ആർത്തവ വേദന കുറയ്ക്കാം, ഈ 6 ഭക്ഷണങ്ങൾ കഴിക്കാം

ആർത്തവ കാലം ചിലർക്കെങ്കിലും ബുദ്ധിമുട്ടേറിയതായിരിക്കും. അസഹനീയമായ വേദനയാണ് ഈ സമയത്ത് പല സ്ത്രീകളെയും അലട്ടുന്നത്. എന്നാൽ, ആർത്തവ സമയത്ത് ചില ഭക്ഷണങ്ങൾ കഴിക്കുന്നത് വേദന കുറയ്ക്കാൻ സഹായിക്കും. ന്യൂട്രീഷ്യനിസ്റ്റ് റുജുത ദിവേകർ ഇത്തരം ഭക്ഷണങ്ങളെക്കുറിച്ച് ഇൻസ്റ്റഗ്രാമിൽ വിശദീകരിച്ചിട്ടുണ്ട്.

ആർത്തവ കാലം സുഗമമാക്കാൻ ഹീമോഗ്ലോബിൻ അല്ലെങ്കിൽ ഇരുമ്പിന്റെ അളവ് ശരീരത്തിൽ നിലനിർത്തേണ്ടത് അത്യാവശ്യമാണെന്ന് അവർ അഭിപ്രായപ്പെട്ടു. അയൺ സപ്ലിമെന്റുകൾ കഴിക്കുന്നതിനു പകരം ചില ഭക്ഷണങ്ങൾ കഴിക്കുന്നത് ഇരുമ്പിന്റെ അളവ് നിലനിർത്താൻ സഹായിക്കും. ആർത്തവമുള്ള പെൺകുട്ടികൾ ദിവസവും ഒരു റാഗി ലഡ്ഡു കഴിക്കാൻ റുജുത നിർദേശിച്ചു. ഇതിലൂടെ അവരുടെ ശരീരത്തിൽ കാൽസ്യം, ഇരുമ്പ്, വിറ്റാമിൻ ബി, പ്രോട്ടീൻ (അമിനോ ആസിഡുകൾ) എന്നിവ ലഭിക്കും. 

ഒരു പിടി നിലക്കടല എളുപ്പത്തിൽ വിറ്റാമിൻ ബി 6, പ്രോട്ടീൻ, ഫൈബർ, മഗ്നീഷ്യം, ആന്റിഓക്‌സിഡന്റുകൾ, മറ്റ് നിരവധി ധാതുക്കൾ എന്നിവ നൽകുന്നു. ഒരു ഗ്ലാസ് നെല്ലിക്ക ജ്യൂസ് ദിവസവും കുടിക്കുക. വിറ്റാമിൻ സി നൽകാനും ശരീരത്തിലെ ജലാംശം വർദ്ധിപ്പിക്കാനും ഇരുമ്പ് ആഗിരണം ചെയ്യാനും ഇത് സഹായിക്കുന്നു. കോളകൾ, ശീതള പാനീയങ്ങൾ, പായ്ക്ക് ചെയ്ത ജ്യൂസുകൾ എന്നിവ ഒഴിവാക്കുക. ദിവസവും പഴം കഴിക്കുക. ഈന്തപ്പഴം, കറുത്ത ഉണക്കമുന്തിരി എന്നിവ കഴിക്കുക. ചോക്ലേറ്റ് ഒഴിവാക്കാനും അവർ നിർദേശിച്ചു. ആർത്തവ സമയത്തെ വേദന മാറ്റാൻ ഇനി പറയുന്ന കാര്യങ്ങളും ചെയ്യാം.

ഉയർന്ന ഫൈബർ ഭക്ഷണങ്ങൾ ഉൾപ്പെടുത്തുക

ദിവസം മുഴുവൻ നാരുകൾ കൂടുതലുള്ള ഭക്ഷണം കഴിക്കണം. നാരുകളുള്ള പഴങ്ങൾ, പച്ചക്കറികൾ, ധാന്യങ്ങൾ എന്നിവ ദൈനംദിന ഭക്ഷണത്തിൽ ഉൾപ്പെടുത്തുക. ഒരു ദിവസം കുറഞ്ഞത് രണ്ടു പച്ചക്കറികളും കുറഞ്ഞത് ഒരു പഴവും കഴിക്കണം.

ഒമേഗ 3 ഫാറ്റി ആസിഡുകൾ കഴിക്കുക

ചിയ വിത്തുകൾ, ഫ്ളാക്സ് സീഡുകൾ, വാൽനട്ട്, മത്സ്യം ഇവയെല്ലാം ആരോഗ്യകരമായ ഫാറ്റി ആസിഡുകളുടെ നല്ല ഉറവിടങ്ങളാണ്. റോസ്റ്റ് ചെയ്ത സോയാബീൻ, വാൽനട്ട്, ചിയ വിത്തുകൾ, ചണ വിത്തുകൾ എന്നിവയെല്ലാം ഒമേഗ 3 ഫാറ്റി ആസിഡിന്റെ സമ്പന്നമായ ഉറവിടങ്ങളാണ്.

ധാരാളം വിറ്റാമിൻ ഡി നേടുക

വിറ്റാമിൻ ഡിയുടെ കുറവ് ഹോർമോൺ അസന്തുലിതാവസ്ഥയുമായി നേരിട്ട് ബന്ധപ്പെട്ടിരിക്കുന്നു. സൂര്യപ്രകാശത്തിലൂടെ ദൈനംദിന വിറ്റാമിൻ ഡി പരിഹരിക്കാം. ഇതിനു പുറമേ, വിറ്റാഡിൻ ഡി ലഭിക്കാൻ സഹായിച്ചേക്കാവുന്ന ചില ഭക്ഷണങ്ങളും തിരഞ്ഞെടുക്കാം. മുട്ട, തൈര്, പാൽ, കൂൺ, ഓറഞ്ച് ജ്യൂസ്, കാലെ, സ്പിനച്, ചീസ്, സോയാബീൻ എന്നിവയൊക്കെ വിറ്റാമിൻ ഡിയുടെ നല്ല ഉറവിടങ്ങളാണ്.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• Onam Sadya calorie count: ഓണസദ്യയ്ക്കുള്ള ഒരുക്കത്തിലാണോ? കലോറി അറിഞ്ഞ് കഴിച്ചോളൂ
• Onam Sadya: ഓണസദ്യ വിളമ്പേണ്ടത് എങ്ങനെ? അറിയാം
• ലഘുഭക്ഷണമായി നട്സും വിത്തുകളും ഒഴിവാക്കുക, എന്തുകൊണ്ട്?
• കരളിൻ്റെ ആരോഗ്യത്തിനായി കഴിക്കൂ ഈ ഭക്ഷണങ്ങൾ
• ബ്രോക്കോളിയോ കോളിഫ്ലവറോ? ആരോഗ്യത്തിന് ഏതാണ് നല്ലത്