അത്ഭുത സൃഷ്ടിക്ക് പിന്നിലെ അധ്വാനം; താജ് മഹലിന്റെ നിര്‍മ്മാണ സമയത്തെ എഐ ചിത്രങ്ങള്‍

യമുനയുടെ തീരത്ത് തല ഉയര്‍ത്തി നില്‍ക്കുന്ന താജ് മഹല്‍ കാണുന്ന ആരെയും അത്ഭുതപ്പെടുത്തുന്ന സൃഷ്ടിയാണ്. നൂറ്റാണ്ടുകള്‍ക്ക് മുന്‍പ് നിര്‍മ്മിച്ച താജ് മഹലിന്റെ നിര്‍മ്മാണ സമയത്തെ ചിത്രങ്ങളും അന്നത്തെ നിര്‍മ്മാണ രീതികളുമൊക്കെ കാണാന്‍ ആഗ്രഹിക്കുന്നവരാകും എല്ലാവരും. ആര്‍ട്ടിഫിഷ്യല്‍ ഇന്റലിജന്‍സ് കലാകാരനായ ജ്യൊ ജോണ്‍ മുള്ളൂര്‍ താജ് മഹലിന്റെ നിര്‍മ്മാണ സമയത്തെ ചിത്രങ്ങള്‍ എഐ സഹായത്തോടെ പുനരാവിഷ്കരിച്ചിരിക്കുകയാണ്.

ബ്ലാക്ക് ആൻഡ് വൈറ്റ് ചിത്രങ്ങലാണ് ജ്യൊ തന്റെ ഇന്‍സ്റ്റഗ്രാം പ്രൊഫൈലിലൂടെ പങ്കുവച്ചിരിക്കുന്നത്. താജ് മഹലിന്റെ നിര്‍മ്മാണത്തിന്റെ പകുതി മുതല്‍ പൂര്‍ത്തിയാകുന്നത് വരെയുള്ള ചിത്രങ്ങളാണ് നല്‍കിയിരിക്കുന്നത്. ചിത്രങ്ങള്‍ക്കൊടുവിലായി ഷാജഹാന്റെ ഒരു കത്തും ജ്യോ പോസ്റ്റ് ചെയ്തിട്ടുണ്ട്.

"എന്റെ പ്രിയ മുംതാസിന്റെ ഓര്‍മ്മയ്ക്കായി നിര്‍മ്മിച്ച താജ് മഹലിന്റെ നിര്‍മ്മാണ സമയത്തെ ചിത്രങ്ങള്‍ അയച്ചു തന്നതിന് നന്ദി. താജ് മഹല്‍ പ്രണയത്തിന്റെ പ്രതീകമാണ്. രണ്ട് പതിറ്റാണ്ടിലധികം സമയമെടുത്താണ് നിര്‍മ്മാണം പൂര്‍ത്തിയാക്കിയത്," കത്തില്‍ പറയുന്നു. നിര്‍മ്മാണത്തിന്റെ ചരിത്രപരമായ കാര്യങ്ങുളും കത്തില്‍ പറയുന്നുണ്ട്.

ആറ് ദിവസം മുന്‍പ് പോസ്റ്റ് ചെയ്ത ചിത്രത്തിന് 1.2 ലക്ഷത്തിലധം ലൈക്കുകളാണ് ലഭിച്ചത്. യുനെസ്കോയുടെ ലോക പൈതൃക സൈറ്റായ താജ്മഹൽ 1632 നും 1648 നും ഇടയിൽ മുഗൾ ചക്രവർത്തിയായ ഷാജഹാന്റെ നിർദ്ദേശപ്രകാരം നിർമ്മിച്ചതാണ്. ഷാജഹാന്റെ പ്രിയ പത്നി മുംതാസ് മഹലിന്റെ സംസ്കരിച്ചിരിക്കുന്നത് ഇവിടെയാണ്.