ഈ വീട് നിറയെ അമ്മൂമ്മയുടെ ഓർമകളാണ്, വീടൊഴിയൽ സങ്കടകരമായിരുന്നു: സൗഭാഗ്യ

ഡിസംബർ ഒന്നിനായിരുന്നു അഭിനേത്രിയും സംഗീതഞ്ജയുമായ സുബ്ബലക്ഷ്മി വിടവാങ്ങിയത്. സുബ്ബലക്ഷ്മി അവശേഷിപ്പിച്ച ശൂന്യതയോട് പൊരുത്തപ്പെട്ടുവരുന്നേയുള്ളൂ മകൾ താരാ കല്യാണും പേരക്കുട്ടി സൗഭാഗ്യ വെങ്കിടേഷുമൊക്കെ. 

അമ്മൂമ്മ താമസിച്ച വീടൊഴിഞ്ഞു കൊടുക്കുന്നതിന്റെ സങ്കടകരമായൊരു വീഡിയോ ആണ് സൗഭാഗ്യ സമൂഹമാധ്യമങ്ങളിൽ ഷെയർ ചെയ്തിരിക്കുന്നത്. 

"ഒരു മനുഷ്യായുസ്സിൽ സ്വന്തമാക്കിയ പ്രിയപ്പെട്ടതെല്ലാം ഉപേക്ഷിച്ചുള്ള പോക്ക്. മനുഷ്യൻ എത്ര നിസ്സാരൻ ആണെന്ന് ഈ വീഡിയോ വീണ്ടും വീണ്ടും ഓർമിപ്പിക്കുന്നു," എന്നാണ് വീഡിയോയ്ക്ക് താഴെ പ്രത്യക്ഷപ്പെടുന്ന കമന്റുകളിലൊന്ന്. 

തിരുവനന്തപുരം സ്വദേശിനിയായ സുബ്ബലക്ഷ്മി കുട്ടിക്കാലത്ത് തന്നെ സംഗീതം പരിശീലിച്ചിരുന്നു. ജവഹർ ബാലഭവനിൽ ഏകദേശം 27 വർഷക്കാലം സംഗീതാധ്യാപികയായി ജോലി നോക്കി. ആകാശവാണിയിലും പ്രവർത്തിച്ചിരുന്നു. ജോലിയിൽ നിന്ന് റിട്ടയർ ചെയ്ത ശേഷം ഹോർലിക്സിന്റെ ഒരു പരസ്യചിത്രത്തിലൂടെയാണ് ക്യാമറയുടെ മുന്നിലെത്തുന്നത്. 

നർത്തകിയും അഭിനേത്രിയുമായ മകൾ താരാകല്യാണിനൊപ്പം ടെലിവിഷൻ പരമ്പരയുടെ ചിത്രീകരണ സെറ്റിൽ എത്തിയപ്പോൾ നടൻ സിദ്ധിക്കിനെ പരിചയപ്പെട്ടു. സിദ്ധിക്ക് വഴിയാണ് 'നന്ദനം' സിനിമയിലേക്ക് എത്തിച്ചേർന്നത്.  തുടർന്ന് ഏറെ സിനിമകളിൽ മുത്തശ്ശിയായും ഹാസ്യരസപ്രധാനമായ വേഷങ്ങളും അവതരിപ്പിച്ചു. കല്യാണരാമൻ, പാണ്ടിപ്പട, നന്ദനം, രാപ്പകൽ എന്നിവയെല്ലാം ശ്രദ്ധേയ ചിത്രങ്ങളാണ്. 'മേരിക്കുണ്ടൊരു കുഞ്ഞാട്' എന്ന ചിത്രത്തിലെ ഗാനം ആലപിച്ച് ചലച്ചിത്ര പിന്നണി ഗാനരംഗത്തും തുടക്കമിട്ടിരുന്നു.  ഇപ്പോള്‍ മലയാളം കടന്നു ബോളിവുഡില്‍ വരെ എത്തിയിട്ടുണ്ട് സുബ്ബലക്ഷ്മിയമ്മ. അകാലത്തില്‍ അന്തരിച്ച യുവതാരം സുശാന്ത് സിങ് രജ്‌പുത് നായകനായ 'ദിൽ ബെച്ചാര' എന്ന ചിത്രത്തിലൂടെയായിരുന്നു സുബ്ബലക്ഷ്മിയമ്മയുടെ ഹിന്ദി അരങ്ങേറ്റം.

Read more:  

• മമ്മൂട്ടി ചോദിച്ചു, എന്നാല്‍ ഞാന്‍ ഡാര്‍ലിംഗ് എന്ന് വിളിച്ചോട്ടേ?; സൂപ്പര്‍സ്റ്റാറുമായുള്ള സുബ്ബലക്ഷ്മിയമ്മയുടെ'സ്നേഹക്കഥ'
• ഇതാണ് അമ്മൂമ്മയുടെ വീട്ടിൽ നിന്നും എനിക്ക് കിട്ടിയ സ്വത്ത്: സൗഭാഗ്യ