രാജ്യത്ത് 11,106 പേര്‍ക്ക് കോവിഡ്; 1.26 ലക്ഷം പേര്‍ ചികിത്സയില്‍

ന്യൂഡല്‍ഹി: രാജ്യത്ത് കഴിഞ്ഞ 24 മണിക്കൂറിനിടെ 11,106 പേര്‍ക്ക് കോവിഡ് സ്ഥിരീകരിച്ചു. 12,789 പേർ രോഗമുക്തരായി. രോഗമുക്തി നിരക്ക് 98.28 ശതമാനമായി ഉയര്‍ന്നു. 2020 മാര്‍ച്ചിനു ശേഷമുള്ള കൂടിയ നിരക്കാണിത്.

വിവിധ സംസ്ഥാനങ്ങളിലായി ചികിത്സയില്‍ കഴിയുന്നവരുടെ എണ്ണത്തില്‍ നേരിയ കുറവ് രേഖപ്പെടുത്തിയിട്ടുണ്ട്. 1.26 ലക്ഷം സജീവ കേസുകളാണ് നിലവിലുള്ളത്. 17 മാസത്തിനിടയില്‍ ആദ്യമായാണ് കേസുകള്‍ ഇത്രയും കുറയുന്നത്.

അതേസമയം, കോവിഡ് മരണങ്ങള്‍ കുറയാതെ തുടരുന്നത് ആശങ്കയാണ്. ഇന്നലെ 459 പേരാണ് മഹാമാരി ബാധിച്ച് മരിച്ചത്. ഇതോടെ ആകെ മരണം 4,65,082 ആയി ഉയര്‍ന്നു.

വിവിധ സംസ്ഥാനങ്ങള്‍ക്കും കേന്ദ്ര ഭരണ പ്രദേശങ്ങള്‍ക്കുമായി 72.94 ലക്ഷം ഡോസ് വാക്സിനാണ് ഇന്നലെ വിതരണം ചെയ്തത്. ഇതുവരെ ഒരു ഡോസ് വാക്സിനെങ്കിലും സ്വീകരിച്ചവരുടെ എണ്ണം 115.23 കോടിയായി ഉയര്‍ന്നതായും കേന്ദ്ര ആരോഗ്യ മന്ത്രാലയം അറിയിച്ചു.

Also Read: ബ്ലാക്ക് ഫംഗസ് കൂടുതലും പ്രമേഹ രോഗികളില്‍; ജാഗ്രത തുടരണമെന്ന് പഠനം