കവിതയിൽ മറന്നുവെച്ച ഒരുവൾ

ഒരാൾ നിങ്ങൾക്കൊരു കവിത അയക്കുന്നു;

നിങ്ങളാ കവിത വായിച്ചിട്ടേയില്ല

എങ്കിലും നിങ്ങളാ കവിത വായിച്ചിട്ടുണ്ട്.

* ''നീയെന്നരികിലുള്ളപ്പോൾ

അകലെയാണെന്നോണം

ഞാൻ നിനക്കായി കൊതിക്കുന്നു" എന്ന്

നിങ്ങളവളോടു പറഞ്ഞിട്ടുണ്ട്.

* "നീ കൈകൾ എൻ്റെ കാൽമുട്ടിൽ വെയ്ക്കുമ്പോൾ

സമയം മധുരതരമാകുന്നു.

എന്നെത്തലോടൂ; അലിഞ്ഞില്ലാതാകട്ടെ ഞാൻ" എന്ന്

അവൾ നിങ്ങളോടും.

എങ്കിലും

പറയാത്തവായാണ് കൂടുതൽ;

കവിതയുടെ പേരിൽ വിചാരണ ചെയ്യപ്പെടുമ്പോൾ

കരച്ചിൽപോലെ ഇല്ലാതായവ.

നിങ്ങൾ തിരിഞ്ഞു നോക്കുന്നു

നിഴലിനു പകരം ചിറകിട്ടടിക്കുന്നു;

ജീവനില്ലാത്ത ഒരു പക്ഷി -

നിങ്ങളുടെ രഹസ്യവിവാഹത്തിൽ

പങ്കെടുക്കാൻ വന്നവരിൽ ഒരുവൾ.

ആ നിമിഷം നിങ്ങളാ കവിയാരെന്നോർക്കുന്നു;

ആ നിമിഷം നിങ്ങളവളെ

മറന്നു പോയെന്നുമോർക്കുന്നു.

*Mahmoud Darwishന്റെ A Shawl Made of Silk എന്ന കവിതയിൽ നിന്ന് . എഴുത്തുകാരനായ  കരുണാകരനാണ് ഈ കവിത അയച്ചു തന്നത്