടയാം, ഈ 5 വഴികൾ ഓർത്തോളൂ