ചാറ്റ്ജിപിടിയിലെ ആശയക്കുഴപ്പം; ഇന്ത്യ മുതൽ യുകെ വരെയുള്ള രാജ്യങ്ങളുടെ പ്രതികരണം എങ്ങനെ?

ചാറ്റ്ജിപിടി ലോകമെങ്ങും വൈറൽ സെൻസേഷനായി മാറിയെന്നതിൽ സംശയമില്ല. 2022 നവംബറിലാണ് ചാറ്റ്ജിപിടി പുറത്തിറങ്ങിയത്. മൂന്നു മാസത്തിനുള്ളിൽ 100 ​​ദശലക്ഷം ഉപയോക്താക്കളിലേക്ക് എത്തിയ ഏറ്റവും വേഗതയേറിയ സേവനങ്ങളിൽ ഒന്നാണ് ഓപ്പൺഎഐയുടെ ചാറ്റ്ബോട്ട്. 

പ്രായപൂർത്തിയാകാത്തവർ ആർട്ടിഫിഷ്യൽ ഇന്റലിജൻസ് ചാറ്റ്‌ബോട്ട് ആക്‌സസ് ചെയ്യുന്നത് തടയുന്നതിനുള്ള വ്യക്തമായ മാർഗരേഖകളുടെ അഭാവത്താലും വ്യക്തിഗത ഡാറ്റയുടെ ശേഖരണത്തെക്കുറിച്ചുള്ള ആശങ്കകളും കാരണം കഴിഞ്ഞ മാസം അവസാനം ഇറ്റലി ചാറ്റ്ജിപിടി നിരോധിച്ചിരുന്നു. നിരോധിച്ചു.

ഇറ്റാലിയൻ ഉപയോക്താക്കളുടെ ഡാറ്റ പ്രോസസ് ചെയ്യുന്നതിൽ നിന്ന് അവരെ തടയുന്നതിനായി ചാറ്റ്ജിപിടിയുടെ കമ്പനിയായ ഓപ്പൺ എഐയ്ക്ക് താൽക്കാലികവും എന്നാൽ ഉടനടിയുള്ളതുമായ നിയന്ത്രണം ഏർപ്പെടുത്തിയതായി ഇറ്റാലിയൻ ഡാറ്റാ പ്രൊട്ടക്ഷൻ അതോറിറ്റി അറിയിച്ചു. ചാറ്റ്ബോട്ട് യൂറോപ്യൻ യൂണിയന്റെ ജനറൽ ഡാറ്റ പ്രൊട്ടക്ഷൻ റെഗുലേഷൻ (ജിഡിപിആർ) ലംഘിക്കുന്നുണ്ടോ എന്നതിനെക്കുറിച്ച് അന്വേഷണം ആരംഭിക്കാനും പദ്ധതിയിടുന്നുണ്ട്.

എന്നാൽ ചാറ്റ്ജിപിടി പോലെയുള്ള ജനറേറ്റീവ് എഐ സോഫ്റ്റ്‌വെയറിനെ നിയന്ത്രിക്കാൻ ശ്രമിക്കുന്ന ഒരേയൊരു രാജ്യം ഇറ്റലിയല്ല. എഐയെ നിയന്ത്രിക്കുന്നതിനുള്ള ആഹ്വാനങ്ങൾ ടെക് കമ്പനികളെ എതിർത്ത് കൊണ്ട് തന്നെ സർക്കാരുകൾ​ തീരുമാനിക്കുന്നു. ഇന്ന് എഐയുടെ ദ്രുതഗതിയിലുള്ള പുരോഗതിയോട് ലോകമെമ്പാടുമുള്ള രാജ്യങ്ങൾ എങ്ങനെ പ്രതികരിച്ചുവെന്ന് നോക്കാം.

യൂറോപ്യൻ യൂണിയൻ(ഇയു)

സാങ്കേതിക നിയന്ത്രണങ്ങളിൽ ഇയു പലപ്പോഴും മുൻപന്തിയിലാണ്. ഒരുപക്ഷേ ഐ ഫോൺ 15നൊപ്പം ആപ്പിൾ യുഎസ്ബി-സി തിരഞ്ഞെടുക്കാനുള്ള സാധ്യതയ്ക്ക് പിന്നിലുള്ള പ്രധാന കാരണവും ഇതാണ്. 27-രാഷ്ട്രങ്ങൾ ഉൾപ്പെടുന്ന യൂണിയൻ എഐയിൽ വളരെ നിയന്ത്രിത നിലപാട് സ്വീകരിക്കുമെന്നാണ് പ്രതീക്ഷിക്കുന്നത്. കൂടാതെ യൂറോപ്യൻ എഐ നിയമം എന്നറിയപ്പെടുന്ന നിയമനിർമ്മാണത്തിനായി നിർദേശിച്ചിട്ടുമുണ്ട്.

ആർട്ടിഫിഷ്യൽ ഇന്റലിജൻസിന് വേണ്ടിയുള്ള ഒരു പൊതു നിയന്ത്രണവും നിയമ ചട്ടക്കൂടുമാണ് യൂറോപ്യൻ എഐ നിയമം ലക്ഷ്യമിടുന്നത്. ഇത് വ്യത്യസ്‌ത എഐ ടൂളുകളെ അവരുടെ റിസ്ക് ലെവൽ അനുസരിച്ച് തരംതിരിക്കും. കൂടാതെ അവ നൽകുന്നവരോ ഉപയോഗിക്കുന്നവരോ ആയവരിൽ സുതാര്യത ആവശ്യകതകളും ചുമത്തും. ജനറൽ ഡാറ്റ പ്രൊട്ടക്ഷൻ റെഗുലേഷൻ (ജിഡിപിആർ) പോലെയുള്ള മറ്റ് നിയമങ്ങളുടെ ഒപ്പം എഐ നിയമം പ്രവർത്തിക്കും.

എന്നിരുന്നാലും, നിയമം ഡ്രാഫ്റ്റ് ചെയ്തശേഷം, ആദ്യമായി തയ്യാറാക്കിയപ്പോൾ, 2022-ലും അതിനുശേഷവും എഐയുടെ ദ്രുതഗതിയിലുള്ള മുന്നോറ്റത്തെക്കുറിച്ച് ഉദ്യോഗസ്ഥർ കണക്കാക്കിയിരുന്നില്ല.

ഇയുവിന്റെ കരട് നിയമങ്ങളിൽ "ജനറൽ പർപ്പസ് എഐ സിസ്റ്റംസ്" (ജിപിഎഐഎസ്) വിഭാഗത്തിന് കീഴിൽ ചാറ്റ്ജിപിടി ഉൾപ്പെട്ടേക്കാമെന്ന്, റോയിട്ടേഴ്‌സ് ഒരു റിപ്പോർട്ടിൽ പറയുന്നു. ഇത് നിരവധി ഫംഗ്‌ഷനുകൾ നിർവഹിക്കാൻ അനുയോജ്യമായ ഉപകരണങ്ങളെ വിവരിക്കുന്നതാണ്. ജിപിഎഐഎസ് വിഭാഗത്തിനെ ഉയർന്ന അപകടസാധ്യതയുള്ളതായി കണക്കാക്കുമോ എന്ന് കണ്ടറിയണം.

എന്തായാലും, ചാറ്റ്ജിപിടി പൂർണ്ണമായും നിരോധിക്കാനുള്ള ഇറ്റലിയുടെ നീക്കം മറ്റ് യൂറോപ്യൻ രാജ്യങ്ങളെ ചാറ്റ്ബോട്ടുകളെ നിയന്ത്രിക്കാൻ കഠിനമായ നടപടികൾ ആവശ്യമാണോ എന്നും അത്തരം പ്രവർത്തനങ്ങൾ ഏകോപിപ്പിക്കേണ്ടതുണ്ടോ എന്നും പഠിക്കാൻ പ്രേരിപ്പിച്ചു.

യുകെ

കഴിഞ്ഞ ആഴ്ച, യുകെ എഐ നിയന്ത്രിക്കുന്നതിനുള്ള പദ്ധതികൾ പ്രഖ്യാപിച്ചിരുന്നു. സാങ്കേതികവിദ്യയെ നിയന്ത്രിക്കുന്നതിനുള്ള സമീപനത്തിന്റെ രൂപരേഖയും അവതരിപ്പിച്ചു. എന്നാൽ ഇയുവിനെ പോലെ പുതിയ നിയന്ത്രണങ്ങൾ സ്ഥാപിക്കുന്നതിനു പകരം, എഐയിൽ നിലവിലുള്ള നിയന്ത്രണങ്ങൾ ഉൾപ്പെടുത്താനാണ് യുകെ സർക്കാർ വിവിധ മേഖലകളിലെ റെഗുലേറ്റർമാരോട് ആവശ്യപ്പെടുന്നത്.

കഴിഞ്ഞ ആഴ്‌ച പ്രസിദ്ധീകരിച്ച ഒരു ധവളപത്രത്തിൽ, ഡിപ്പാർട്ട്‌മെന്റ് ഫോർ സയൻസ്, ഇന്നൊവേഷൻ ആൻഡ് ടെക്‌നോളജി (ഡിഎസ്ഐടി), കമ്പനികൾ പിന്തുടരാൻ ആഗ്രഹിക്കുന്ന 5 തത്ത്വങ്ങളുടെ രൂപരേഖ പുറത്തിറക്കി. സുരക്ഷ, സുതാര്യത, ഉത്തരവാദിത്തം, ഗവർണൻസ്, മത്സരക്ഷമത, പരിഹാരം തുടങ്ങിയവയെല്ലാം ഇതിൽ ഉൾപ്പെടുന്നു.

ഈ ഘട്ടത്തിൽ, യുകെ ചാറ്റ്ജിപിടി അല്ലെങ്കിൽ മറ്റേതെങ്കിലും തരത്തിലുള്ള എഐയിൽ നിയന്ത്രണങ്ങൾ നിർദ്ദേശിക്കുന്നില്ല. പകരം, രാജ്യം മറ്റൊരു സമീപനത്തിനായി തയ്യാറെടുക്കുന്നതായി തോന്നുന്നു. "റെഗുലേറ്റർമാർ തത്ത്വങ്ങൾ സ്ഥിരമായി പരിഗണിക്കുന്നുവെന്ന് ഉറപ്പാക്കാൻ" നിയമനിർമ്മാണം "അവതരിപ്പിക്കാനാകുമെന്ന്" ഡിഎസ്ഐടി പറയുന്നു. എന്നാൽ ഇത് എപ്പോഴാണെന്ന് കൃത്യമായി വ്യക്തമാക്കിയിട്ടില്ല.

“അടുത്ത പന്ത്രണ്ട് മാസങ്ങളിൽ, റെഗുലേറ്റർമാർ ഓർഗനൈസേഷനുകൾക്കും റിസ്ക് അസസ്മെന്റ് ടെംപ്ലേറ്റുകൾ പോലുള്ള മറ്റ് ഉപകരണങ്ങളും ഉറവിടങ്ങളും അവരുടെ മേഖലകളിൽ ഈ തത്ത്വങ്ങൾ എങ്ങനെ നടപ്പിലാക്കണമെന്ന് വ്യക്തമാക്കുന്നതിന് പ്രായോഗിക മാർഗനിർദേശം നൽകും,” സർക്കാർ പറഞ്ഞു.

അമേരിക്ക

യുണൈറ്റഡ് സ്റ്റേറ്റ്സിന് ഇതുവരെ എഐ സംബന്ധിച്ച് സമഗ്രമായ ഫെഡറൽ നിയമനിർമ്മാണം ഇല്ല. പകരം, റിക്രൂട്ട്‌മെന്റിലോ ജോലിയിലോ ഉള്ള എഐയിൽ ശ്രദ്ധ കേന്ദ്രീകരിച്ച് നിലവിലുള്ള എഐ റെഗുലേറ്ററി ചട്ടക്കൂടുകളുടെ നവീകരണം നടത്തേണ്ടതുണ്ട്. എഐ ഗവേണൻസിനായി ചില പൊതു തത്വങ്ങളും ലക്ഷ്യങ്ങളും യോജിപ്പിക്കാൻ ലക്ഷ്യമിടുന്ന ഇയുവുമായി യുഎസിന് ഒരു പുതിയ ട്രേഡ് ആൻഡ് ടെക്നോളജി കൗൺസിൽ (ടിടിസി)ഉണ്ട്.

എന്നിരുന്നാലും, രാജ്യത്തെ നാഷണൽ ഇൻസ്റ്റിറ്റ്യൂട്ട് ഓഫ് സയൻസ് ആൻഡ് ടെക്‌നോളജി (എൻഐഎസ്ടി) എഐ റിസ്ക് മാനേജ്‌മെന്റ് ചട്ടക്കൂട് പ്രോത്സാഹിപ്പിക്കുന്നു. അത് എഐ ഉപയോഗിക്കുന്ന കമ്പനികൾക്ക് "എഐയുടെ രൂപകൽപ്പന, വികസനം, ഉപയോഗം, മൂല്യനിർണ്ണയം, എഐ ഉൽപ്പന്നങ്ങളും സേവനങ്ങളും സംവിധാനങ്ങളും എന്നിവയിൽ വിശ്വാസയോഗ്യമായ പരിഗണനകൾ ഉൾപ്പെടുത്താനുള്ള കഴിവ് എങ്ങനെ മെച്ചപ്പെടുത്താം എന്നതിനെക്കുറിച്ചുള്ള മാർഗ്ഗനിർദ്ദേശം നൽകുന്നു."

എന്നാൽ ചട്ടക്കൂട് സ്വമേധയാ ഉള്ളതിനാൽ, ഇത് നടപ്പിലാക്കാത്ത കമ്പനികൾക്ക് ഒരു തരത്തിലും പിഴ ചുമത്തില്ല. രാജ്യത്ത് ചാറ്റ്ജിപിടി പരിമിതപ്പെടുത്താൻ യുഎസും ഇതുവരെ ഒരു നടപടിയും സ്വീകരിച്ചിട്ടില്ല.

കഴിഞ്ഞ മാസം, ജിപിടി 4ന്റെ വാണിജ്യ വിന്യാസങ്ങളിൽ നിന്ന് ഓപ്പൺ എഐയെ തടയാൻ എഐ തിങ്ക് ടാങ്ക് എഫ്ടിസിക്ക് പരാതി നൽകിയിരുന്നു. ഓപ്പൺഎഐ എഫ്ടിസി ആക്ടിന്റെ വകുപ്പ് ലംഘിച്ചുവെന്നും എഐ കമ്പനി വഞ്ചനാപരവും അന്യായവുമായ രീതികൾ നടത്തുന്നതായും സെന്റർ ഫോർ ആർട്ടിഫിഷ്യൽ ഇന്റലിജൻസ് ആൻഡ് ഡിജിറ്റൽ പോളിസി (സിഎഐഡിപി) ആരോപിക്കുന്നു. പരാതി ഓപ്പൺഎഐയെക്കുറിച്ചുള്ള അന്വേഷണത്തിലേക്കും അതിന്റെ എൽഎൽഎമ്മുകളുടെ വാണിജ്യ വിന്യാസം താൽക്കാലികമായി നിർത്തിവയ്ക്കുന്നതിലേക്കും നയിച്ചേക്കാം.

ഇന്ത്യ

ഇന്ത്യയുടെ ആസൂത്രണ കമ്മീഷനായ നീതി ആയോഗ്, എഐയ്ക്കുള്ള മാർഗ്ഗനിർദ്ദേശങ്ങളായി നാഷണൽ സ്റ്റാറ്റർജി ഫോർ ആർട്ടിഫിഷ്യൽ ഇന്റലിജൻസ്, റെസ്പോൺസബിൾ എഐ റിപ്പോർട്ട് എന്നിവ പുറത്തിറക്കിയിട്ടുണ്ട്. സാമൂഹികവും സാമ്പത്തികവുമായ ഉൾപ്പെടുത്തൽ, നവീകരണം, വിശ്വാസ്യത എന്നിവയിൽ ഊന്നൽ നൽകിക്കൊണ്ട് ഇന്ത്യയിൽ എഐ വികസിപ്പിക്കുന്നതിനും വിന്യസിക്കുന്നതിനുമുള്ള കാഴ്ചപ്പാട്, ലക്ഷ്യങ്ങൾ, മര്യാദകൾ എന്നിവ ഈ രേഖകളിൽ വിവരിക്കുന്നു.

എന്നിരുന്നാലും, ഈ രേഖകൾ നിയമപരമായി ബാധ്യസ്ഥമല്ല. ഉത്തരവാദിത്തം, ബാധ്യത, സുതാര്യത, വിശദീകരണം, മാനുഷിക മേൽനോട്ടം എന്നിവ പോലെ എഐയുമായി ബന്ധപ്പെട്ട ചില പ്രധാന പ്രശ്നങ്ങളെയും വെല്ലുവിളികളെയും ഇത് അഭിമുഖീകരിക്കുന്നില്ല.

ചൈന

ചൈന ഔദ്യോഗികമായി ചാറ്റ്ജിപിടി തടഞ്ഞിട്ടില്ലെങ്കിലും, ചാറ്റ്ബോട്ടിൽ സൈൻ അപ്പ് ചെയ്യാൻ ഓപ്പൺഎഐ രാജ്യത്തെ ഉപയോക്താക്കളെ അനുവദിക്കുന്നില്ല. റഷ്യ, ചൈന, ഉത്തരകൊറിയ, ഈജിപ്ത്, ഇറാൻ, ഉക്രെയ്ൻ എന്നിവ പോലെ കനത്ത ഇന്റർനെറ്റ് സെൻസർഷിപ്പ് ഉള്ള മറ്റ് രാജ്യങ്ങളിൽ നിന്നുള്ള ഉപയോക്താക്കളെയും ഓപ്പൺ എഐ തടയുന്നു.

ചാറ്റ്ജിപിടി ലഭ്യമല്ലെങ്കിലും, എഐയിൽ ചൈന ഒരു ആഗോള നേതാവായി തുടരുന്നു. എഐ ഗവേഷണത്തിലും വളരെയധികം നിക്ഷേപം നടത്തുന്നുണ്ട്. ചൈനയിലെ ടെക് കമ്പനികൾ സ്വന്തമായി എൽഎൽഎമ്മുകൾ (വലിയ ഭാഷാ മോഡലുകൾ) വികസിപ്പിച്ചുകൊണ്ടിരിക്കുകയാണ്. അവർ ഇതിനകം തന്നെ സെർച്ച് എഞ്ചിനായ ബയ്ഡുവിനെ ചാറ്റ്ജിപിടിയുടെ എതിരാളികളായി പ്രഖ്യാപിച്ചിരുന്നു.