Champions Trophy: ഒരോവറിൽ അഞ്ച് വൈഡ്; 11 പന്തുകൾ; ഷമിക്ക് നാണക്കേടിന്റെ റെക്കോർഡ്

india Vs Pakistan Match: ചാംപ്യൻസ് ട്രോഫിയിലെ പാക്കിസ്ഥാന് എതിരായ നിർണായക മത്സരത്തിൽ നാണക്കേടിന്റെ ഒരു റെക്കോർഡിലേക്ക് വീണ് ഇന്ത്യൻ ഫാസ്റ്റ് ബോളർ മുഹമ്മദ് ഷമി. ഏകദിനത്തിൽ ഏറ്റവും നീണ്ട ഓവർ എറിയുന്ന ഇന്ത്യൻ താരം എന്ന റെക്കോർഡ് ആണ് മുഹമ്മദ് ഷമിയുടെ പേരിലേക്ക് വന്നത്. ഇതിന് മുൻപ് രണ്ട് ഇന്ത്യൻ ബോളർമാരും ഏകദിനത്തിൽ ഒരോവറിൽ 11 ഡെലിവറികൾ എറിഞ്ഞിട്ടുണ്ട്. 

പാക്കിസ്ഥാന് എതിരെ ഇന്ത്യയുടെ ബോളിങ് ഓപ്പൺ ചെയ്ത മുഹമ്മദ് ഷമിയിൽ നിന്ന് ആദ്യ ഓവറിൽ അഞ്ച് വൈഡുകളാണ് വന്നത്. ഇതോടെ മുഹമ്മദ് ഷമിക്ക് ആ ഓവറിൽ എറിയേണ്ടി വന്നത് 11 പന്തുകൾ. ഈ ഓവറിൽ പാക്കിസ്ഥാന് ആറ് റൺസ് ലഭിച്ചപ്പോൾ അതിൽ അഞ്ചും വൈഡ് ഡെലിവറിയിൽ നിന്നാണ്.

സ്വിങ്ങും ലൈനും നിലനിർത്താൻ പ്രയാസപ്പെട്ടാണ് മുഹമ്മദ് ഷമി ആദ്യ ഓവർ പൂർത്തിയാക്കിയത്. ഒരു ഓവറിൽ 11 ബോളുകൾ എറിയുന്ന മൂന്നാമത്തെ ഇന്ത്യൻ താരമാണ് മുഹമ്മദ് ഷമി. സഹീർ ഖാൻ, ഇർഫാൻ പഠാൻ എന്നിവരാണ് മുഹമ്മദ് ഷമിക്ക് മുൻപ് ഒരു ഓവറിൽ 11 പന്തുകൾ എറിഞ്ഞിരിക്കുന്നത്. 

ഷമിയുടെ പാക്കിസ്ഥാനെതിരായ ആദ്യ ഓവർ ചാംപ്യൻസ് ട്രോഫിയിലെ മൂന്നാമത്തെ ദൈർഘ്യമേറിയ ഓവറാണ്. ബംഗ്ലാദേശിന്റെ ഹസിബുൾ ഹൊസെയ്നും സിംബാബ് വെയുടെ തിനാഷെയുമാണ് ചാംപ്യൻസ് ട്രോഫിയിൽ ഒരു ഓവറിൽ ഏറ്റവും കൂടുതൽ പന്തുകൾ എറിഞ്ഞ ബോളർമാർ. 13 ഡെലിവറികൾ വീതമാണ് ഇവർ ഒരു ഓവറിൽ എറിഞ്ഞത്. 

ലൈനും ലെങ്തും വീണ്ടെടുത്ത് ഷമി

ന്യൂബോളിൽ ലൈനും ലെങ്തും കണ്ടെത്താൻ ആദ്യ ഓവറിൽ പ്രയാസപ്പെട്ട മുഹമ്മദ് ഷമി ഓവർ കഴിഞ്ഞതിന് പിന്നാലെ നേരെ ഡഗൗട്ടിലേക്ക് മടങ്ങിയിരുന്നു. തന്റെ ഷൂസ് മാറ്റിയാണ് ഷമി രണ്ടാമത്തെ ഓവർ എറിയാൻ എത്തിയത്. തന്റെ രണ്ടാമത്തെ ഓവറിൽ ശക്തമായി തിരിച്ചെത്തിയ ഷമി നാല് റൺസ് മാത്രമാണ് വഴങ്ങിയത്. 

Read More

• Champions Trophy 2025 live: ടോസ് നേടിയ പാക്കിസ്ഥാൻ ബാറ്റിങ്ങിന്; ടീമിൽ മാറ്റമില്ലാതെ ഇന്ത്യ
• Women Premier League: 23 പന്തിൽ 63 റൺസ്; കൂറ്റനടികളുമായി ചിനെല്ലെ; ഡൽഹിയെ തകർത്ത് യുപി
• England Vs Australia: നിസ്സാരം...! റെക്കോർഡ് ചെയ്സിങ് ജയവുമായി ഓസ്ട്രേലിയയുടെ തൂക്കിയടി
• Kerala Blasters: നിലംതൊടീക്കാതെ പറത്തി ഗോവയും; 2-0ന് തോറ്റ് കേരള ബ്ലാസ്റ്റേഴ്സ്