അവിശ്വസനീയം; വൺ വേൾഡ് ട്രേഡ് സെന്റിന് മുകളില്‍ ഇടിമിന്നല്‍ പതിക്കുന്ന ദൃശ്യം വൈറല്‍

ഒരേ സമയം അത്ഭുതപ്പെടുത്തുകയും ഭയം നിറയ്ക്കുകയും ചെയ്യുന്ന ഒന്നാണ് ഇടിമിന്നല്‍. ന്യൂയോർക്കിലെ വൺ വേൾഡ് ട്രേഡ് സെന്റർ കെട്ടിടത്തിന് മുകളിൽ ഇടിമിന്നൽ പതിക്കുന്ന വീഡിയോയാണിപ്പോള്‍ വൈറലാകുന്നത്. ശനിയാഴ്ച രാത്രി നഗരത്തിൽ ശക്തമായ ഇടിമിന്നലുണ്ടായപ്പോഴാണ് ഈ വീഡിയോ ചിത്രീകരിച്ചിരിക്കുന്നത്.

ന്യൂയോര്‍ക്ക് ആസ്ഥാനമായി പ്രവര്‍ത്തിക്കുന്ന പ്രശസ്ത ഫൊട്ടോഗ്രാഫറായ മാക്സ് ഗുലിയാനി പകര്‍ത്തിയ വീഡിയോയാണ് ശ്രദ്ധ നേടുന്നത്. 546 മീറ്റര്‍ ഉയരമുള്ള കെട്ടിടത്തിന് മുകളിലേക്കാണ് ഇടിമിന്നല്‍ പതിച്ചത്.

40 ലക്ഷത്തോളം പേരാണ് വീഡിയോ ഇതിനോടകം കണ്ടത്. തികച്ചും അവിശ്വസനീയമായ കാഴ്ചയെന്നാണ് നിരവധി പേര്‍ വീഡിയോക്ക് താഴെയായി കുറിച്ചിരിക്കുന്നത്.

നിരവധി ട്വിറ്റര്‍ ഉപയോക്താക്കളും ശനിയാഴ്ചയുണ്ടായ ശക്തമായ ഇടിമിന്നലിന്റെ ചിത്രങ്ങളും വീഡിയോയും പങ്കുവച്ചിട്ടുണ്ട്.