Apple iPhone 17 Launch: ആപ്പിൾ ആരാധകരുടെ കാത്തിരിപ്പിന് വിരാമം; ഐഫോൺ 17 സീരീസ് ലോഞ്ച് ഇന്ന്

ആപ്പിൾ ആരാധകരുടെ ആകാംക്ഷയ്ക്കും കാത്തിരിപ്പിനും വിരാമമിട്ട് ഐഫോൺ 17 സീരീസ് ഇന്ന് അവതരിപ്പിക്കും. കാലിഫോർണിയയിലെ കമ്പനിയുടെ ആസ്ഥാനത്ത് രാത്രി 10.30 മുതലാണ് ലോഞ്ച് ഇവന്റ്. "ഏവ് ഡ്രോപിങ്" എന്നു പേരിട്ടിരിക്കുന്ന ചടങ്ങിൽ ഐഫോൺ 17 സീരീസിനു പുറമോ, ആപ്പിൾ വാച്ചിൻ്റെയും എയർപോഡുകളുടെയും ഏറ്റവും പുതിയ ശ്രേണിയും കമ്പനി അവതരിപ്പിക്കുമെന്നാണ് പ്രതീക്ഷ.

ഐഫോൺ 17, ഐഫോൺ 17 പ്രോ, ഐഫോൺ 17 പ്രോ മാക്സ്, ഐഫോൺ 17 എയർ എന്നീ നാലു മോഡലുകളാകും പുതിയ തലമുറ ഐഫോണ്‍ ലൈനപ്പിലുണ്ടാവുക. 5.5 എംഎം കനമുള്ള ഐഫോൺ 17 എയർ ഏറ്റവും കനംകുറഞ്ഞ ഐഫോൺ മോഡലെന്നാണ് ആപ്പിൾ വിശേഷിപ്പിക്കുന്നത്. മുൻ മോഡലുകളിൽ നിന്ന് വ്യത്യസ്തമായി പുത്തൻ ഡിസൈനിലാകും പ്രോ മോഡലുകൾ എത്തുകയെന്നാണ് സൂചന.

അതേസമയം, ആപ്പിൾ വാച്ച് സീരീസ് 11 ന്റെ ഡിസൈനിൽ കാര്യമായ മാറ്റമുണ്ടാകാൻ സാധ്യതയില്ല. വാച്ച് സീരീസ് 10 ന്റെ അതേ ഡിസൈൻ നിലനിർത്തി ഡിസ്പ്ലെ ബ്രൈറ്റ്നസ് വർധിപ്പിക്കാനാണ് സാധ്യത. ആപ്പിളിന്റെ താരതമ്യേന വില കുറഞ്ഞ മോഡലായ ആപ്പിൾ വാച്ച് എസ്ഇയിൽ വലിയ സ്ക്രീനും വേഗതയേറിയ ചിപ്പും ഉൾപ്പെടുത്തുമെന്ന് റിപ്പോർട്ടുണ്ട്.

Also Read: നിങ്ങളുടെ സ്‌മാർട്ഫോണിന്റെ ബാറ്ററി ലൈഫ് കൂട്ടാൻ അഞ്ച് വഴികൾ

എയർപോഡ്സ് പ്രോ സീരീസിൽ ഇത്തവണ ആപ്പിൾ കാര്യമായ അപ്ഗ്രേഡുകൾ ഉൾപ്പെടുത്തുമെന്നാണ് പ്രതീക്ഷ. ഈ വർഷം ആദ്യം പുറത്തിറക്കിയ പവർബീറ്റ്സിന് സമാനമായി 'ഹാർട്ട് റേറ്റ് മോണിറ്റർ' ഉൾപ്പെടുത്തുന്നത് കമ്പനി പരീക്ഷിച്ചുവെന്ന് ബ്ലൂംബെർഗിൽ നിന്നുള്ള മാർക്ക് ഗുർമാൻ അവകാശപ്പെട്ടിരുന്നു. എയർപോഡിൽ സംഭാഷണങ്ങൾ തത്സമയം വിവർത്തനം ചെയ്യാനാകുന്ന ഫീച്ചർ ആപ്പിൾ വികസിപ്പിച്ചുകൊണ്ടിരിക്കുകയാണെന്നും റിപ്പോർട്ടുണ്ട്.

ആപ്പിൾ 'ഏവ് ഡ്രോപിങ്' ഇവന്റ് എവിടെ, എപ്പോൾ കാണാം?

ഇന്ത്യൻ സമയം രാത്രി 10:30-ന് ഇവന്റ് ആരംഭിക്കും. ആപ്പിളിന്റെ ഔദ്യോഗിക വെബ്‌സൈറ്റിലും ആപ്പിൾ ടിവി ആപ്പിലും ആപ്പിളിന്റെ യൂട്യൂബ് ചാനലിലും പരിപാടി തത്സമയം സംപ്രേഷണം ചെയ്യും.

Also Read: ഈ സെറ്റിങ്സ് മാറ്റിയില്ലെങ്കിൽ ഗൂഗിൾ ജെമിനി നിങ്ങളുടെ വാട്ട്‌സ്ആപ്പ് ചാറ്റ് വായിക്കും