ഈ തക്കുടുവാവ ഇന്ന് മലയാളത്തിലെ ശാലീന സുന്ദരി; നായികയെ മനസ്സിലായോ?

ഒമര്‍ ലുലുവിന്റെ സംവിധാത്തില്‍ ഒരുങ്ങിയ ' ഹാപ്പി വെഡ്ഡിങ്ങ്‌സ്' എന്ന ചിത്രത്തിലൂടെ മലയാള സിനിമയിലേയ്ക്കു കാലെടുത്തുവച്ച നായികയാണ് അനു സിതാര. എന്നാല്‍ അനുവിന്റെ അഭിനയ ജീവിതം ആരംഭിക്കുന്നത് 2003 ല്‍ പുറത്തിറങ്ങിയ 'പൊട്ടാസ് ബോബ്' എന്ന ചിത്രത്തിലൂടെയാണ്. പിന്നീട് 'ഒരു ഇന്ത്യന്‍ പ്രണയകഥ', 'അനാര്‍ക്കലി' എന്നീ ചിത്രങ്ങളില്‍ ചെറിയ വേഷങ്ങള്‍ ചെയ്താണ് നായികാപദവിയിലേയ്‌ക്കെത്തുന്നത്. മലയാളികള്‍ ശാലീന സുന്ദരി എന്നു വിശേഷിപ്പിക്കുന്ന അനു സിതാരയുടെ കുട്ടിക്കാല ചിത്രമാണിപ്പോൾ ശ്രദ്ധ നേടുന്നത്.

സോഷ്യൽ മീഡിയയിൽ വളരെയധികം സജീവമായ അനു തന്നെയാണ് ചിത്രം ഷെയർ ചെയ്തത്. മാതൃദിനത്തിലാണ് അനു അമ്മയ്‌ക്കൊപ്പമുള്ള ചിത്രം പങ്കുവച്ചത്. കുഞ്ഞ് അനുവിന്റെ ചിത്രം ആരാധകർ ഏറ്റെടുത്തു കഴിഞ്ഞു.

അബ്ദുൾ സലാം, രേണുക എന്നിവരുടെ മൂത്ത മകളാണ് അനു സിത്താര. വയനാട് സ്വദേശിയായ അനു ഒരു നർത്തകി കൂടയിയാണ്. 2015 ലാണ് ഫൊട്ടൊഗ്രാഫറായ വിഷ്ണുവിനെ അനു വിവാഹം ചെയ്തത്.

'ഫുക്രി', 'രാമന്റെ ഏദന്‍തോട്ടം', ' ആന അലറോടലറല്‍', 'കാപ്റ്റന്‍', 'ഒരു കുട്ടനാടന്‍ ബ്‌ളോഗ്', 'ജോണി ജോണി എസ് അപ്പ', 'ഒരു കുപ്രസിദ്ധ പയ്യന്‍' തുടങ്ങി അനവധി ചിത്രങ്ങളിലൂടെയാണ് അനു സിതാര പ്രേക്ഷകര്‍ക്കു ഏറെ സുപരിചിതയാകുന്നത്. മലയാളത്തില്‍ മാത്രമല്ല തമിഴിലും അനു തന്റെ സാന്നിധ്യം അറിയിച്ചിട്ടുണ്ട്.

അജിത്ത് വി തോമസിന്റെ സംവിധാനത്തിൽ ഒരുങ്ങുന്ന 'സന്തോഷം' ആണ് അനു സിത്താര അവസാനമായി അഭിനയിച്ച ചിത്രം. ഷാജോൺ, മല്ലിക സുകുമാരൻ എന്നിവരാണ് ചിത്രത്തിൽ മറ്റു പ്രധാന വേഷങ്ങൾ ചെയ്യുന്നത്. സിമ്പു ചിത്രം 'പത്തുതല'യിലും അനു വേഷമിട്ടിരുന്നു.