ദിവസവും ഒരു ഏത്തപ്പഴം കഴിച്ചാൽ ഡോക്ടറെ അകറ്റി നിർത്താൻ കഴിയുമോ?

നാരുകൾ, വിറ്റാമിനുകൾ, മറ്റ് പോഷകങ്ങൾ തുടങ്ങി ശരീരത്തിന്റെ ആവശ്യം നിറവേറ്റുന്നതിനുള്ള ആരോഗ്യകരമായ മാർഗമാണ് പഴങ്ങൾ. വിറ്റാമിനുകൾ, നാരുകൾ, ആന്റിഓക്‌സിഡന്റുകൾ, പൊട്ടാസ്യം, ഫോളേറ്റ്, കാർബോഹൈഡ്രേറ്റ്, ജലാംശം, ഫോളിക് ആസിഡ്, സിങ്ക്, മഗ്നീഷ്യം എന്നിവയുടെ സമ്പന്നമായ ഉറവിടങ്ങളാണ് അവയെന്ന് ഡയറ്റീഷ്യൻ ഫൗസിയ അൻസാരി പറഞ്ഞു. പഴങ്ങൾ പതിവായി കഴിക്കുന്നത് അണുബാധകളും രോഗങ്ങളും അകറ്റിനിർത്തി നിങ്ങളെ ആരോഗ്യമുള്ളവരാക്കുമെന്ന് അവർ പറഞ്ഞു.

ദിവസവും ഒരു ആപ്പിൾ കഴിച്ചാൽ ഡോക്ടറെ അകറ്റി നിർത്താൻ സഹായിക്കുമെന്ന് പറയാറുണ്ട്. ആപ്പിളിനെ പോലെ തന്നെ, ഒരു ദിവസം ഒരു ഏത്തപ്പഴം കഴിക്കുന്നതിലൂടെ ഡോക്ടറെ അകറ്റി നിർത്താൻ കഴിയുമെന്ന് ന്യൂറോളജിസ്റ്റ് ഡോ.പ്രിയങ്ക ഷെരാവത് പറഞ്ഞു. അതിനുള്ള മൂന്നു കാരണങ്ങളും അവർ വിശദീകരിച്ചിട്ടുണ്ട്.

• കുടലിന്റെ ആരോഗ്യത്തിന് ഗുണം ചെയ്യുന്ന നല്ല ബാക്ടീരിയകളെ ഉത്പാദിപ്പിക്കാൻ സഹായിക്കുന്ന ഒരു മികച്ച പ്രീബയോട്ടിക്കാണ് ഏത്തപ്പഴം.
• ഏത്തപ്പഴത്തിൽ പൊട്ടാസ്യം ധാരാളം അടങ്ങിയിട്ടുണ്ട്.
• സോഡിയം കുറവായതിനാൽ ഏത്തപ്പഴം രക്തസമ്മർദമുള്ള രോഗികൾക്ക് നല്ലതാണ്. ഷുഗർ ഉള്ളവർക്കും മിതമായ അളവിൽ കഴിക്കാം.
• നാരുകളുടെ നല്ലൊരു ഉറവിടം കൂടിയാണ് ഏത്തപ്പഴം.
• ഏത്തപ്പഴം ശരീരഭാരം കൂട്ടാൻ കാരണമാകില്ല. സമീകൃതാഹാരത്തിന്റെ ഭാഗമായി ഒരു ദിവസം 1-2 എണ്ണം കഴിക്കാം.

മലബന്ധം തടയുക, രക്തസമ്മർദം നിയന്ത്രിക്കുക, മാനസികാവസ്ഥയും ഊർജനിലയും വർധിപ്പിക്കുക, ശരീര ഭാരം നിയന്ത്രിക്കാൻ സഹായിക്കുക, പേശികൾക്ക് ബലം നൽകുക, ചർമ്മത്തിന് കേടുപാടുകൾ സംഭവിക്കാതെ സംരക്ഷിക്കുക എന്നിങ്ങനെ വിവിധ ആരോഗ്യ ഗുണങ്ങളും ഏത്തപ്പഴം നൽകുന്നുണ്ടെന്ന് അൻസാരി പറഞ്ഞു.

എന്നാൽ, ഏത്തപ്പഴം എല്ലാവർക്കും നല്ലതല്ലെന്നും അൻസാരി പറയുന്നു. പ്രമേഹം, ഉയർന്ന രക്തസമ്മർദം, വൃക്കരോഗങ്ങൾ തുടങ്ങിയ ചില ആരോഗ്യപ്രശ്‌നങ്ങളുള്ള ആളുകൾ ഏത്തപ്പഴം കഴിക്കുന്നത് ഒഴിവാക്കണം. ഏത്തപ്പഴത്തിൽ പ്രകൃതിദത്തമായ പഞ്ചസാര അടങ്ങിയിട്ടുണ്ട്. ദിവസവും രണ്ടോ മൂന്നോ ഏത്തപ്പഴം കഴിക്കുന്നത് രക്തത്തിലെ പഞ്ചസാരയുടെ അളവ് ഉയരുന്നതിന് കാരണമാകും, ഇത് മറ്റ് ആരോഗ്യ പ്രശ്നങ്ങൾക്കും കാരണമാകുമെന്ന് അൻസാരി വ്യക്തമാക്കി.

പഴങ്ങൾ ആരോഗ്യകരമാണെങ്കിലും, അവയിൽ പ്രകൃതിദത്തമായ മധുരം അടങ്ങിയിട്ടുള്ളതിനാൽ മിതമായി കഴിക്കണം. ഭക്ഷണക്രമത്തിലോ ഭക്ഷണ ശീലങ്ങളിലോ കാര്യമായ മാറ്റങ്ങൾ വരുത്തുന്നതിന് മുമ്പ് എല്ലായ്പ്പോഴും ഡോക്ടറുടെ അഭിപ്രായം തേടാനും അൻസാരി നിർദേശിച്ചു.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• കട്ടൻ ചായയോ കട്ടൻ കാപ്പിയോ: ഏതാണ് ആരോഗ്യത്തിന് നല്ലത്?
• വണ്ണം കുറയ്ക്കാൻ ഉരുളക്കിഴങ്ങ് ഉപേക്ഷിക്കേണ്ട; ഇങ്ങനെ കഴിച്ചാൽ മതി
• പ്രമേഹമുള്ളവർക്ക് ഒരു ദിവസം എത്ര ഈന്തപ്പഴം കഴിക്കാം?
• മുരിങ്ങയില കിട്ടിയോ? തിളപ്പിച്ച് വെള്ളം കുടിക്കാം; അതിശയിപ്പിക്കും ഗുണങ്ങൾ