ജൂനിയർ പിഷുവിന്റെ ആറ്റിറ്റ്യൂഡ് നോക്കൂ; ചിത്രവുമായി രമേഷ് പിഷാരടി

പ്രേക്ഷകരുടെ പ്രിയപ്പെട്ട താരമാണ് നടനും​ അവതാരകനും സംവിധായകനുമായ രമേഷ് പിഷാരടി. കുറിക്ക് കൊള്ളുന്ന ഹാസ്യവും കൗണ്ടർ ഡയലോഗുകളുമെല്ലാമായി എപ്പോഴും പ്രേക്ഷകരെ ചിരിപ്പിക്കുകയും ഇഷ്ടം കവരുകയും ചെയ്യുന്ന പിഷാരടിക്ക് വലിയൊരു ആരാധകവൃന്ദം തന്നെയുണ്ട്.

ഭാര്യയ്ക്കും മക്കൾക്കുമൊപ്പമുള്ള ചിത്രം സോഷ്യൽ മീഡിയയിലൂടെ പങ്കുവയ്ക്കുകയാണ് പിഷാരടി. 'ഹോംമെയ്ഡ് ഹാപ്പിനസ്സ്' എന്നാണ് ചിത്രത്തിനു അടികുറിപ്പായി താരം കുറിച്ചത്. ഗായിക സിത്താര 'അഴക്' എന്ന് ചിത്രത്തിനു താഴെ കമന്റു ചെയ്തപ്പോൾ 'ഏനിതൊന്നും അറിഞ്ഞതേ ഇല്ലേ' എന്നാണ് രമേഷ് പിഷാരടിയുടെ മറുപടി.

കുടുംബ ചിത്രത്തിൽ ആരാധകരുടെ കണ്ണുടക്കിയത് പിഷാരടിയുടെ ഇളയ മകന്റെ മുഖത്തേയ്ക്കാണ്. 'ജൂനിയർ പിഷാരടിയുടെ ആറ്റിറ്റ്യൂഡ് നോക്കൂ' എന്നാണ് ആരാധകർ പറയുന്നത്.

കുമാറിന്റെ മിമിക്രി ട്രൂപ്പായ ‘കൊച്ചിൻ സ്റ്റാലിയൻസി’ൽ പ്രവർത്തിച്ച രമേഷ് പിഷാരടി ശ്രദ്ധ നേടുന്നത് ഏഷ്യാനെറ്റ് പ്ലസിൽ ധർമജൻ ബോൾഗാട്ടിക്കൊപ്പം അവതരിപ്പിച്ച ‘ബ്ലഫ് മാസ്റ്റേഴ്സ്’ എന്ന ഹാസ്യപരിപാടിയിലൂടെയാണ്. സ്റ്റേജ് ഷോകളിലും ടെലിവിഷൻ പരിപാടികളിലും സജീവമായ താരം 2008-ൽ പുറത്തിറങ്ങിയ ‘പോസിറ്റീവ്’ എന്ന സിനിമയിലൂടെ അഭിനയത്തിലും അരങ്ങേറ്റം കുറിച്ചു.

2018 ൽ ‘പഞ്ചവർണ്ണതത്ത’ എന്ന ചിത്രത്തിലൂടെ സംവിധാനരംഗത്തും രമേഷ് പിഷാരടി തന്റെ കഴിവു തെളിയിച്ചു. മമ്മൂട്ടിയെ നായകനാക്കി ഇറങ്ങിയ ‘ഗാനഗന്ധർവ്വൻ’ ആണ് രമേഷ് പിഷാരടി ഒടുവിൽ സംവിധാനം ചെയ്ത ചിത്രം.