അഭിനയമുഹൂർത്തങ്ങളുമായി മമ്മൂട്ടിയും മോഹൻലാലും; മനോരഥങ്ങൾ പുതിയ ടീസർ

എം.ടി. വാസുദേവൻ നായരുടെ ഒൻപത് കഥകളെ ആസ്പദമാക്കി ഒരുങ്ങുന്ന ആന്തോളജി ചിത്രമായ ‘മനോരഥങ്ങൾ’  ഇന്ന് അർദ്ധരാത്രിയോടെ ഒടിടിയിലെത്തും. മമ്മൂട്ടി,മോഹൻലാൽ, ആസിഫ് അലി, ഫഹദ് ഫാസില്‍, ബിജു മേനോൻ, ഇന്ദ്രജിത്ത് സുകുമാരൻ, പാർവതി തിരുവോത്ത്, വിനീത്, സുരഭി ലക്ഷ്മി, ആൻ അഗസ്റ്റിൻ എന്നിങ്ങനെ നിരവധി താരങ്ങൾ ഈ ആന്തോളജി ചിത്രത്തിനായി കൈകോർക്കുന്നുണ്ട്.  കമൽഹാസന്റെ അവതരണത്തോടെയാണ് മനോരഥങ്ങൾ പ്രേക്ഷകരിലേക്ക് എത്തുക.  സീ 5 ഒടിടി പ്ലാറ്റ്‌ഫോമിലാണ് ഓഗസ്റ്റ് 15ന് ചിത്രം സ്ട്രീമിംഗ് ആരംഭിക്കും.

ഒടിടി റിലീസിനു മുന്നോടിയായി പുതിയ ടീസർ പുറത്തുവിട്ടിരിക്കുകയാണ് അണിയറപ്രവർത്തകർ. മോഹൻലാലും മമ്മൂട്ടിയും പ്രധാനകഥാപാത്രങ്ങളിലെത്തുന്ന കടുഗണ്ണാവ ഒരു യാത്രക്കുറിപ്പ്, ഓളവും തീരവും എന്നീ ചിത്രങ്ങളിലെ പ്രധാന ഭാഗങ്ങൾ കോർത്തിണക്കിയാണ് ടീസർ തയ്യാറാക്കിയിരിക്കുന്നത്.

സംവിധായകരായ പ്രിയദര്‍ശന്‍, ജയരാജ്, ശ്യാമപ്രസാദ്, സന്തോഷ് ശിവന്‍, മഹേഷ് നാരായണന്‍, രഞ്ജിത്ത്, രതീഷ് അമ്പാട്ട് തുടങ്ങിയവരാണ് ചിത്രങ്ങളൊരുക്കുന്നത്. എംടിയുടെ മകളും പ്രശസ്ത നർത്തകിയുമായ അശ്വതി ശ്രീകാന്ത് ആണ് ഇതിലൊരു സിനിമ ഒരുക്കിയിരിക്കുന്നത്. സംവിധായിക എന്നതിനൊപ്പം ചിത്രത്തിന്റെ ക്രിയേറ്റീവ് പ്രൊഡ്യൂസർ കൂടിയാണ് അശ്വതി. സീരീസിൽ രണ്ട് ചിത്രങ്ങൾ സംവിധാനം ചെയ്തിരിക്കുന്നത് പ്രിയദര്‍ശനാണ്..

പ്രിയദർശൻ സംവിധാനം ചെയ്യുന്ന 'ഓളവും തീരവും' എന്ന ചിത്രത്തിൽ നായകനാവുന്നത് മോഹൻലാലാണ്.  ‘ശിലാലിഖിതം’ എന്ന ചിത്രത്തിന്റെ സംവിധായകനും പ്രിയദർശനാണ്, ഈ ചിത്രത്തിൽ  ബിജു മേനോനാണ് നായകൻ. 

 'നിന്റെ ഓര്‍മ്മക്ക്' എന്ന ചെറുകഥയുടെ തുടര്‍ച്ചയെന്ന നിലക്ക് എം ടി എഴുതിയ കഥയാണ് 'കടുഗണ്ണാവ ഒരു യാത്രക്കുറിപ്പ്'. ഈ കഥ സിനിമയാവുമ്പോൾ കേന്ദ്ര കഥാപാത്രത്തെ അവതരിപ്പിക്കുന്നത്  മമ്മൂട്ടിയാണ്. രഞ്ജിത്താണ് സംവിധാനം. ശ്രീലങ്കയിലേക്ക് നടത്തുന്ന യാത്രയാണ് ഈ കഥയുടെ പ്രമേയം.

ജയരാജ് സംവിധാനം ചെയ്യുന്ന ‘സ്വർഗം തുറക്കുന്ന സമയം’ എന്ന ചിത്രത്തില്‍ നെടുമുടി വേണു, സുരഭി, ഇന്ദ്രൻസ് എന്നിവർ പ്രധാന വേഷത്തിലെത്തുന്നു. 

 എംടിയുടെ 'ഷെർലക്ക്' ചെറുകഥ അടിസ്ഥാനമാക്കിയുള്ള ചിത്രം സംവിധാനം ചെയ്യുന്നത് മഹേഷ് നാരായണന്‍ ആണ്. ഫഹദ് ഫാസിലാണ് കേന്ദ്ര കഥാപാത്രം.  സിദ്ദിഖിനെ കേന്ദ്രകഥാപാത്രമാക്കി സന്തോഷ് ശിവൻ സംവിധാനം ചെയ്ത  'അഭയം തേടി വീണ്ടും’,  പാർവതി തിരുവോത്തിനെ പ്രധാന കഥാപാത്രമാക്കി ശ്യാമപ്രസാദ് ഒരുക്കിയ  ‘കാഴ്ച’, രതീഷ് അമ്പാട്ട് ഒരുക്കുന്ന 'കടൽക്കാറ്റ്' എന്നിവയാണ് മറ്റു ചിത്രങ്ങൾ. 'കടൽക്കാറ്റി'ൽ  ഇന്ദ്രജിത്തും അപർണ്ണ ബാലമുരളിയുമാണ് പ്രധാന കഥാപാത്രങ്ങൾ.  'വിൽപ്പന' എന്ന ചെറുകഥ സിനിമയാക്കുന്നത് എം ടിയുടെ മകള്‍ അശ്വതിയാണ്. ഈ ചിത്രത്തില്‍ ആസിഫ് അലിയും മധുബാലയുമാണ് പ്രധാന കഥാപാത്രങ്ങളെ അവതരിപ്പിക്കുന്നത്.

Read More Stories Here

• Little Hearts OTT: ലിറ്റിൽ ഹാർട്സ് ഒടിടിയിൽ
• Grrr OTT: ഗ്ർർർ ഒടിടിയിലേക്ക്
• നൂർ ജലീലയെ എനിക്ക് നേരത്തെയറിയാം, ഞങ്ങൾ പഴേ ഫ്രണ്ട്സാ: മമ്മൂട്ടി
• ആ പാട്ട് ഷൂട്ട് ചെയ്തത് നാലര വർഷം കൊണ്ട്: ഹിറ്റ് ഗാനത്തിനു പിന്നിലെ കഥ പറഞ്ഞ് ശിൽപ്പ ഷെട്ടി