ദിവസവും 3 ലിറ്റർ വെള്ളം കുടിച്ചാൽ ശരീരത്തിന് എന്ത് സംഭവിക്കും?

ജീവൻ നിലനിർത്താൻ വെള്ളം അത്യാവശ്യമാണ്. ശരീരത്തിന്റെ വിവിധ പ്രവർത്തനങ്ങൾക്ക് വെള്ളം ആവശ്യമാണ്. എന്നാൽ, ദിവസവും എത്ര വെള്ളം കുടിക്കണമെന്ന് അറിയാമോ?. വ്യക്തിഗത ആവശ്യങ്ങൾക്ക് അനുസരിച്ച് വെള്ളം കുടിക്കുന്ന അളവിൽ വ്യത്യാസം വരാമെന്ന് ആരോഗ്യ വിദഗ്ധർ അഭിപ്രായപ്പെടുന്നു. ഒരു ദിവസം മൂന്ന് ലിറ്റർ വെള്ളം കുടിച്ചാൽ ശരീരത്തിന് എന്ത് സംഭവിക്കുമെന്ന് അറിയാം.

ചൂടുള്ള കാലാവസ്ഥയിലോ കഠിനമായ ജോലികളിൽ ഏർപ്പെടുമ്പോഴോ ദിവസവും മൂന്ന് ലിറ്റർ വെള്ളം കുടിക്കുന്നത് ശരീരത്തിൽ ജലാംശം നിലനിർത്താൻ സഹായിക്കും. ഇത് താപനില നിയന്ത്രണം, ജോയിന്റ് ലൂബ്രിക്കേഷൻ, ന്യൂട്രിയന്റ് ട്രാൻസ്പോർട്ടേഷൻ തുടങ്ങിയ ശാരീരിക പ്രവർത്തനങ്ങൾക്ക് ഗുണം ചെയ്യും. ഈ അളവിൽ വെള്ളം കുടിക്കുന്നത് വൃക്കകളുടെ പ്രവർത്തനത്തെ കാര്യക്ഷമമാക്കുകയും, വിഷവസ്തുക്കളെ ഇല്ലാതാക്കുകയും, വൃക്കയിൽ കല്ലുണ്ടാകാനുള്ള സാധ്യത കുറയ്ക്കുകയും ചെയ്യുന്നുവെന്ന് നോയിഡയിലെ ഡോ. ഉപേന്ദ്ര സിങ് പറഞ്ഞു.

Also Read: അന്ന് 150 കിലോ, ഇന്ന് 65; വണ്ണം കുറയ്ക്കുന്നവർ ഈ 3 തെറ്റുകൾ ചെയ്യരുതെന്ന് യുവതി

എന്നിരുന്നാലും, അമിതമായി വെള്ളം കുടിക്കുന്നത് ചിലപ്പോൾ രക്തത്തിലെ സോഡിയം നേർപ്പിക്കുന്ന ഹൈപ്പോനാട്രീമിയ എന്നറിയപ്പെടുന്ന ഒരു അവസ്ഥയിലേക്ക് നയിച്ചേക്കാം. ഇത് ഓക്കാനം, തലവേദന, ചിലരിൽ അപസ്മാരം അല്ലെങ്കിൽ കോമ തുടങ്ങിയ ലക്ഷണങ്ങൾക്ക് കാരണമാകും. മൂന്ന് ലിറ്റർ വെള്ളം ചിലർക്ക് ഗുണം ചെയ്തേക്കാം. എന്നാൽ വ്യക്തിഗത ആവശ്യങ്ങൾ, ജീവിതശൈലി, കാലാവസ്ഥ എന്നിവയെ അടിസ്ഥാനമാക്കി വെള്ളം കുടിക്കുന്ന അളവ് നിയന്ത്രിക്കണമെന്ന് ഇന്ദ്രപ്രസ്ഥ അപ്പോളോ ആശുപത്രിയിലെ ഡോ. രാകേഷ് ഗുപ്ത അഭിപ്രായപ്പെട്ടു.

ദിവസവും വെള്ളം എത്ര കുടിക്കണം

പുരുഷന്മാർക്ക് ഏകദേശം 3.7 ലിറ്ററും സ്ത്രീകൾക്ക് 2.7 ലിറ്ററും (ഭക്ഷണം ഉൾപ്പെടെ എല്ലാ സ്രോതസ്സുകളിൽ നിന്നും) വെള്ളമാണ് ഒരു ദിവസം ശുപാർശ ചെയ്യുന്നത്. എന്നാൽ, ശരീര ഭാരം, കാലാവസ്ഥ, ജോലി എന്നിവയെ അടിസ്ഥാനമാക്കി ഈ അളവിൽ വ്യത്യാസം വരാമെന്ന് ആരോഗ്യ വിദഗ്ധർ അഭിപ്രായപ്പെട്ടു. ഒരു കിലോഗ്രാം ശരീരഭാരത്തിന് ഏകദേശം 30-35 മില്ലി ലിറ്റർ വെള്ളം കുടിക്കുക എന്നതാണ് ശരിയായ രീതിയെന്ന് ഡോ. ഗുപ്ത പറഞ്ഞു. ഉദാഹരണത്തിന്, 70 കിലോഗ്രാം ഭാരമുള്ള ഒരാൾക്ക് പ്രതിദിനം ഏകദേശം 2.1 മുതൽ 2.5 ലിറ്റർ വരെ വെള്ളം ആവശ്യമായി വരും. കൂടുതൽ വ്യായാമം ചെയ്യുന്നവരോ ചൂടുള്ള കാലാവസ്ഥയിൽ ജീവിക്കുന്നവരോ ആയവർക്ക് അധിക ജലാംശം ആവശ്യമായി വന്നേക്കാമെന്ന് അദ്ദേഹം വിശദീകരിച്ചു.

Also Read: ഉലുവ വെള്ളം കുടിച്ചാൽ ഷുഗർ കുറയുമോ?

അമിതമായി വെള്ളം കുടിക്കുന്നത് ദോഷകരമാകുമോ?

അമിതമായി വെള്ളം കുടിക്കുന്നത് അപകടകരമാണ്. അമിത ജലാംശം ഹൈപ്പോനാട്രീമിയയിലേക്ക് നയിച്ചേക്കാം. രക്തത്തിലെ സോഡിയത്തിന്റെ അളവ് നേർപ്പിക്കുകയും വിവിധ ആരോഗ്യ പ്രശ്നങ്ങൾക്ക് കാരണമാവുകയും ചെയ്യും. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക. 

Read More

• ശരീര ഭാരം നിയന്ത്രിക്കും, നല്ല ഉറക്കം തരും; രാത്രിയിൽ 1 കപ്പ് ഗ്രീൻ ടീ കുടിക്കൂ
• രാവിലെ നാരങ്ങ വെള്ളം, രാത്രി സൂപ്പ്; 40 കാരിയായ സോനം കപൂറിന്റെ ഒരു ദിവസത്തെ ഭക്ഷണം