പ്രമേഹം നിയന്ത്രിക്കാൻ പാടുപെടേണ്ട, ഈ രണ്ട് സിംപിൾ ശീലങ്ങൾ സഹായിക്കും

പ്രമേഹം നിയന്ത്രിക്കാൻ ജീവിതശൈലിയിലെയും ഡയറ്റിലെയും ചില ശീലങ്ങൾ സഹായിക്കും. എന്നാൽ, സിംപിളായ രണ്ടു ശീലങ്ങൾ പിന്തുടർന്നാൽ വളരെ എളുപ്പത്തിൽ പ്രമേഹ നിയന്ത്രണത്തിൽ മാറ്റങ്ങൾ വരുത്താൻ സാധിക്കും. അത് എന്തൊക്കെയാണെന്ന് അറിയേണ്ടേ?.

പതിവായുള്ള ശാരീരിക പ്രവർത്തനം

പതിവായി ശാരീരിക പ്രവർത്തനങ്ങളിൽ ഏർപ്പെടുന്നത് പ്രമേഹമുള്ളവർക്ക് വളരെയധികം ഗുണങ്ങൾ നൽകും. ''ഇൻസുലിൻ സംവേദനക്ഷമത മെച്ചപ്പെടുത്താൻ വ്യായാമം സഹായിക്കുന്നു, അതായത് ശരീരത്തിന് ഇൻസുലിൻ കൂടുതൽ ഫലപ്രദമായി ഉപയോഗിക്കാനാകും. ശരീരഭാരം നിയന്ത്രിക്കുന്നതിനും ഹൃദ്രോഗ സാധ്യത കുറയ്ക്കുന്നതിനും മൊത്തത്തിലുള്ള ആരോഗ്യം മെച്ചപ്പെടുത്തുന്നതിനും ഇത് സഹായിക്കുന്നു,'' ഡോ.രാജീവ് കോവിൽ പറഞ്ഞു.

ആഴ്ചയിൽ കുറഞ്ഞത് 5 ദിവസം 30-45 മിനിറ്റ് നീണ്ടുനിൽക്കുന്ന മിതമായ വ്യായാമങ്ങൾ ചെയ്യുന്നത് ഗുണകരമാണ്. ഏഴു ദിവസവും ചെയ്യുന്നത് വളരെ നല്ലതാണ്. ചെറിയ നടത്തം, സൈക്ലിങ്, നീന്തൽ, ഡാൻസ് എന്നിവ ഇതിൽ ഉൾപ്പെടുമെന്ന് അഹമ്മദാബാദിലെ ഡയബറ്റോളജിസ്റ്റ് കൺസൾട്ടന്റ് ഫിസിഷ്യൻ ഡോ.ജൂസർ രംഗ്‌വാല പറഞ്ഞു.

പ്രമേഹമുള്ളവർ ഏതെങ്കിലും വ്യായാമ മുറകൾ ആരംഭിക്കുന്നതിന് മുമ്പ് എല്ലായ്പ്പോഴും ഡോക്ടറുമായി സംസാരിക്കണമെന്ന് ഡോ.കോവിൽ നിർദേശിച്ചു.

ശ്രദ്ധയോടും ആരോഗ്യകരവുമായിട്ടുള്ള ഭക്ഷണം

സമീകൃതാഹാരം കഴിക്കുന്നത് പ്രമേഹം നിയന്ത്രിക്കുന്നതിന് അത്യന്ത്യാപേക്ഷിതമാണ്. പഴങ്ങൾ, പച്ചക്കറികൾ, ധാന്യങ്ങൾ, ലീൻ പ്രോട്ടീനുകൾ എന്നിവ ഭക്ഷണത്തിൽ ഉൾപ്പെടുത്തുന്നതിൽ ശ്രദ്ധിക്കണമെന്ന് വിദഗ്ധർ നിർദേശിച്ചു. ''ശുദ്ധീകരിച്ച കാർബോഹൈഡ്രേറ്റ്, പഞ്ചസാര ചേർത്തവ, അനാരോഗ്യകരമായ കൊഴുപ്പ് എന്നിവ അടങ്ങിയ ഭക്ഷണങ്ങൾ പരിമിതപ്പെടുത്തുക. പകരം, ഊർജം നൽകുന്നതും രക്തത്തിലെ പഞ്ചസാരയുടെ അളവ് നിയന്ത്രിക്കാൻ സഹായിക്കുന്നതുമായ പോഷകങ്ങൾ അടങ്ങിയ ഭക്ഷണങ്ങൾ തിരഞ്ഞെടുക്കുക,'' ഡോ.രംഗ്‌വാല അഭിപ്രായപ്പെട്ടു.

രക്തത്തിലെ പഞ്ചസാരയുടെ അളവ് നിലനിർത്താൻ ദിവസം മുഴുവനും ഇടവിട്ടുള്ള ഭക്ഷണവും ലഘുഭക്ഷണവും കഴിക്കാൻ ശ്രമിക്കുക. ഭക്ഷണം രുചികരമാണെന്ന് കരുതി അമിതമായി ഭക്ഷണം കഴിക്കുന്നത് ഒഴിവാക്കാനും ഡോ.രംഗ്‌വാല നിർദേശിച്ചു. 

Read More

• നോൺ സ്റ്റിക് പാത്രങ്ങൾ ആരോഗ്യത്തിന് ഹാനികരം, പാചകത്തിന് മൺപാത്രങ്ങൾ ഉപയോഗിക്കാൻ നിർദേശം
• കുട്ടികൾ രാത്രിയിൽ വളരെ പെട്ടെന്ന് ഉറങ്ങും, ഈ 6 ഭക്ഷണങ്ങൾ സഹായിക്കും
• ദിവസവും രാത്രിയിൽ ഒരു വെളുത്തുള്ളി അല്ലി കഴിച്ചാൽ കിട്ടും ഈ ഗുണങ്ങൾ
• ഉള്ളിയും വെളുത്തുള്ളിയും ഇല്ലാത്ത ഭക്ഷണം കഴിച്ചാലുള്ള ഗുണങ്ങൾ എന്തൊക്കെ? ദോഷങ്ങളും അറിയാം