പഴത്തൊലി വലിച്ചെറിയുന്നതിനു പകരം ഇങ്ങനെ ഉപയോഗിക്കൂ, ചർമ്മത്തിലെ ചുളിവുകളും പാടുകളും അകറ്റാം

വാഴപ്പഴം കഴിച്ചശേഷം തൊലി ചവറ്റുകുട്ടയിലേക്ക് വലിച്ചെറിയുകയാണ് പതിവ്. എന്നാൽ, ഇനി അങ്ങനെ ചെയ്യുന്നതിനു മുൻപ് ഒന്നു ചിന്തിക്കുക. ചർമ്മപ്രശ്നങ്ങൾക്ക് മികച്ചൊരു പരിഹാരമാണ് വാഴപ്പഴത്തിന്റെ തൊലി. ഫ്രീ റാഡിക്കലുകളിൽ നിന്നും സൂര്യാഘാതത്തിൽ നിന്നും ചർമ്മത്തെ സംരക്ഷിക്കുന്ന ആൻ്റി ഓക്‌സിഡൻ്റ് ഗുണങ്ങളുടെ സമ്പന്നമായ ഉറവിടമാണിത്. ചർമ്മത്തിന് തിളക്കം നൽകുകയും മൃദുവാക്കുകയും ചെയ്യുന്നു. വാഴപ്പഴത്തിന്റെ തൊലിയിൽ പൊട്ടാസ്യവും, വിറ്റാമിൻ എ, സിങ്ക്, മാംഗനീസ് തുടങ്ങിയ പോഷകങ്ങളും അടങ്ങിയിട്ടുണ്ട്. ഇവയെല്ലാം അകാല വാധക്യത്തിൻ്റേതായ ലക്ഷണങ്ങൾ ചർമ്മത്തിൽ നിന്നും നീക്കം ചെയ്യും. 

ബനാന പീൽ ഫെയ്സ് മാസ്ക്

പഴുത്ത പഴത്തിൻ്റെ തൊലിയുടെ ഉൾഭാഗമെടുത്ത് തേൻ കൂടി ചേർത്ത് ഉടച്ചെടുക്കാം. ഈ മിശ്രിതം മുഖത്ത് പുരട്ടാം. 20 മിനിറ്റിനു ശേഷം തണുത്ത വെള്ളത്തിൽ കഴുകി കളയാം. ഇത് ചർമ്മത്തിലെ ചുളിവുകൾ, വരൾച്ച് എന്നിവ തടയാൻ സഹായിക്കും.

മുഖക്കുരു

പഴത്തിൻ്റെ തൊലി മുഖക്കുരു ഉള്ള ഭാഗങ്ങളിൽ മൃദുവായി ഉരസാം. 15 മിനിറ്റിനു ശേഷം തണുത്ത വെള്ളത്തിൽ കഴുകി കളയാം. പഴത്തൊലിയുടെ ആൻ്റി ഇൻഫ്ലമേറ്ററി സവിശേഷതകൾ ചുവപ്പ് വീക്കം എന്നിവ കുറയ്ക്കും.

കണ്ണിനു ചുറ്റുമുള്ള കറുപ്പ് നിറം

പഴത്തിൻ്റെ തൊലി ചെറിയ കഷ്ണങ്ങളാക്കി അരച്ചെടുക്കാം. ഇത് കണ്ണിനടിയിൽ പുരട്ടാം. 15 മിനിറ്റിനു ശേഷം കഴുകി കളയാം. കണ്ണിനടിയിലെ തുടിപ്പ്, വീക്കം, കറുത്ത നിറം എന്നിവ കുറയ്ക്കാൻ ഇങ്ങനെ ചെയ്യാം.

തിളക്കമുള്ള ചർമ്മത്തിന്

പഴത്തൊലി അരച്ചെടുക്കാം. അതിലേയ്ക്ക് മഞ്ഞൾപ്പൊടി ചേർത്തിളക്കി യോജിപ്പിക്കാം.​ ഇത് മുഖത്ത് പുരട്ടി 15 മിനിറ്റ് വിശ്രമിക്കാം. ശേഷം തണുത്ത വെള്ളത്തിൽ കഴുകി കളയാം. ഇത് ആഴ്ചയിൽ രണ്ട് തവണയെങ്കിലും ചെയ്യുന്നത് ഗുണകരമാണ്.

മൃദുലമായ ചർമ്മത്തിന്

പഴത്തൊലി വളരെ മൃദുവായി മുഖത്ത് അല്ലെങ്കിൽ ശരീരത്തിൽ ഉരസാം. കൈമുട്ട്, കാൽപാദം, കൈകൾ എന്നിവടങ്ങളിൽ ശ്രദ്ധ കേന്ദ്രീകരിക്കാം. ഇത് ചർമ്മത്തിൻ്റെ പരുക്കൻ സ്വഭാവത്തിന് പരിഹാരമാണ്.

മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More: ഉരുളക്കിഴങ്ങ് കൈയ്യിലുണ്ടോ? കഴുത്തിനു ചുറ്റുമുള്ള കറുപ്പ് നിറം അകറ്റാൻ ഇതാ ഒരു പൊടിക്കൈ