മോഹൻലാലിന്റെ വലിയ ആരാധകൻ; ഏറ്റവും അർഹമായ അംഗീകാരമാണ് ലഭിച്ചത്; ആശംസയുമായി അമിതാഭ് ബച്ചൻ

ഇന്ത്യൻ സിനിമയിലെ പരമോന്നത ബഹുതിയായ ദാദാസാഹേബ് ഫാൽക്കെ പുരസ്‌കാരം നേടിയ മോഹൻലാലിന് ആശംസയുമായെത്തുകയാണ് സിനിമ ലോകവും ആരാധകരും. പ്രധാനമന്ത്രി നരേന്ദ്ര മോദി, മുഖ്യമന്ത്രി പിണറായി വിജയൻ തുടങ്ങി നിരവധി പ്രമുഖർ മോഹൻലാലിനെ അഭിനന്ദിച്ച് സോഷ്യൽ മീഡിയയിൽ കുറിപ്പ് പങ്കുവച്ചിരുന്നു.

ഇപ്പോഴിതാ, മോഹൻലാലിനെ അഭിനന്ദിച്ച് മലയാളത്തിൽ ആശംസ പങ്കുവച്ചിരിക്കുകയാണ് ബോളിവുഡ് താരം അമിതാഭ് ബച്ചൻ. ഏറ്റവും അർഹമായ അംഗീകാരമാണ് ലഭിച്ചിരിക്കുന്നതെന്നും മോഹൻലാലിന്റെ വലിയ ആരാധകനാണ് താനെന്നും ബച്ചൻ ഫേസ്ബുക്കിൽ കുറിച്ചു. 

'മോഹൻലാൽ ജി... ദാദാ സാഹിബ് ഫാൽക്കെ അവാർഡ് നിങ്ങൾക്ക് ലഭിച്ചതിൽ ഞാൻ വളരെ സന്തോഷവാനാണ്. അതിയായ സന്തോഷം തോന്നുന്നു. ഏറ്റവും അർഹമായ അംഗീകാരമാണിത്. ഒരുപാട് അഭിനന്ദനങ്ങൾ. നിങ്ങളുടെ പ്രവൃത്തിയുടെയും കരകൗശലത്തിന്റെയും വലിയ ആരാധകനാണ് ഞാൻ. അതിരറ്റ ആദരവോടും അഭിമാനത്തോടും കൂടി, ഞാൻ എപ്പോഴും ഒരു സമർപ്പിത ആരാധകനായി തുടരുന്നു. നമസ്കാർ,' അമിതാഭ് ബച്ചൻ കുറിച്ചു.

Also Read: സിനിമാ ജീവിതത്തിലെ ഏറ്റവും വലിയ അവാർഡ്: മോഹൻലാൽ

അതേസമയം, നാൽപ്പത്തിയെട്ട് വർഷം നീണ്ട തന്റെ സിനിമാ ജീവിതത്തിലെ ഏറ്റവും വലിയ പുരസ്‌കാരമാണ് ഇപ്പോൾ ലഭിച്ചിരിക്കുന്നതെന്ന് മോഹൻലാൽ പറഞ്ഞു. ദാദാ സാഹേബ് ഫാൽക്കെ പുരസ്‌കാരം ലഭിച്ചതിന് ശേഷം കൊച്ചിയിൽ ആദ്യമായി മാധ്യമങ്ങളോട് പ്രതികരിക്കവേയാണ് അദ്ദേഹം ഇക്കാര്യം വ്യക്തമാക്കിയത്. വാർത്താസമ്മേളനത്തിൽ ജൂറിയ്ക്കും കേന്ദ്ര സർക്കാരിനും മോഹൻലാൽ നന്ദി പ്രകാശിപ്പിച്ചു.

"ഈ പുരസ്‌കാരം മലയാള സിനിമയ്ക്ക് സമർപ്പിക്കുന്നു. 48 വർഷത്തെ സിനിമ ജീവിതത്തിൽ കിട്ടിയ ഏറ്റവും വലിയ അവാർഡ് ആണിത്. ഇതിനു മുൻപ് ഈ അവാർഡ് കിട്ടിയത് മഹാരഥൻമാർക്കാണ്. കൂടെയുള്ള എല്ലാവരെയും ഓർക്കുന്നു, ഇന്ത്യൻ സിനിമയിലെ അവാർഡ് മലയാള സിനിമയ്ക്കു ലഭിച്ചതിൽ വളരെ സന്തോഷം. ഞാൻ പ്രവർത്തിക്കുന്ന മേഖലയാണ് എനിക്ക് ഈശ്വരൻ. അതുകൊണ്ടാണ് ഈശ്വരൻ തന്ന അവാർഡ് എന്ന് പറയുന്നത്. നമ്മളുടെ പ്രവർത്തി മണ്ഡലത്തിൽ നമ്മൾ കാണിക്കുന്ന സത്യസന്ധത കൂടിയുണ്ട്. ഈ അവാർഡ് എല്ലാവരുമായി ഞാൻ പങ്കു വയ്ക്കുന്നു." - മോഹൻലാൽ പറഞ്ഞു. 

Also Read: ഈ കിരീടത്തിന് അർഹൻ; മോഹൻലാലിനെ അഭിനന്ദിച്ച് മമ്മൂട്ടി

പ്രധാനമന്ത്രിയുടെ ഓഫീസിൽ നിന്നാണ് പുരസ്‌കാരം ലഭിച്ച വിവരം ആദ്യം അറിയിക്കുന്നതെന്നും മോഹൻലാൽ വാർത്താസമ്മേളനത്തിൽ പറഞ്ഞു. "പ്രധാനമന്ത്രിയുടെ ഓഫീസിൽ നിന്ന് പുരസ്‌കാര വിവരം പറയാൻ വിളിച്ചപ്പോൾ ആദ്യം വിശ്വസിക്കാനായില്ല, അതൊരു വൈൽഡ് ഡ്രീം മാത്രമാണെന്ന് തോന്നി, ഒന്ന് കൂടെ പറയു എന്ന് ഞാൻ പറഞ്ഞു."- മോഹൻലാൽ പറഞ്ഞു. 

വിമർശനങ്ങൾ തോളിലേറ്റി നടക്കുന്ന ആളല്ല താനെന്നും മോഹൻലാൽ വ്യക്തമാക്കി. "സിനിമയ്ക്കു ഇപ്പോൾ പരിമിതികൾ ഇല്ല. സിനിമ എന്നത് പാൻ ഇന്ത്യൻ ആയി, സംവിധാനം ചെയ്യണം എന്ന തോന്നൽ വന്നാൽ ഇനിയും ചെയ്തേക്കും. സിനിമയ്ക്കു അപ്പുറത്തേക്കുള്ള സ്വപ്നം എന്തെന്ന് ചോദിച്ചാൽ ഇപ്പോൾ പറയാനാവില്ല, വളരെ കുറച്ചു സ്വപ്നം കാണുന്ന ആളാണ് ഞാൻ," മോഹൻലാൽ പറഞ്ഞു. 

Read More: നടന വിസ്മയത്തിന് ആദരം; മോഹൻലാലിന് ദാദാ സാഹേബ് ഫാൽക്കെ അവാർഡ്