മഞ്ഞൾ മുതൽ കടലമാവ് വരെ; മുഖത്തെ രോമം കളയാനുള്ള വിദ്യകൾ വീട്ടിലുണ്ട്

ടാൻ, മുഖക്കുരു, വരണ്ട ചർമ്മം, ചുളിവുകൾ ഇവ മാത്രമാണോ ചർമ്മ പ്രശ്നങ്ങൾ?. മുഖത്ത് കാണുന്ന അധിക രോമം നിങ്ങളെ ബുദ്ധിമുട്ടിക്കുന്നുണ്ടോ?. ഹോർമോണൽ വ്യതിയാനം മൂലമാണ് പലപ്പോഴും സ്ത്രീകളിൽ അധിക രോമ വളർച്ച കാണാറുള്ളത്. ലേസർ തെറാപ്പി പോലെയുള്ള നിരവധി ചികിത്സകൾ ഇതിനായി നിലവിലുണ്ട്. എന്നാൽ ചെറിയ തോതിലുള്ള രോമ വളർച്ചയ്ക്ക് ഇനി പാർലറുകളിൽ പോയി സമയം കളയേണ്ട. വീട്ടിൽ തന്നെ ചെയ്യാവുന്ന സിംപിൾ ഫെയ്സ് മാസ്കുകളും ഉണ്ട്.

മഞ്ഞൾ പാൽ ഫെയ്സ് മാസ്ക്

ഒരു ടീസ്പൂൺ മഞ്ഞൾപ്പൊടിയിലേയ്ക്ക് ഒരു ടേബിൾസ്പൂൺ പാൽ ചേർത്തിളക്കി യോജിപ്പിക്കാം. ഇത് മേൽച്ചുണ്ടിൽ പുരട്ടി ഉണങ്ങുന്നതു വരെ വിശ്രമിക്കാം. ശേഷം കഴുകി കളയാം. അത് രോമ വളർച്ച കുറയ്ക്കും.

പഞ്ചസാര നാരങ്ങ

ഒരു ടേബിൾസ്പൂൺ പഞ്ചസാരയിലേയ്ക്ക് ഒരു ടേബിൾസ്പൂൺ നാരങ്ങാ നീര് ചേർത്തിളക്കി യോജിപ്പിക്കാം. ഇത് രോമ വളർച്ചയുള്ള മേൽച്ചുണ്ടിൽ പുരട്ടി മൃദുവായി 10 മിനിറ്റ് മസാജ് ചെയ്യാം. പഞ്ചസാര ഒരു മികച്ച എക്സ്ഫോളിയേറ്ററാണ്, നാരങ്ങ ഒരു നാച്വറൽ ബ്ലീച്ചിങ് ഏജൻ്റും.

മുട്ട മാസ്ക്

ഒരു മുട്ട നന്നായി ഉടച്ചെടുക്കാം. അതിലേയ്ക്ക് കുറച്ച് കോൺസ്റ്റാർച്ചും പഞ്ചസാരയും ചേർത്തിളക്കി യോജിപ്പിക്കാം. ഇത് ചർമ്മത്തിൽ രോമ വളർച്ച ഉള്ളിടത്ത് പുരട്ടി ഉണങ്ങുന്നതു വരെ വിശ്രമിക്കാം. ശേഷം കഴുകി കളയാം. 

ഉരുളക്കിഴങ്ങ് പേസ്റ്റ്

ചെറുപയർ പരിപ്പ് ഒരു രാത്രി വെള്ളത്തിൽ കുതിർത്തു വയ്ക്കാം. ഉരുളക്കിഴങ്ങ് അരച്ച് നീര് പിഴിഞ്ഞെടുക്കാം. വെള്ളത്തിൽ കുതിർത്തെടുത്ത ചെറുപയർ പരിപ്പിലേയ്ക്ക് ഉരുളക്കിഴങ്ങ് നീര് ചേർത്തിളക്കി യോജിപ്പിക്കാം. ഈ മിശ്രിതം ചർമ്മത്തിൽ രോമ വളർച്ച ഉള്ളിടത്ത് പുരട്ടാം. ശേഷം കഴുകി കളയാം.

തേൻ നാരങ്ങ

ഒരു ടേബിൾസ്പൂൺ തേനിലേയ്ക്ക് നാരങ്ങാ നീര് ചേർത്തിളക്കി യോജിപ്പിക്കാം. ഈ മിശ്രിതം ചർമ്മത്തിൽ രോമ വളർച്ച ഉള്ളിടത്ത് പുരട്ടി മൃദുവായി മസാജ് ചെയ്യാം. 20 മിനിറ്റിനു ശേഷം കഴുകി കളയാം. 

കടലമാവ് മാസ്ക്

രണ്ട് ടേബിൾസ്പൂൺ കടലമാവിലേയ്ക്ക് അര ടീസ്പൂൺ മഞ്ഞൾപ്പൊടിയും അൽപ്പം പാലും ചേർത്തിളക്കി യോജിപ്പിക്കാം. ഈ മിശ്രിതം ചർമ്മത്തിൽ പുരട്ടാം. 10 മിനിറ്റിനു ശേഷം കഴുകി കളയാം. ഇത് ചർമ്മത്തെ ശുദ്ധീകരിക്കുന്നതിനും എക്സ്ഫോളിയേറ്റ് ചെയ്യുന്നതിനും സഹായിക്കും. 

പപ്പായ മഞ്ഞൾ

രണ്ട് ടേബിൾസ്പൂൺ പപ്പായ കഷ്ണങ്ങളിലേയ്ക്ക് അര ടീസ്പൂൺ മഞ്ഞൾപ്പൊടി ചേർത്തിളക്കി യോജിപ്പിക്കാം. ഈ മിശ്രിതം ആവശ്യാനുസരണം പുരട്ടാം. 15 മിനിറ്റിനു ശേഷം കഴുകി കളയാം. വേരുകളിൽ നിന്നു തന്നെ രോമം കൊഴിയുന്നതിന് ഇത് സഹായിക്കും. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• വൈറ്റ്‌ഹെഡ്‌സ് തടയാൻ ഇതാ 7 മാർഗങ്ങൾ
• പാദങ്ങൾ വിണ്ടുകീറുന്നുവോ? പരിഹരിക്കാൻ ഇതാ 5 ഈസി ടിപ്സ്
• ചർമ്മം തിളങ്ങാൻ ഈ എണ്ണ ഉപയോഗിച്ചു നോക്കൂ
• തലമുടിക്ക് കരുത്ത് പകരാൻ തൈരിന് കഴിയുമോ?