ഒരേയൊരു ദിലീപ്; സുബ്ബലക്ഷ്മി അമ്മയെ കാണാൻ ദിലീപ് എത്തിയ വീഡിയോ പങ്ക് വച്ച് താരാ കല്യാൺ

മലയാളത്തിന്റെ പ്രിയ സ്ക്രീൻ മുത്തശ്ശി, സുബ്ബലക്ഷ്മി മറഞ്ഞിട്ടു ഇന്ന് രണ്ടു ദിവസമാകുന്നു.  വാർധക്യ സഹജമായ പ്രശ്നങ്ങളാൽ നവംബർ 30 രാത്രിയാണ് അവർ അന്തരിച്ചത്. സിനിമാ മേഖലയിലെ സഹപ്രവർത്തകർ സുബ്ബലക്ഷ്മിയ്ക്ക് ആദരാഞ്ജലി അരിപ്പിക്കാൻ തിരുവനന്തപുരത്തെ അവരുടെ വസതിയിൽ എത്തിയിരുന്നു.  

സുബ്ബലക്ഷ്മിയുമായി രണ്ടു ചിത്രങ്ങളിൽ ഒന്നിച്ചു അഭിനയിച്ച ദിലീപ്, കുറച്ചു നാളുകൾക്ക് മുൻപ് അമ്മയെ കാണാൻ എത്തിയ വീഡിയോ സുബ്ബലക്ഷ്മിയുടെ മകളും നടിയുമായ താരാ കല്യാൺ ഇൻസ്റ്റഗ്രാമിൽ പങ്കു വച്ചു.  'ഒരേയോരു ദിലീപ്' എന്നാണ് വീഡിയോയ്ക്ക് താര അടിക്കുറിപ്പ് നൽകിയത്.

"അവസാന ശ്വാസം വരെ കലയാണ് അമ്മയെ മുന്നോട്ടു നയിച്ചത്. നിങ്ങളുടെ മകൾ ആയതിൽ ഞാൻ വളരെ അഭിമാനിക്കുന്നു. അമ്മയ്ക്ക് എന്നും അംഗീകാരം വേണമായിരുന്നു, ഇന്നലെ അതിന്റെ പെരുമഴയായിരുന്നു! എല്ലായിടത്തും എല്ലാവരും അമ്മയോട് സ്നേഹവും ബഹുമാനവും കാണിച്ചു. എന്റെ അമ്മയ്ക്ക് അവിസ്മരണീയമായ ഒരു യാത്രയയപ്പ് നൽകിയതിന് എല്ലാവർക്കും എന്റെ ഹൃദയത്തിന്റെ അടിത്തട്ടിൽ നിന്ന് ആത്മാർത്ഥമായി നന്ദി," അമ്മയുടെ വിയോഗവേളയിൽ ആദരാഞ്ജലികൾ അർപ്പിച്ചവർക്കെല്ലാം നന്ദി അറിയിച്ചു കൊണ്ട് താരാ കല്യാൺ കുറിച്ചു.

മലയാളം കടന്നു ബോളിവുഡില്‍ വരെ എത്തിയ സുബ്ബലക്ഷ്മിയമ്മ

തിരുവനന്തപുരം സ്വദേശിനിയായ സുബ്ബലക്ഷ്മി കുട്ടിക്കാലത്ത് തന്നെ സംഗീതം പരിശീലിച്ചിരുന്നു. ജവഹർ ബാലഭവനിൽ ഏകദേശം 27 വർഷക്കാലം സംഗീതാധ്യാപികയായി ജോലി നോക്കി. ആകാശവാണിയിലും പ്രവർത്തിച്ചിരുന്നു. ജോലിയിൽ നിന്ന് റിട്ടയർ ചെയ്ത ശേഷം ഹോർലിക്സിന്റെ ഒരു പരസ്യചിത്രത്തിലൂടെയാണ് ക്യാമറയുടെ മുന്നിലെത്തുന്നത്. 

നർത്തകിയും അഭിനേത്രിയുമായ മകൾ താരാകല്യാണിനൊപ്പം ടെലിവിഷൻ പരമ്പരയുടെ ചിത്രീകരണ സെറ്റിൽ എത്തിയപ്പോൾ നടൻ സിദ്ധിക്കിനെ പരിചയപ്പെട്ടു. സിദ്ധിക്ക് വഴിയാണ് 'നന്ദനം' സിനിമയിലേക്ക് എത്തിച്ചേർന്നത്. 

തുടർന്ന് ഏറെ സിനിമകളിൽ മുത്തശ്ശിയായും ഹാസ്യരസപ്രധാനമായ വേഷങ്ങളും അവതരിപ്പിച്ചു. കല്യാണരാമൻ, പാണ്ടിപ്പട, നന്ദനം, രാപ്പകൽ എന്നിവയെല്ലാം ശ്രദ്ധേയ ചിത്രങ്ങളാണ്. 'മേരിക്കുണ്ടൊരു കുഞ്ഞാട്' എന്ന ചിത്രത്തിലെ ഗാനം ആലപിച്ച് ചലച്ചിത്ര പിന്നണി ഗാനരംഗത്തും തുടക്കമിട്ടിരുന്നു. 

ഇപ്പോള്‍ മലയാളം കടന്നു ബോളിവുഡില്‍ വരെ എത്തിയിട്ടുണ്ട് സുബ്ബലക്ഷ്മിയമ്മ. അകാലത്തില്‍ അന്തരിച്ച യുവതാരം സുശാന്ത് സിങ് രജ്‌പുത് നായകനായ 'ദിൽ ബെച്ചാര' എന്ന ചിത്രത്തിലൂടെയായിരുന്നു സുബ്ബലക്ഷ്മിയമ്മയുടെ ഹിന്ദി അരങ്ങേറ്റം.