തലമുടിക്ക് നിറവും കരുത്തും നൽകാൻ മൈലാഞ്ചി എണ്ണ, ഇങ്ങനെ തയ്യാറാക്കാം

അകാല നര, മുടികൊഴിച്ചിൽ എന്നിങ്ങനെ നിരവധി പ്രശ്നങ്ങളാണ് തലമുടിയുടെ ആരോഗ്യത്തെ അലട്ടാറുള്ളത്. അതിൽ തന്നെ മുടിക്ക് നിറം നൽകുന്നതിന് വ്യാപകമായി മൈലാഞ്ചി ഉപയോഗിക്കാറുണ്ട്. എന്നാൽ ഇതിന് മറ്റെന്തൊക്കെ ഗുണങ്ങൾ ഉണ്ടെന്ന് നിങ്ങൾക്ക് അറിയാമോ?. ഏറെക്കാലമായി കരുത്തുറ്റ മുടിയുടെ വളർച്ചക്കും, പ്രകൃതിദത്ത കണ്ടീഷ്ണറായും മൈലാഞ്ചി ഉപയോഗത്തിലുണ്ട്.  ആൻ്റി ബാക്ടീരിയൽ ആൻ്റി ഫംഗൽ സവിശേഷതകളാൽ സമ്പന്നമാണ് ഇത്. മൈലാഞ്ചിയുടെ ഇല വെയിലത്തു വച്ച് ഉണക്കി പൊടിച്ചെടുത്താൽ ആവശ്യാനുസരണം ഉപയോഗിക്കാവുന്നതാണ്. 

കറുപ്പ് നിറമുള്ള കരുത്തുറ്റ തലമുടി നേടാൻ പ്രകൃതിദത്തമായ എണ്ണ ഏറെ സഹായകരമാണ്. അതിൽ തന്നെ മൈലാഞ്ചി എണ്ണ ഏറെക്കാലമായി ഉപയോഗത്തിലുണ്ട്. അത് വീട്ടിൽ എങ്ങനെ തയ്യാറാക്കാം എന്ന് അറിയാം. 

ചേരുവകൾ

വെളിച്ചെണ്ണ- 1 കപ്പ്
മൈലാഞ്ചി ഇല
വിറ്റാമിൻ ഇ- 2 ക്യാപ്സൂൾ

തയ്യാറാക്കുന്ന വിധം

• ഒരു ബൗളിലേയ്ക്ക് ആവശ്യത്തിന് മൈലാഞ്ചി ഇല എടുത്ത് ചൂടുവെള്ളത്തിൽ കുതിർത്തു വയ്ക്കാം.
• 15 മിനിറ്റ് അത് മാറ്റി വയ്ക്കാം.
• മൈലാഞ്ചിയില നന്നായി അരച്ചെടുക്കാം.
• ആവശ്യത്തിന് വെള്ളം അതിലേയ്ക്ക് ഒഴിച്ചിളക്കി യോജിപ്പിക്കാം.
• അതിൽ നിന്നും കുറച്ച് വീതം എടുത്ത് ചെറിയ ഉരുളകളാക്കി മാറ്റി വയ്ക്കാം.
• ഒരു പാൻ അടുപ്പിൽ വച്ച് വെളിച്ചെണ്ണ ഒഴിച്ചു ചൂടാക്കാം.
• അതിലേയ്ക്ക് മൈലാഞ്ചിയില ഉരുളകൾ ചേർത്ത് തിളപ്പിക്കാം. ഇലയുടെ നിറം മാറി വരുമ്പോൾ അടുപ്പണയ്ക്കാം.
• എണ്ണ തണുത്തതിനു ശേഷം അരിച്ചെടുക്കാം.
• വിറ്റാമിൻ ഇ ക്യാപ്സൂൾ ചേർത്തിളക്കി യോജിപ്പിക്കുക.
• എണ്ണ കൈ ഉപയോഗിച്ച് തലയോട്ടിയിൽ പുരട്ടി മൃദുവായി മസാജ് ചെയ്യാം.
• ഒരു മണിക്കൂറിനു ശേഷം വീര്യം കുറഞ്ഞ ഷാമ്പൂ ഉപയോഗിച്ച് കഴുകി കളയാം.
• ആഴ്ചയിൽ രണ്ട് ദിവസം ഇത് ഉപയോഗിക്കുക. 

തലമുടിയ്ക്ക് നിറം നൽകാൻ

രണ്ട് കപ്പ് മൈലാഞ്ചിയില പൊടിച്ചതിലേക്ക് കുറച്ച് തേയില വെള്ളവും ഒരു നാരങ്ങയുടെ നീരും, രണ്ട് സ്പൂൺ കാപ്പിപ്പൊടിയും, ഒരു കപ്പ് ബീറ്റ്റൂട്ടിൻ്റെ നീരും ചേർത്തിളക്കി യോജിപ്പിക്കാം. ഒരു രാത്രി മുഴുവൻ ഇത് അടച്ചു സൂക്ഷിക്കാം. പിറ്റേ ദിവസം തലമുടിയിൽ പുരട്ടാം. രണ്ട് മണിക്കൂറിനു ശേഷം കഴുകി കളയാം. പാർശ്വഫലങ്ങളില്ലാത്ത പ്രകൃതിദത്ത ഹെയർ കളറാണിത്. 

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• മുഖത്തെ ചുളിവും പാടുകളും അകറ്റാൻ മുട്ട ഉപയോഗിക്കാം
• താരനകറ്റാൻ ഹെയർസ്പ്രേ വീട്ടിൽ തയ്യാറാക്കിയാലോ?
• മുടിയഴകിന് തക്കാളി, ഈ 7 വിദ്യകൾ ട്രൈ ചെയ്യൂ
• വാക്സും ലേസറും വേണ്ട, മുഖത്തെ രോമം കളയാൻ വിദ്യകൾ അനവധി