Women Premier League: മിന്നു മണിക്ക് മൂന്ന് വിക്കറ്റ്; മുംബൈയെ തകർത്ത് ഷഫാലിയും മെഗ് ലാനിങ്ങും

മുംബൈ ഇന്ത്യൻസിന് എതിരെ ഒൻപത് വിക്കറ്റിന്റെ ആധികാരിക ജയം സ്വന്തമാക്കി ഡൽഹി ക്യാപിറ്റൽസ്. 123 റൺസിൽ മുംബൈയെ ഒതുക്കിയതിന് ശേഷം മെഗ് ലാനിങ്ങും ഷഫാലി വർമയും ചേർന്ന് അതിവേഗം ഡൽഹിയെ ജയത്തിലേക്ക് എത്തിച്ചു. ഒരു വിക്കറ്റ് നഷ്ടത്തിൽ 33 പന്തുകൾ ശേഷിക്കെയാണ് ഡൽഹിയുടെ ജയം. 

മെഗ് ലാനിങ് 49 പന്തിൽ നിന്ന് 60 റൺസോടെ പുറത്താവാതെ നിന്നു. ഒൻപത് ഫോറാണ് മെഗിൽ നിന്ന് വന്നത്. ഷഫാലി വർമ 28 പന്തിൽ നിന്ന് നേടിയത് 43 റൺസ്. നാല് ഫോറും മൂന്ന് സിക്സും ഷഫാലിയിൽ നിന്ന് വന്നു. ഡൽഹി സ്കോർ 85ൽ നിൽക്കെ അമൻജോദ് കൗർ ആണ് ഷഫാലിയെ പുറത്താക്കിയത്. ജെമിമ 10 പന്തിൽ നിന്ന് 15 റൺസും നേടി. 

മുംബൈ ബോളർമാർക്ക് ആർക്കും ഡൽഹിയെ പിടിച്ചുകെട്ടാനായില്ല. നേരത്തെ ആദ്യം ബാറ്റ് ചെയ്ത മുംബൈ ബാറ്റർമാരെല്ലാം പൂർണമായും നിരാശപ്പെടുത്തി. 22 റൺസ് വീതം എടുത്ത ഹർമൻപ്രീത കൗറും ഹെയ്ലി മാത്യൂസും ആണ് മുംബൈ നിരയിലെ ടോപ് സ്കോറർമാർ. കഴിഞ്ഞ കളികളിൽ മികവ് കാണിച്ച നാറ്റ് ബ്രന്റ് 18 റൺസിന് പുറത്തായി.

View this post on Instagram

A post shared by Women's Premier League (WPL) (@wplt20)

മലയാളി താരം മിന്നു മണി ഡൽഹിക്കായി മൂന്ന് വിക്കറ്റ് പിഴുതു. മൂന്ന് ഓവറിൽ 17 റൺസ് മാത്രം വഴങ്ങിയാണ് മിന്നു മൂന്ന് വിക്കറ്റ് വീഴ്ത്തിയത്. ജെസ് ജൊനാസനും മൂന്ന് വിക്കറ്റ് വീഴ്ത്തി.ശിഖ പാണ്ഡേയും സതർലൻഡും ഓരോ വിക്കറ്റ് വീതം പിഴുതു. ജെസ് ആണ് കളിയിലെ താരം. 

നിലവിൽ പോയിന്റ് പട്ടികയിൽ ഒന്നാമതാണ് ഡൽഹി. ആറ് കളിയിൽ നിന്ന് നാല് ജയവുമായി എട്ട് പോയിന്റ് ആണ് ഡൽഹിക്ക് ഉള്ളത്. രണ്ടാമതാണ് മുംബൈ. അഞ്ച് കളിയിൽ നിന്ന് മൂന്ന് ജയവുമായി ആറ് പോയിന്റ് ആണ് മുംബൈക്കുള്ളത്. 

Read More

• Ranji Trophy Final: രഞ്ജി ട്രോഫി ഫൈനൽ: സ്കോർ 200 കടത്തി കേരളം, 5 വിക്കറ്റുകൾ നഷ്ടമായി
• Women Premier League: സ്വന്തം മണ്ണിൽ തുടരെ മൂന്നാം തോൽവി; ഗുജറാത്തിനോടും നാണംകെട്ട് ആർസിബി
• എന്തുകൊണ്ട് മെസിയില്ല? പിക്വെയുടെ വെളിപ്പെടുത്തലിൽ ഞെട്ടി ആരാധകർ
• Champions Trophy: ഓസീസിനേയും അഫ്ഗാൻ വീഴ്ത്തുമോ? ജീവൻ മരണ പോര്; മത്സരം എവിടെ കാണാം?