ഞാൻ അനാഥയായി; അമ്മയുടെ വിയോഗത്തിൽ താരാ കല്യാൺ

ഞാൻ അനാഥയായി എന്ന് നടിയും നർത്തകിയുമായ താരാ കല്യാൺ. അമ്മ സുബ്ബലക്ഷ്മിയുടെ വിയോഗ വാർത്തയ്ക്ക് പിന്നാലെയാണ് താര ഇൻസ്റ്റഗ്രാമിൽ ഇങ്ങനെ പറഞ്ഞത്.  'എന്നെ അനാഥയാക്കിയ നഷ്ടം,' എന്നാണു അമ്മയ്‌ക്കൊപ്പമുള്ള ചിത്രം പങ്കു വച്ച് കൊണ്ട് താരാ കല്യാൺ കുറിച്ചത്. താരയുടെ മകളും നർത്തകിയും സോഷ്യൽ മീഡിയ ഇൻഫ്ലുവെൻസറുമായ സൗഭാഗ്യയും അമ്മൂമ്മയുടെ മരണവിവരം അറിയിച്ചു കൊണ്ട് സോഷ്യൽ മീഡിയയിൽ ചിത്രങ്ങൾ ഷെയർ ചെയ്തിരുന്നു.

"എനിക്ക് മുത്തശ്ശിയെ നഷ്ടമായി. 30 വർഷമായി എന്റെ കരുത്തും സ്നേഹവും. എന്റെ അമ്മമ്മ, എന്റെ സുബ്ബു, എന്റെ ബേബി," സൗഭാഗ്യ കുറിച്ചു.

ഇന്നലെ രാത്രിയോടെയാണ് മലയാള സിനിമയിലെ പ്രിയപ്പെട്ട മുത്തശ്ശി - സുബ്ബലക്ഷ്മി വിട പറഞ്ഞത്. തിരുവനന്തപുരത്തെ സ്വകാര്യ ആശുപത്രിയിലായിരുന്നു അന്ത്യം. വാർധക്യസഹജമായ അവശതകൾ മൂലം അവിടെ ചികിത്സ തേടുകയായിരുന്നു.  

തിരുവനന്തപുരത്ത് മുടവന്മുകളിലെ വീട്ടിൽ അന്ത്യകർമ്മങ്ങൾക്ക് ശേഷം, ഇന്ന് വൈകിട്ട് 4 മണിക്ക് തൈക്കാട്ട് ശാന്തികവാടത്തിൽ സംസ്കാരം.

View this post on Instagram

A post shared by Thara Kalyan (@tharakalyan)

മലയാളം കടന്നു ബോളിവുഡില്‍ വരെ എത്തിയ സുബ്ബലക്ഷ്മിയമ്മ

തിരുവനന്തപുരം സ്വദേശിനിയായ സുബ്ബലക്ഷ്മി കുട്ടിക്കാലത്ത് തന്നെ സംഗീതം പരിശീലിച്ചിരുന്നു. ജവഹർ ബാലഭവനിൽ ഏകദേശം 27 വർഷക്കാലം സംഗീതാധ്യാപികയായി ജോലി നോക്കി. ആകാശവാണിയിലും പ്രവർത്തിച്ചിരുന്നു. ജോലിയിൽ നിന്ന് റിട്ടയർ ചെയ്ത ശേഷം ഹോർലിക്സിന്റെ ഒരു പരസ്യചിത്രത്തിലൂടെയാണ് ക്യാമറയുടെ മുന്നിലെത്തുന്നത്. 

നർത്തകിയും അഭിനേത്രിയുമായ മകൾ താരാകല്യാണിനൊപ്പം ടെലിവിഷൻ പരമ്പരയുടെ ചിത്രീകരണ സെറ്റിൽ എത്തിയപ്പോൾ നടൻ സിദ്ധിക്കിനെ പരിചയപ്പെട്ടു. സിദ്ധിക്ക് വഴിയാണ് 'നന്ദനം' സിനിമയിലേക്ക് എത്തിച്ചേർന്നത്. 

തുടർന്ന് ഏറെ സിനിമകളിൽ മുത്തശ്ശിയായും ഹാസ്യരസപ്രധാനമായ വേഷങ്ങളും അവതരിപ്പിച്ചു. കല്യാണരാമൻ, പാണ്ടിപ്പട, നന്ദനം, രാപ്പകൽ എന്നിവയെല്ലാം ശ്രദ്ധേയ ചിത്രങ്ങളാണ്. 'മേരിക്കുണ്ടൊരു കുഞ്ഞാട്' എന്ന ചിത്രത്തിലെ ഗാനം ആലപിച്ച് ചലച്ചിത്ര പിന്നണി ഗാനരംഗത്തും തുടക്കമിട്ടിരുന്നു. 

ഇപ്പോള്‍ മലയാളം കടന്നു ബോളിവുഡില്‍ വരെ എത്തിയിട്ടുണ്ട് സുബ്ബലക്ഷ്മിയമ്മ. അകാലത്തില്‍ അന്തരിച്ച യുവതാരം സുശാന്ത് സിങ് രജ്‌പുത് നായകനായ 'ദിൽ ബെച്ചാര' എന്ന ചിത്രത്തിലൂടെയായിരുന്നു സുബ്ബലക്ഷ്മിയമ്മയുടെ ഹിന്ദി അരങ്ങേറ്റം.

Read Here

• നടിയും സംഗീതജ്ഞയുമായ സുബ്ബലക്ഷ്‍മി അന്തരിച്ചു
• 30 വർഷം സ്നേഹമായി, കരുത്തായി നിന്ന എന്റെ സുബ്ബു പോയി: വേദനയോടെ സൗഭാഗ്യ
• മമ്മൂട്ടി ചോദിച്ചു, എന്നാല്‍ ഞാന്‍ ഡാര്‍ലിംഗ് എന്ന് വിളിച്ചോട്ടേ?; സൂപ്പര്‍സ്റ്റാറുമായുള്ള സുബ്ബലക്ഷ്മിയമ്മയുടെ 'സ്നേഹക്കഥ'