മുട്ട കഴിച്ചാൽ കൊളസ്ട്രോളോ? ടെൻഷനടിക്കേണ്ട ആവശ്യമുണ്ടോ?

അവശ്യ പോഷകങ്ങളുടെ ഉറവിടമായ മുട്ട കഴിക്കണമെന്ന് പറയുമ്പോൾ, പലരും കൊളസ്ട്രോളിനെക്കുറിച്ചോർത്ത് ആശങ്കാകുലരാണ്. പതിവായി മുട്ട കഴിക്കുന്നത് നല്ലതാണോ ചീത്തയാണോയെന്ന കാര്യത്തിൽ ആളുകൾ ഇപ്പോഴും ആശങ്കാകുലരാണ്. 

ആളുകൾ മുട്ട കഴിക്കുന്നത് കുറയ്ക്കുന്നതിന്റെ പ്രധാന കാരണങ്ങളിലൊന്ന് കൊളസ്ട്രോൾ സംബന്ധിച്ച ആശങ്കകളാണ്. മുട്ടകൾ രക്തത്തിലെ കൊളസ്ട്രോളിന്റെ അളവ് വർദ്ധിപ്പിക്കുകയും ഹൃദ്രോഗ സാധ്യത വർധിപ്പിക്കുകയും ചെയ്യുമെന്ന് പൊതുവെ കരുതപ്പെട്ടിരുന്നു. എന്നാൽ, മുട്ടയിൽ നിന്നുള്ള കൊളസ്ട്രോൾ രക്തത്തിലെ കൊളസ്ട്രോളിന്റെ അളവിൽ കാര്യമായ സ്വാധീനം ചെലുത്തുന്നില്ലെന്ന് ഇപ്പോൾ അഭിപ്രായം ഉയർന്നിട്ടുണ്ട്. 

ഉയർന്ന നിലവാരമുള്ള പ്രോട്ടീൻ, വിറ്റാമിനുകൾ (B12, D, A), ധാതുക്കൾ, കണ്ണിന്റെ ആരോഗ്യത്തെ പിന്തുണയ്ക്കുന്ന ല്യൂട്ടിൻ, സിയാക്സാന്തിൻ പോലുള്ള ആന്റിഓക്‌സിഡന്റുകൾ എന്നിവയുൾപ്പെടെയുള്ള അവശ്യ പോഷകങ്ങൾ മുട്ടയിൽ അടങ്ങിയിട്ടുണ്ട്. മുട്ടയിൽ കൊഴുപ്പ് കുറവാണ്, ഇത് അവയെ സമീകൃത പോഷകാഹാരത്തിന് മികച്ച ഓപ്ഷനാക്കി മാറ്റുന്നു. പേശികളുടെ ബലം നിലനിർത്താൻ ഉയർന്ന പ്രോട്ടീൻ ഭക്ഷണക്രമം ആവശ്യമുള്ള പ്രായമായവർക്ക് മുട്ട നല്ലതാണ്.

ഇതൊക്കെയാണെങ്കിലും പലരും ഇപ്പോഴും മുട്ട അനാരോഗ്യകരമാണെന്ന് വിശ്വസിക്കുന്നു. മിക്ക ആളുകൾക്കും, മുട്ട വളരെ പോഷകസമൃദ്ധമായ ഒരു ഭക്ഷണമാണ്. മിതമായ അളവിൽ സുരക്ഷിതമായി കഴിക്കാം. എന്നിരുന്നാലും, പ്രമേഹം അല്ലെങ്കിൽ ഹൃദയസംബന്ധമായ പ്രശ്നമുള്ള വ്യക്തികൾ മുട്ട ഭക്ഷണത്തിൽ ഉൾപ്പെടുത്തുന്നതിനു മുൻപ് ഒരു ഡോക്ടറെ സമീപിക്കണം. 

പ്രമേഹമുള്ളവർക്ക് മുട്ട കഴിക്കാമോ?

പ്രമേഹമുള്ളവർക്ക് മുട്ട ഡയറ്റിൽ ഉൾപ്പെടുത്താൻ കഴിയുമോയെന്ന സംശയം പലർക്കുമുണ്ട്. മിതമായ അളവിൽ മുട്ട കഴിക്കുന്നത് പ്രമേഹമുള്ളവർക്ക് ഗുണം ചെയ്യും. പ്രമേഹ ചികിത്സയുടെ പ്രധാന ഭാഗമാണ് രക്തത്തിലെ പഞ്ചസാരയുടെ അളവ് നിയന്ത്രിക്കുന്നത്. രക്തത്തിലെ പഞ്ചസാരയുടെ അളവിനെ സാരമായി ബാധിക്കുന്ന ശുദ്ധീകരിച്ച കാർബോഹൈഡ്രേറ്റുകളിൽ നിന്ന് വ്യത്യസ്തമായി, മുട്ടയിൽ കാർബോഹൈഡ്രേറ്റ് കുറവാണ്, പ്രോട്ടീനും ആരോഗ്യകരമായ കൊഴുപ്പും കൂടുതലാണ്. ഈ ഗുണങ്ങൾ അർത്ഥമാക്കുന്നത് മുട്ട കഴിക്കുന്നത് രക്തത്തിലെ പഞ്ചസാരയുടെ വർധനവിന് കാരണമാകില്ലെന്നാണ്. അതിനാൽ, പ്രമേഹമുള്ളവർക്ക് അനുയോജ്യമായ ഭക്ഷണമാണ്.

മുട്ട കഴിക്കാമെങ്കിലും, അത് തയ്യാറാക്കുന്ന രീതി പ്രധാനമാണ്. മുട്ട പൊരിച്ചതോ, ഉയർന്ന കൊഴുപ്പ് അല്ലെങ്കിൽ പഞ്ചസാര അടങ്ങിയ ഭക്ഷണങ്ങൾക്കൊപ്പം വിളമ്പുന്ന മുട്ടകളോ പ്രമേഹ പ്രശ്നങ്ങൾ സങ്കീർണമാക്കും. എപ്പോഴും പച്ചക്കറികൾ, പഴങ്ങൾ അല്ലെങ്കിൽ ധാന്യങ്ങൾ പോലുള്ള ഉയർന്ന നാരുകളുള്ള ഭക്ഷണങ്ങളുമായി മുട്ട ജോഡിയാക്കുക. ആരോഗ്യകരമായ ചേരുവകൾ ചേർത്ത് മുട്ട തയ്യാറാക്കുന്നതിലൂടെയും നാരുകൾ അടങ്ങിയ ഭക്ഷണങ്ങളുമായി സംയോജിപ്പിക്കുന്നതിലൂടെയും, രക്തത്തിലെ പഞ്ചസാരയുടെ അളവ് വർധിപ്പിക്കാതെയും കൊളസ്ട്രോൾ നിയന്ത്രിച്ചും അവയുടെ ഗുണങ്ങൾ ആസ്വദിക്കാൻ കഴിയും. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• ഒരിക്കലും വണ്ണം കൂടില്ല, ജപ്പാൻകാരുടെ ഈ 7 ശീലങ്ങൾ കടമെടുക്കൂ
• മുരിങ്ങയില ചില്ലറക്കാരനല്ല; ആസ്ത്മയിൽനിന്നും ആശ്വാസം, ബ്ലഡ് ഷുഗർ നിയന്ത്രിക്കും
• കറുത്ത മുന്തിരിയാണ് താരം; കാഴ്ച ശക്തി കൂട്ടുന്നു, പ്രതിരോധശേഷി വർധിപ്പിക്കുന്നു
• ശരീര ഭാരം കൂട്ടും; ഈ ശീലങ്ങളെ ശ്രദ്ധിക്കാതെ പോകരുത്