പരാതിക്കാരിയുടെ അസാന്നിധ്യത്തിൽ രഞ്ജന്‍ ഗൊഗോയിക്കെതിരെ അന്വേഷണം വേണ്ടെന്ന് സുപ്രീം കോടതി ജഡ്​ജിമാർ

ന്യൂഡൽഹി: ചീഫ്​ ജസ്​റ്റിസ്​ രഞ്​ജൻ ഗൊഗോയിക്കെതിരായ പീഡന പരാതിയിൽ പുതിയ നിലപാടുമായി സുപ്രീം കോടതി ജഡ്​ജിമാർ. പരാതിക്കാരിയുടെ അസാന്നിധ്യത്തിൽ ചീഫ്​ ജസ്​റ്റിസിനെതിരായ കേസിൽ അന്വേഷണം നടത്തരുതെന്നാണ്​ ജഡ്​ജിമാരുടെ നിലപാട്​. ജസ്​റ്റിസുമാരായ ഡി.വൈ.ചന്ദ്രചൂഢ്​, റോഹിൻടൺ നരിമാൻ എന്നിവരാണ്​ നിലപാട്​ വ്യക്​തമാക്കി രംഗത്തെത്തിയത്​.

പരാതിക്കാരിയുടെ അസാന്നിധ്യത്തിൽ അന്വേഷണം നടത്തിയാൽ അത്​ സുപ്രീം കോടതിയുടെ അന്തസ്സിന്​ കളങ്കമുണ്ടാക്കുമെന്നും ഇരുവരും വ്യക്​തമാക്കി. കേസിൽ അന്വേഷണം നടത്തുന്ന എസ്​.എ.ബോബ്​ഡെയുമായി ഇരുവരും കൂടിക്കാഴ്​ച നടത്തിയതായും റിപ്പോർട്ടുകളുണ്ട്​​.

Read: ചീഫ് ജസ്റ്റിസിനെതിരായ ഗൂഢാലോചന; അന്വേഷണം നടത്തണമെന്ന് സുപ്രീം കോടതി

പരാതിക്കാരിക്ക്​ അഭിഭാഷകനെ നിയമിക്കാനായി അവസരം നൽകുകയോ അല്ലെങ്കിൽ അമിക്കസ്​ ക്യൂറിയെ അന്വേഷണത്തിനായി നിയോഗിക്കുകയോ ചെയ്യണമെന്നാണ്​ നരിമാന്റെ നിർദേശം. നേരത്തെ പരാതി അന്വേഷിക്കാൻ നിയോഗിച്ച സമിതിക്ക്​ മുമ്പാകെ ഇനി ഹാജരാവില്ലെന്ന്​ പരാതിക്കാരി നിലപാടെടുത്തിരുന്നു.