ഹോട്സ്റ്റാറിന്റെ പുതിയ സീരീസ്; 'ലവ് അണ്ടര്‍ കണ്‍സ്ട്രക്ഷൻ' ട്രെയിലർ എത്തി

Love Under Construction Trailer: ഡിസ്നി പ്ലസ് ഹോട്സ്റ്റാറിന്റെ ഏറ്റവും പുതിയ വെബ് സീരീസ് ആയ 'ലവ് അണ്ടർ കൺസ്ട്രക്ഷന്റെ' ട്രെയിലർ പുറത്തിറക്കി. പേരില്ലൂര്‍ പ്രീമിയര്‍ ലീഗ്, നാഗേന്ദ്രന്‍സ് ഹണിമൂണ്‍സ്, 1000 ബേബീസ് തുടങ്ങിയ സൂപ്പർഹിറ്റ് സീരുസകൾക്ക് ശേഷം ഹോട്സ്റ്റാർ പുറത്തിറക്കുന്ന ആറാമത്തെ സീരീസാണ് ലവ് അണ്ടർ കൺസ്ട്രക്ഷൻ.

നീരജ് മാധവും അജു വര്‍ഗീസും ഗൗരി ജി കിഷനും പ്രധാന വേഷങ്ങളിലെത്തുന്ന സീരീസില്‍ മലയാള സിനിമയിലെ നിരവധി പ്രമുഖ താരങ്ങളും സുപ്രധാന വേഷങ്ങളിൽ എത്തുന്നുണ്ട്. വിഷ്ണു ജി. രാഘവ് രചനയും സംവിധാനവും ചെയ്തിരിക്കുന്ന സീരീസിന്റെ സംഗീതസംവിധാനം ഗോപി സുന്ദറാണ്. 

പ്രവാസിയായ ഒരു ചെറുപ്പക്കാരന്റെ വീടെന്ന സ്വപ്നവും അതിനൊപ്പം ജീവിതത്തിലേക്ക് കടന്നുവന്ന പ്രണയവുമെല്ലാമാണ് ലവ് അണ്ടർ കൺസ്ട്രക്ഷന്റെ പ്രമേയം. സീരീസ് ഉടൻ സ്ട്രീമിങ് ആരംഭിക്കുമെന്നാണ് വിവരം. കോമഡിക്കും റൊമാൻസിനും പ്രധാന്യം നൽകിയാണ് സീരീസ് ഒരുക്കുന്നത്. രജപുത്ര വിഷ്വല്‍ മീഡിയയുടെ ബാനറില്‍ എം.രഞ്ജിത്താണ് നിര്‍മ്മാണം.