ഐഎസ്‌സി-ഐസിഎസ്ഇ പരീക്ഷാ ഫലം പ്രഖ്യാപിച്ചു

ന്യൂഡൽഹി:  ഐഎസ്‌സി - ഐസിഎസ്‌ഇ പരീക്ഷാ ഫലം പ്രസിദ്ധീകരിച്ചു. ഐസിഎസ്ഇ (പത്താം ക്ലാസ്) വിജയശതമാനം 99.47% ആണ്. ഐഎസ്‌സി (പന്ത്രണ്ടാം ക്ലാസ്) വിജയശതമാനം ഇത്തവണ 98.19% ആണ്. അതായത് ഐസിഎസ്ഇയിൽ 2,42,328 കുട്ടികളും ഐഎസ്‌സിയിൽ 98,088 കുട്ടികളും വിജയിച്ചു. cisce.org, results.cisce.org എന്നീ വെബ്സൈറ്റ് വഴി വിദ്യാർത്ഥികൾക്ക് ഫലം പരിശോധിക്കാം.

ഐഎസ്‌സിയിൽ കേരളം അടങ്ങുന്ന തെക്കൻ മേഖലയിൽ വമ്പിച്ച വിജയമാണ്. പരീക്ഷയെഴുതിയവരിൽ 99.53% പേരും പന്ത്രണ്ടാം ക്ലാസിൽ വിജയിച്ചു. അതേസമയം, ഐസിഎസ്ഇയിൽ പശ്ചിമ മേഖലയിലാണ് വിജയശതമാനം കൂടുതൽ, 99.91. എന്നാൽ, ഐസിഎസ്ഇ പരീക്ഷ എഴുതിയ പെൺകുട്ടികളിൽ തെക്കൻ മേഖലയിലാണ് കൂടുതൽ വിജയശതമാനം, 49.52. 

കേരളത്തിൽ പത്താം ക്ലാസിൽ 99.99% വിദ്യാര്‍ത്ഥികളും പന്ത്രണ്ടാം ക്ലാസിൽ 99.93% വിദ്യാര്‍ത്ഥികളും വിജയിച്ചു. സംസ്ഥാനത്ത് ഐസിഎസ്ഇ വിഭാഗത്തിൽ 7186 കുട്ടികളും ഐഎസ്‌സിയിൽ 2822 കുട്ടികളുമാണ് പരീക്ഷ എഴുതിയത്. ഐസിഎസ്ഇയിലും ഐഎസ്‌സിയിലും സംസ്ഥാനത്ത് പരീക്ഷയെഴുതിയ മുഴുവൻ പെൺകുട്ടികളും ജയിച്ചു. എന്നാൽ ഐസിഎസ്ഇയിൽ ആൺകുട്ടികളിൽ 99.97% ആണ് വിജയം. ഐഎസ്‌സിയിൽ ആൺകുട്ടികളുടെ വിജയശതമാനം 99.85 ആണ്. 

ഇംപ്രൂവ്മെന്റ് പരീക്ഷകൾ ജൂലൈയിൽ നടക്കും. പരമാവധി രണ്ടു വിഷയങ്ങളിലാണ് ഇംപ്രൂവ്മെന്റ് പരീക്ഷകൾ എഴുതാനാവുക. ഇംപ്രൂവ്മെന്റ് പരീക്ഷ സംബന്ധിച്ച കൂടുതൽ വിവരങ്ങൾ വൈകാതെ ഔദ്യോഗിക വെബ്സൈറ്റിൽ പ്രസിദ്ധീകരിക്കും. 

Read More

• 24 ലക്ഷം വിദ്യാർത്ഥികൾ നീറ്റ് പരീക്ഷയെഴുതി, ചോദ്യ പേപ്പർ ചോർന്നതായി ആരോപണം
• കെജിറ്റിഇ പ്രിന്റിങ് ടെക്‌നോളജി കോഴ്‌സുകളിലേക്ക് അപേക്ഷിക്കാം
• സ്കൂളുകൾ ജൂൺ മൂന്നിന് തുറക്കും
• കെ-ടെറ്റ് പരീക്ഷ: അവസാന തീയതി മേയ് അഞ്ചുവരെ നീട്ടി