ഹണി റോസിനൊപ്പം സെൽഫിയുമായി അയർലാൻഡ് മന്ത്രി; കമന്റ് ബോക്സ് വളഞ്ഞ് മലയാളികൾ

മലയാളം സിനിമയിലെ മുൻനിര നായികമാരിൽ ഏറെ ശ്രദ്ധ നേടിയ താരമാണ് ഹണി റോസ്. നടി എന്ന നിലയിൽ ധാരാളം ഉദ്ഘാടനങ്ങൾക്കും അതിഥിയായി ഹണി എത്തിയിട്ടുണ്ട്. കേരളത്തിലെ വിവിധ സ്ഥലങ്ങളിലെത്തിയ ഹണിയുടെ ചിത്രങ്ങളും വീഡിയോകളും സോഷ്യൽ മീഡിയയിൽ വൈറലാകാറുമുണ്ട്.

കഴിഞ്ഞ ദിവസം അയർലാൻഡിൽ ഉദ്ഘാടകയായെത്തിയ താരത്തിന്റെ വീഡിയോ ശ്രദ്ധ നേടിയിരുന്നു. കുടുംബത്തോടൊപ്പം അയർലാൻഡിൽ അവധി ആഘോഷിക്കുകയാണ് ഹണി. ഇതിനിടയിലാണ് മറ്റൊരു ചിത്രം മലയാളികളുടെ ശ്രദ്ധ നേടിയത്. അയർലാൻഡിലെ മന്ത്രി ജാക്ക് ചേമ്പേഴ്സ് അദ്ദേഹത്തിന്റെ ഇൻസ്റ്റഗ്രാം പ്രൊഫൈലിലൂടെ ഹണിയ്‌ക്കൊപ്പമുള്ള ചിത്രം ഷെയർ ചെയ്തിരിക്കുകയാണ്.

ഒരു സംഘടനയുടെ ഭാഗമായുള്ള മെഗാ മേളയുടെ ഉദ്ഘാടനത്തിനാണ് ഹണി അയർലാൻഡിലെത്തിയത്. ഉദ്ഘാടനത്തിനിടയിൽ പകർത്തിയ ചിത്രമാണെന്നാണ് വ്യക്തമാകുന്നത്.ഈ പോസ്റ്റിനു താഴെ നിറയുന്നത് മലയാളികളുടെ കമന്റുകളാണെന്നതാണ് കൗതുകം.

മലയാളികൾ ട്രോളുകളിലും മറ്റും ഉപയോഗിക്കുന്ന ഡയലോഗുകളാണ് ഇവിടെ നിറയുന്നത്. ഇപ്പോൾ പറയാമോ എന്നറിയില്ല….. നാളെ എന്റെ മകളുടെ പിറന്നാളാണ് എല്ലാവരും വരണം,മല്ലൂസ് കമോൺട്രാ, അവസാനം ഞാനും ഇവിടെ എത്തിപ്പെട്ടു തുടങ്ങിയ കമന്റുകളാണ് പോസ്റ്റിനു താഴെ നിറയുന്നത്.

സോഷ്യൽ മീഡിയിലിലൂടെ ഹണി റോസ് എന്ന താരം പല രീതിയിൽ ട്രോൾ ചെയ്യപ്പെടുന്നുണ്ട്. അതിലൊന്നാണ് ഹണി സ്ഥിരമായി ഉദ്ഘാടനങ്ങൾക്കു പോകുന്നു എന്നത്. വ്യത്യസ്തമായ ട്രോളുകളാണ് ഇതിനെക്കുറിച്ച് സോഷ്യൽ മീഡിയയിൽ നിറയാറുള്ളത്. അതു വളരെയധികം ആസ്വദിക്കാറുമുണ്ട് ഹണി.