രാത്രിയിൽ നല്ല ഉറക്കം കിട്ടാൻ സഹായിക്കുന്ന 5 സൂപ്പർഫുഡുകൾ

രാത്രിയിൽ വിശ്രമത്തിന് പ്രാധാന്യം നൽകേണ്ടതിന്റെ ഓർമ്മപ്പെടുത്തലാണ് ലോക ഉറക്ക ദിനം. നല്ല ഉറക്കം കിട്ടാൻ അനുയോജ്യമായ അന്തരീക്ഷം ഒരുക്കുന്നതിനൊപ്പം, നമ്മൾ കഴിക്കുന്ന ഭക്ഷണത്തിലും ശ്രദ്ധ വേണം. ഭക്ഷണം ഉറക്കത്തിന്റെ ഗുണനിലവാരത്തെ ബാധിക്കുന്നുണ്ട്. 

''ഉറക്കത്തിന്റെ ഗുണനിലവാരത്തിലും ദൈർഘ്യത്തിലും ഭക്ഷണക്രമം പ്രധാന പങ്ക് വഹിക്കുന്നു. എളുപ്പത്തിൽ ഉറങ്ങാനും നല്ല ഉറക്കത്തിനും ഉന്മേഷത്തോടെ ഉണരാനുമുള്ള നമ്മുടെ കഴിവിനെ ഭക്ഷണക്രമം സാരമായി ബാധിക്കുന്നുണ്ട്, ”നറിഷിങ് സ്കൂൾസ് ഫൗണ്ടേഷന്റെ കൺസൾട്ടന്റ് അദിതി മെഹ്‌റോത്ര ഇന്ത്യൻ എക്സ്പ്രസ് ഡോട് കോമിനോട് പറഞ്ഞു. ന്യൂട്രീഷ്യനിസ്റ്റ് ഭാരത് നായിഡുവിന്റെ അഭിപ്രായത്തിൽ രാത്രിയിൽ നല്ല ഉറക്കത്തിനായി ഭക്ഷണത്തിൽ ഉൾപ്പെടുത്തേണ്ട 5 സൂപ്പർഫുഡുകളുണ്ട്.

1. ചെറി

ഉറക്ക-ഉണർവ് ചക്രങ്ങളെ നിയന്ത്രിക്കുന്ന ഹോർമോണായ മെലറ്റോണിൻ സമ്പുഷ്ടമായ പഴമാണ് ചെറി. ഉറക്കത്തിന്റെ ഗുണനിലവാരം മെച്ചപ്പെടുത്താൻ ഈ പഴത്തിന് കഴിയും. വൈകുന്നേരങ്ങളിൽ ചെറി അല്ലെങ്കിൽ ചെറി ജ്യൂസ് കഴിക്കുന്നത് വേഗത്തിൽ ഉറങ്ങാനും കൂടുതൽ സമയം ഉറങ്ങാനും സഹായിക്കും.

2. ബദാം

മഗ്നീഷ്യം, ട്രിപ്റ്റോഫാൻ എന്നിവയുടെ നല്ല ഉറവിടമായ ബദാം ഉറക്കത്തിന്റെ ഗുണനിലവാരം കൂട്ടും. ഉറങ്ങുന്നതിനുമുമ്പ് ഒരു പിടി ബദാം കഴിക്കുന്നത് ശരീരത്തെയും മനസിനെയും ശാന്തമാക്കാൻ സഹായിക്കും. 

3. ഏത്തപ്പഴം

പൊട്ടാസ്യം, മഗ്നീഷ്യം എന്നിവ അടങ്ങിയ ഏത്തപ്പഴം മസിൽ റിലാക്സേഷൻ പ്രോത്സാഹിപ്പിക്കുന്നതിനും ഉറക്കം ക്രമീകരിക്കുന്നതിനും ഗുണം ചെയ്യും. ഭക്ഷണത്തിൽ ഏത്തപ്പഴം ഉൾപ്പെടുത്തുന്നത് ഉറക്കത്തിന്റെ ഗുണനിലവാരം മെച്ചപ്പെടുത്താനും രാത്രിയിൽ ഉണർന്നിരിക്കാനുള്ള സാധ്യത കുറയ്ക്കാനും സഹായിക്കും. 

4. ഓട്സ്

കോംപ്ലക്‌സ് കാർബോഹൈഡ്രേറ്റും മെലറ്റോണിനും കൊണ്ട് സമ്പന്നമായ ഓട്‌സ് വിശ്രമം പ്രോത്സാഹിപ്പിക്കുന്നതിനും ഉറക്കം നൽകുന്നതിനുമുള്ള പോഷകപ്രദമായ ഓപ്ഷനാണ്. ഉറങ്ങുന്നതിനു മുമ്പ് ഓട്‌സ് കഴിക്കുന്നത് ഉറക്കത്തിന് തയ്യാറെടുക്കാനുള്ള സമയമായെന്ന് ശരീരത്തെ അറിയിക്കാൻ സഹായിക്കും.

5. കിവി

വിറ്റാമിനുകൾ സി, കെ എന്നിവയും സെറോടോണിനും അടങ്ങിയ കിവി പഴം ഉറക്കത്തിന്റെ ഗുണനിലവാരവും ദൈർഘ്യവും മെച്ചപ്പെടുത്തുമെന്ന് തെളിയിക്കപ്പെട്ടിട്ടുണ്ട്. കിവി പതിവായി കഴിക്കുന്നത് വേഗത്തിൽ ഉറങ്ങാൻ സഹായിച്ചേക്കാം.

രാത്രിയിലെ അസ്വസ്ഥതകൾ കുറയ്ക്കുന്നതിനും ദഹനം എളുപ്പമാക്കുന്നതിനും ഉറങ്ങുന്നതിനു മുമ്പ് കനത്തതോ മസാലകളോ അസിഡിറ്റി ഉള്ളതോ ആയ ഭക്ഷണങ്ങൾ ഒഴിവാക്കണമെന്ന് മെഹ്‌റോത്ര നിർദേശിച്ചു. പഴങ്ങൾ, പച്ചക്കറികൾ, മെലിഞ്ഞ പ്രോട്ടീനുകൾ, ആരോഗ്യകരമായ കൊഴുപ്പുകൾ എന്നിവയാൽ സമ്പന്നമായ ഭക്ഷണക്രമം ശരീരഭാരം നിയന്ത്രിക്കുന്നതിനും മികച്ച ഉറക്കത്തിനും സഹായിക്കുമെന്ന് അവർ പറഞ്ഞു.

Read More

• എത്ര ശ്രമിച്ചിട്ടും ഭാരം കുറയുന്നില്ലേ? ഈ തെറ്റുകൾ ചെയ്യാറുണ്ടോയെന്ന് പരിശോധിക്കൂ
• എന്താണ് 4-2-8-2 ശ്വസനം? ഇതെങ്ങനെ സമ്മർദം അകറ്റുന്നു?
• ദിവസവും ആറ് മണിക്കൂറിൽ താഴെയാണോ ഉറക്കം? അപകടം വരുന്ന വഴി ഇതാണ്
• വേനലിനെ ചെറുക്കാം; ഭക്ഷണത്തിൽ മുരിങ്ങയില ഉൾപ്പെടുത്തേണ്ടതിന്റെ കാരണങ്ങൾ