എന്റെ മോൻ സ്മാർട്ടാ, അതാ കൂടെ പോന്നത്; സുപ്രിയയെക്കുറിച്ച് മല്ലിക

മലയാള സിനിമാ ആരാധകരുടെ ഏറ്റവും പ്രിയപ്പെട്ട താരകുടുംബമാണ് മല്ലിക സുകുമാരന്റേത്. അതുകൊണ്ട് തന്നെ അവിടുത്തെ ഓരോ വിശേഷങ്ങളും അറിയാൻ ആരാധകർക്കും ഏറെ ഇഷ്ടമാണ്. രണ്ടു സൂപ്പർ സ്റ്റാറുകൾ ഉള്ള ആ വീട്ടിലെ നെടുംതൂണാണ് മല്ലിക സുകുമാരൻ. മരുമക്കളെ മക്കളായി കാണുന്ന അമ്മായിയമ്മ കൂടിയാണ് മല്ലിക. പല അഭിമുഖങ്ങളിലും മരുമക്കളെ കുറിച്ചും അവരിൽ തനിക്കിഷ്ടപ്പെട്ട കാര്യങ്ങളെ കുറിച്ചുമൊക്കെ മല്ലിക സുകുമാരൻ വാചാലയാവാറുണ്ട്. 

മൈൽസ്റ്റോൺ മേക്കേഴ്സ് സംഘടിപ്പിച്ച 'മനസ്സറിഞ്ഞ് മല്ലിക' എന്ന പരിപാടിയ്ക്കിടെ മരുമകളായ സുപ്രിയയെ കുറിച്ച് മല്ലിക പറഞ്ഞ വാക്കുകളാണ് ഇപ്പോൾ ശ്രദ്ധ കവരുന്നത്. 

സുപ്രിയയെ കുറിച്ച് എന്താണ് പറയാനുള്ളത് എന്ന അവതാരകയുടെ ചോദ്യത്തിന്, "നല്ലതു പറഞ്ഞില്ലെങ്കിൽ മിക്കവാറും  തല്ലു കിട്ടും," എന്നായിരുന്നു മല്ലികയുടെ രസകരമായ മറുപടി. വളരെ സ്മാർട്ടാണ് സുപ്രിയ എന്നും പൃഥ്വിരാജിനു ഏറ്റവും അനുയോജ്യയായ ഭാര്യയാണെന്നും മല്ലിക പറയുന്നു.

"ഇങ്ങനെയൊരു പെൺകുട്ടി വന്നില്ലായിരുന്നെങ്കിൽ രാജുവിന്റെ കാര്യം! സുപ്രിയ, എന്തൊരു സ്മാർട്ട് ആണെന്നറിയാമോ.. വേറൊന്നും കൊണ്ടല്ല, കുഞ്ഞിന്റെ പഠിത്തകാര്യമാവട്ടെ, പ്രൊഡക്ഷനാവട്ടെ, ഡിസ്ട്രിബ്യൂഷനാവട്ടെ എല്ലാം നന്നായി മാനേജ് ചെയ്യും. രാജു അതൊക്കെ ചെയ്യുന്നുണ്ടെങ്കിലും രാജുവിന് സമയം തികയുന്നില്ല. എല്ലാകാര്യങ്ങളും ഒറ്റയ്ക്ക് മാനേജ് ചെയ്യാൻ മിടുക്കിയാണ് സുപ്രിയ."

പൃഥ്വിയാണോ സുപ്രിയയാണോ കൂടുതൽ സ്മാർട്ട് എന്ന ചോദ്യത്തിന്, " അതെന്റെ മോൻ തന്നെ. അതുകൊണ്ടാണ് സുപ്രിയ കൂടെ വന്നത്," എന്നായിരുന്നു മല്ലികയുടെ മറുപടി. 

സുപ്രിയ വളരെ പൊസസീവ് ആണെന്നു പറയുന്നുണ്ടല്ലോ, അതെന്താണ്  എന്ന ചോദ്യത്തിന്, "അതെ. നമുക്കറിയാമല്ലോ. ഞാൻ, എന്റെ ഭർത്താവ്, എന്റെ കുഞ്ഞ് എന്നൊക്കെ പറയുന്നത് അദ്ദേഹത്തിന്റെയൊരു സാമ്രാജ്യമാണ്. അവിടെ കടന്നുകയറി ആക്രമിക്കാനൊന്നും ആരെയും അനുവദിക്കില്ല.  അതെന്റെയും സ്വഭാവമാണ്. 'എന്താ അമ്മേ ഞങ്ങളുടെ കൂടെ വന്നു നിന്നാൽ...' എന്നൊക്കെ മക്കൾ ചോദിക്കുമ്പോൾ 'വേണ്ട,  എനിക്ക് ഇതാണ് ഇഷ്ടം' എന്നാണ് ഞാനും പറയാറ്," എന്നാണ് മല്ലിക മറുപടി നൽകിയത്. 

Read More Related Stories 

• തപ്സി പന്നു വിവാഹിതയാവുന്നു
• പൂ ചോദിച്ചപ്പോൾ പൂന്തോട്ടം നൽകി മഞ്ഞുമ്മൽ ബോയ്സ്; ആരാധിക ഹാപ്പി
• തിരിച്ചുവിളി കാത്ത് ആരാധകൻ; മകനേ മടങ്ങി വരൂ എന്ന് ബേസിൽ
• ആദ്യ ക്രഷ് ഷാരൂഖ്; എന്നിട്ടും നായികയാവാൻ വിളിച്ചപ്പോൾ നോ പറഞ്ഞ് മധുബാല