ആനക്കൊമ്പ് വേട്ടയുടെ കഥ, ഗോമതി ദേവിയുടെ പോരാട്ടങ്ങളുടെയും; 'പോച്ചർ' വരുന്നു

Poacher OTT Release Date: ഇന്ത്യ കണ്ട ഏറ്റവും വലിയ ആനക്കൊമ്പ് വേട്ടയുടെ കഥ പറയുന്ന 'പോച്ചർ' ഒടിടി റിലീസിനൊരുങ്ങുകയാണ്. മലയാളി താരങ്ങളായ നിമിഷ സജയൻ, റോഷൻ മാത്യു, കനി കുസൃതി, അങ്കിത് മാധവ്, രഞ്ജിത മേനോൻ, മാല പാർവ്വതി എന്നിവർക്കൊപ്പം ദിബ്യേന്ദു ഭട്ടാചാര്യയും ശ്രദ്ധേയമായ മറ്റൊരു കഥാപാത്രത്തെ അവതരിപ്പിക്കുന്നുണ്ട്. 

പോച്ചറിലെ തന്റെ കഥാപാത്രത്തെ കുറിച്ചു സൂചന നൽകുകയാണ് നടി നിമിഷ സജയൻ. ഗോമതി ദേവി എന്ന കഥാപാത്രത്തെയാണ് നിമിഷ അവതരിപ്പിക്കുന്നത്. സമരനായികയാണ് ഗോമതി എന്ന സൂചനയാണ് നിമിഷയുടെ ഇൻസ്റ്റഗ്രാം കുറിപ്പ് സമ്മാനിക്കുന്നത്.

ഏതാനും ലൊക്കേഷൻ സ്റ്റിൽസും നിമിഷ പങ്കിട്ടിട്ടുണ്ട്.

കോടതി രേഖകളുടെയും സാക്ഷ്യപത്രങ്ങളുടെയും അടിസ്ഥാനത്തിൽ, കേരളത്തിലെ നിബിഡ വനങ്ങളിൽ നടന്ന സംഭവങ്ങളുടെ ചലച്ചിത്രാവിഷ്കാരമാണ് പോച്ചർ.

ഇന്ത്യൻ ഫോറസ്റ്റ് ഓഫീസർമാർ, വൈൽഡ് ലൈഫ് ട്രസ്റ്റ് ഓഫ് ഇന്ത്യയിലെ എൻ ജി ഒ പ്രവർത്തകർ, പോലീസ് കോൺസ്റ്റബിൾമാർ എന്നു തുടങ്ങി ഇന്ത്യൻ ചരിത്രത്തിലെ ഏറ്റവും വലിയ ആനക്കൊമ്പ് വേട്ട സംഘത്തെക്കുറിച്ച് അന്വേഷിക്കാൻ ജീവൻ പണയപ്പെടുത്തിയവരുടെ ഓർമ പുതുക്കുകയാണ്  ഈ സീരീസ്. 

ആമസോൺ ഒറിജിനൽസിൽ നിന്നുള്ള ഈ സീരീസ് നിർമ്മിച്ചത് ക്യുസി എന്റർടൈൻമെന്റ് ആണ്. ഓസ്കാർ നേടിയ പ്രൊഡക്ഷൻ കമ്പനിയായ ക്യുസി എന്റർടൈൻമെന്റിന്റെ ടെലിവിഷനിലേക്കുള്ള ആദ്യ ചുവടുവപ്പാണ് പോച്ചർ.  എമ്മി അവാർഡ് ജേതാവായ റിച്ചി മേത്ത രചനയും സംവിധാനവും നിർവ്വഹിക്കുന്നു. എട്ട് എപ്പിസോഡുള്ള ഈ പരമ്പരയുടെ ആദ്യ മൂന്ന് എപ്പിസോഡുകൾ 2023ലെ സൺഡാൻസ് ഫിലിം ഫെസ്റ്റിവലിൽ പ്രദർശിപ്പിച്ചിരുന്നു. 

ജൊഹാൻ ഹെർലിൻ എയ്ഡ് ക്യാമറ ചലിപ്പിക്കുന്ന സീരീസിന് സംഗീതം നൽകിയത്  ആൻഡ്രൂ ലോക്കിംഗ്ടണാണ്. ബെവർലി മിൽസ്, സൂസൻ ഷിപ്പ്ടൺ, ജസ്റ്റിൻ ലി എന്നിവരാണ് സീരീസിന്റെ എഡിറ്റിംഗ് ജോലികൾ കൈകാര്യം ചെയ്തത്. സീരീസിന്റെ മലയാളം തിരക്കഥ എഴുതിയിരിക്കുന്നത് ഇയോബിന്റെ പുസ്തകം, തുറമുഖം തുടങ്ങിയ ചിത്രങ്ങളിൽ പ്രവർത്തിച്ചിട്ടുള്ള ഗോപൻ ചിദംബരമാണ്. 

ഫെബ്രുവരി 23ന് ഇന്ത്യയിലും ലോകമെമ്പാടുമുള്ള 240-ലധികം രാജ്യങ്ങളിലുമായി ആമസോൺ പ്രൈം വീഡിയോ പോച്ചർ സ്ട്രീം ചെയ്യും. 

Read More:

• ഫെബ്രുവരിയിൽ തിയേറ്ററിലും ഒടിടിയിലും എത്തുന്ന ചിത്രങ്ങൾ
• HanuMan OTT: 'ഹനുമാന്‍' ഒടിടിയില്‍ എന്ന് മുതല്‍? എവിടെ?
• New OTT Release: ഒടിടിയിൽ സിനിമകളുടെ പൂക്കാലം: ജനുവരിയിൽ എത്തുന്നത് 10 ചിത്രങ്ങൾ
• New OTT Release: റിപ്പബ്ലിക് ദിനം ഒടിടിയിൽ എത്തിയ ചിത്രങ്ങൾ