വാളൻ പുളി കഴിച്ച് ശരീര ഭാരം കുറയ്ക്കാം; പ്രമേഹമുള്ളവർക്കും ഗുണകരം

വിവിധ ഭക്ഷണങ്ങൾ പാചകം ചെയ്യാനായി നമ്മുടെയൊക്കെ വീടുകളിൽ അമ്മമാർ വാളൻ പുളി ഉപയോഗിക്കാറുണ്ട്. ഭരണിക്കുള്ളിൽ സൂക്ഷിച്ച വാളൻ പുളി കട്ടെടുത്ത്, അതിൽ കുറച്ച് പഞ്ചസാര ചേർത്ത് കഴിച്ച ബാല്യം നമ്മളിൽ ചിലർക്കെങ്കിലും പറയാൻ ഉണ്ടാകും.

ഭക്ഷണത്തിന് രുചി കൂട്ടുന്നതിന് മാത്രമല്ല, ചില ആരോഗ്യ ഗുണങ്ങളും അവ നൽകുന്നുണ്ട്. പ്രതിരോധശേഷി വർധിപ്പിക്കുന്നത് മുതൽ കരളിനെയും ഹൃദയത്തെയും രോഗങ്ങളിൽ നിന്ന് സംരക്ഷിക്കുന്നതുവരെയുള്ള ആരോഗ്യ ഗുണങ്ങൾ വാളൻ പുളി നൽകുന്നുണ്ട്. ആരോഗ്യ ഗുണങ്ങൾ ഏറെയാണെങ്കിലും വാളൻ പുളി അമിതമായി കഴിക്കുന്നത് ആരോഗ്യത്തെ ദോഷകരമായി ബാധിക്കും. 

ശരീര ഭാരം കുറയ്ക്കും

വാളൻ പുളിയിൽ നാരുകൾ അടങ്ങിയിട്ടുണ്ട്. എന്നാൽ, കൊഴുപ്പ് അടങ്ങിയിട്ടില്ല. ഫ്ലേവനോയ്ഡുകളും പോളിഫെനോളുകളും അടങ്ങിയിരിക്കുന്നതിനാൽ ദിവസവും വാളൻ പുളി കഴിക്കുന്നത് ശരീരഭാരം കുറയ്ക്കാൻ സഹായിക്കുമെന്ന് പഠനങ്ങൾ ചൂണ്ടിക്കാണിക്കുന്നു. ഇവയിൽ ഹൈഡ്രോക്സിസിട്രിക് ആസിഡ് അടങ്ങിയിട്ടുണ്ട്. ഇത് കാർബോഹൈഡ്രേറ്റിനെ കൊഴുപ്പാക്കി മാറ്റുന്ന എൻസൈമായ അമൈലേസിനെ തടഞ്ഞുകൊണ്ട് വിശപ്പ് കുറയ്ക്കുന്നു.

പ്രമേഹം നിയന്ത്രിക്കാൻ ഫലപ്രദം

പുളിങ്കുരു വിത്ത് രക്തത്തിലെ പഞ്ചസാരയുടെ അളവ് സ്ഥിരപ്പെടുത്തുകയും പ്രമേഹമുള്ളവരിൽ പാൻക്രിയാറ്റിക് ടിഷ്യുവിന്റെ കേടുപാടുകൾ മാറ്റുകയും ചെയ്യുമെന്ന് പറയപ്പെടുന്നു. രക്തത്തിലെ പഞ്ചസാരയുടെ അളവ് കുറയ്ക്കുമെന്ന് തെളിയിക്കപ്പെട്ടിട്ടുള്ള ആൽഫ-അമൈലേസ് എന്ന എൻസൈമും വാളൻ പുളിയിലുണ്ട്.

ദഹനത്തെ സഹായിക്കുന്നു

ടാർടാറിക് ആസിഡ്, മാലിക് ആസിഡ്, പൊട്ടാസ്യം എന്നിവ വാളൻ പുളിയിൽ അടങ്ങിയിട്ടുണ്ട്. മലബന്ധം ഒഴിവാക്കാൻ വാളൻ പുളി ഉപയോഗിക്കാറുണ്ട്. 

ഹൃദയാരോഗ്യത്തിന് സഹായകരം

പുളിയിൽ അടങ്ങിയിരിക്കുന്ന ഫ്ലേവനോയ്ഡുകൾ എൽഡിഎൽ കൊളസ്ട്രോൾ കുറയ്ക്കുകയും എച്ച്ഡിഎൽ കൊളസ്ട്രോൾ കൂട്ടുകയും ചെയ്യുന്നു, ഇവയിൽ ഉയർന്ന പൊട്ടാസ്യം അടങ്ങിയിട്ടുണ്ട്. രക്തസമ്മർദം നിയന്ത്രിക്കാൻ സഹായിക്കും.

കരളിനെ സംരക്ഷിക്കുന്നു

കരളിനെ സംരക്ഷിക്കാൻ പുളി സഹായിക്കുന്നുണ്ട്. കലോറി അടങ്ങിയ ഭക്ഷണക്രമം ഫാറ്റി ലിവറിന് കാരണമാകും. ദിവസവും വാളൻ പുളി കഴിക്കുന്നത് ഈ രോഗാവസ്ഥയിൽ മാറ്റം ഉണ്ടാക്കുമെന്ന് പഠനങ്ങൾ കാണിക്കുന്നു.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• ശരീരഭാരം നിയന്ത്രിക്കാം ഈ 5 പാനീയങ്ങൾ കുടിക്കൂ
• രാവിലെ നെയ്യ് ചേർത്ത വെള്ളം കുടിച്ചാലുള്ള അത്ഭുതകരമായ ഗുണങ്ങൾ
• ഭക്ഷണശേഷം എപ്പോഴും വയർ വീർക്കുന്നുണ്ടോ? ഈ തെറ്റുകൾ തിരിച്ചറിയൂ
• വ്യായാമം ചെയ്യാൻ സമയം കിട്ടുന്നില്ലേ? സ്ലിം ആകാൻ ഈ 5 വഴികൾ നോക്കൂ