Nipah Virus Confirmed: പരിഭ്രാന്തരാകേണ്ട, വേണ്ടത് ജാഗ്രത: മന്ത്രി കെ.കെ.ശൈലജ

രോഗം ബാധിച്ച വിദ്യാര്‍ഥിയുടെ ആരോഗ്യനില തൃപ്തികരമെന്ന് ആരോഗ്യമന്ത്രി കെ.കെ.ശൈലജ അറിയിച്ചു. രോഗിയുടെ സുഹൃത്തിനെയും ചികിത്സിച്ച മൂന്ന് നഴ്‌സുമാരെയും ഐസൊലേഷന്‍ വാര്‍ഡിലേക്ക് മാറ്റിയിട്ടുണ്ട്. ഗുരുതര ലക്ഷണങ്ങളൊന്നും ഇവരില്‍ കാണുന്നില്ലെങ്കിലും ഇവരെ പ്രത്യേകം നിരീക്ഷിക്കും. നാളെ തന്നെ ഇവരുടെ സാമ്പിളുകള്‍ വൈറോളജി വിഭാഗത്തിലേക്ക് പരിശോധനയ്ക്ക് അയക്കും. ജനങ്ങള്‍ പരിഭ്രാന്തരാകരുതെന്നും ജാഗ്രത പുലര്‍ത്തിയാല്‍ മതിയെന്നും ആരോഗ്യമന്ത്രി കെ.കെ.ശൈലജ വാര്‍ത്താസമ്മേളനത്തില്‍ അറിയിച്ചു.

നേരത്തെ നിശ്ചയിച്ചതു പോലെ സംസ്ഥാനത്തെ സ്‌കൂളുകള്‍ വ്യാഴാഴ്ച തന്നെ തുറക്കുമെന്ന് വിദ്യാഭ്യാസ മന്ത്രി പ്രൊഫ.സി.രവീന്ദ്രനാഥ്. നിപ വൈറസ് ബാധയുടെ പശ്ചാത്തലത്തില്‍ സ്‌കൂളുകള്‍ തുറക്കുന്നത് നീട്ടി വയ്‌ക്കേണ്ടതില്ലെന്ന് മന്ത്രി വ്യക്തമാക്കി.

പനി ബാധിച്ച സമയത്ത് രോഗിയുമായി സമ്പർക്കം പുലർത്തിയവരുടെ പട്ടിക തയ്യാറാക്കി. 311 പേരുടെ ലിസ്റ്റാണ് തയ്യാറാക്കിയിട്ടുള്ളത്. ഇവരോട് വീടുകളിൽ നിന്ന് പുറത്ത് പോകരുതെന്ന് നിർദേശിച്ചിട്ടുണ്ട്. ഇവരുടെ ആരോഗ്യനില വിലയിരുത്തുന്നുണ്ട്. ഇതിൽ രോഗിയുമായി അടുത്ത സമ്പർക്കം ഉണ്ടായിട്ടുള്ളവരെ  ജില്ലാ കൺട്രോൾ റൂമിൽ നിന്നും നേരിട്ട് ഫോണിൽ വിളിച്ച് ആരോഗ്യനില വിലയിരുത്തുകയാണ് ചെയ്യുന്നത്. ഇവരിൽ ചെറിയ പനി, തൊണ്ട വേദന തുടങ്ങിയ രോഗലക്ഷണങ്ങളുള്ള 4 പേരെ വിദഗ്ധ ചികിത്സ, പരിശോധന എന്നിവയ്ക്കായി കളമശ്ശേരി മെഡിക്കൽ കോളേജിലെ ഐസൊലേഷൻ വാർഡിലേക്ക് മാറ്റിയിട്ടുണ്ട്. 

വിദ്യാർഥിയുടെ പനി കുറയുകയും ആരോഗ്യനില മെച്ചപെടുകയും ചെയ്തു. മുൻകരുതൽ എന്ന നിലയിൽ രോഗിയെ പരിചരിച്ച പനിയും തലവേദനയും ഉള്ള ജീവനക്കാരെ ഐസൊലേഷൻ വാർഡിലേക്ക് മാറ്റി. നിലവിൽ ജീവനക്കാർക്കോ മറ്റ് രോഗികൾക്കോ രോഗബാധ ഉണ്ടാകാനുള്ള യാതൊരു സാഹചര്യവുമില്ലെന്നും മെഡിക്കൽ ബുള്ളറ്റിൻ വിശദമാക്കുന്നു. 

നിപ ബാധിതനായ വിദ്യാര്‍ഥിയുടെ ആരോഗ്യനിലയില്‍ പുരോഗതി. ജീവനക്കാര്‍ക്കോ രോഗികള്‍ക്കോ പനി ബാധിക്കാനുള്ള സാധ്യത ഇല്ലെന്നും മെഡിക്കല്‍ ബുള്ളറ്റിന്‍. അസ്വസ്ഥതകളുള്ളവരെ ഐസൊലേഷന്‍ വാര്‍ഡിലേക്ക് മാറ്റി. നിപ ബാധിതന് പനി കുറഞ്ഞിട്ടുള്ളതായാണ് മെഡിക്കല്‍ ബുള്ളറ്റിനില്‍ പറയുന്നത്.

നിപ സ്ഥിരീകരിച്ചതിനു പിന്നാലെ തൃശൂരില്‍ ആരോഗ്യവകുപ്പിന്റെ നിരീക്ഷണത്തിലായിരുന്ന 27 പേരില്‍ മൂന്ന് പേര്‍ക്ക് പനി. മന്ത്രി എ.സി.മൊയ്തീനാണ് ഇക്കാര്യം അറിയിച്ചത്. ആശങ്ക വേണ്ട എന്നും മന്ത്രി അറിയിച്ചു. തൃശൂരില്‍ 17 പുരുഷന്‍മാരും 10 സ്ത്രീകളുമാണ് നിരീക്ഷണത്തിലുള്ളത്.

പൊതുജനങ്ങൾ ആശങ്കപ്പെടേണ്ടതില്ല എന്ന് ആരോഗ്യമന്ത്രി കെ.കെ.ശെെലജ അറിയിച്ചു. എല്ലാവരും മുൻകരുതൽ സ്വീകരിക്കണം.  പ്രത്യേക പരിശീലനം നേടിയ വിദഗ്ധ ഡോക്ടർമാരാണ് ചികിത്സ നടത്തുന്നത്. ആവശ്യത്തിനുള മരുന്നുകൾ ലഭ്യമാക്കിയിട്ടുണ്ട്.  ഓസ്ട്രേലിയയിൽ നിന്നുള്ള മരുന്ന് ഉപയോഗിക്കുന്നതിന് ഐ സി എം ആറിന്റെ അനുമതിയും ലഭിച്ചിട്ടുണ്ടെന്ന് കെ.കെ.ശെെലജ പറഞ്ഞു. 

നിപ വൈറസ് ബാധ പ്ലേഗ് പോലെയോ, വസൂരി പോലെയോ ദശലക്ഷം പേര്‍ക്ക് പടര്‍ന്ന് പിടിക്കാന്‍ കഴിയുന്ന മഹാവ്യാധിയല്ലെന്ന് ഇന്ത്യന്‍ മെഡിക്കല്‍ അസോസിയേഷന്‍. അതുകൊണ്ട് കൂടുതല്‍ ഭയപ്പെടേണ്ട സാഹചര്യം സംസ്ഥാനത്ത് നിലവിലില്ല. എന്നാല്‍ നിപ രോഗ ബാധ ഉണ്ടാകുന്നവരില്‍ കൂടുതല്‍ പേര്‍ക്കും അപകടമുണ്ടാകുന്ന സാഹചര്യത്തില്‍ ഇക്കാര്യത്തിൽ ആവശ്യമായ മുന്നൊരുക്കം ആവശ്യമാണ്.
നിപ രോഗം പ്രത്യക്ഷപ്പെട്ട രാജ്യങ്ങളിലൊക്കെയും വളരെ ചുരുക്കം പേര്‍ക്ക് മാത്രാണ് രോഗം പിടിപെട്ടിട്ടുള്ളത്. അസുഖം ബാധിച്ചവരില്‍ മരണ നിരക്ക് കൂടുതലുമായിരുന്നു. നിലവില്‍ സംസ്ഥാനത്തെ സ്ഥിതി നിയന്ത്രണത്തിലാണെന്നും ഐഎംഎ അറിയിച്ചു. 

നിപയെ നേരിടാന്‍ ആരോഗ്യമേഖല പൂർണ സജ്ജമാണെന്ന് മുഖ്യമന്ത്രി മുഖ്യമന്ത്രി പിണറായി വിജയൻ. എല്ലാ തയ്യാറെടുപ്പുകളും ആരോഗ്യ വകുപ്പ് മന്ത്രിയുടെ നേതൃത്വത്തില്‍ പൂര്‍ത്തിയാക്കിയിട്ടുണ്ട്. യുവാവുമായി അടുത്തിടപഴകിയവരെ പ്രത്യേകമായി നിരീക്ഷിച്ചു വരികയാണ്. നിപ സ്ഥിരീകരിച്ചു എന്നതിനാല്‍ ആരും ആശങ്കപ്പെടേണ്ട കാര്യമില്ല. ആരോഗ്യവകുപ്പ് ഓരോ സമയത്തും കൃത്യമായി നിർദേശങ്ങള്‍ നല്‍കും. അത് പിന്തുടരാന്‍ എല്ലാ ജനങ്ങളും തയ്യാറാകണമെന്നും മുഖ്യമന്ത്രി അഭ്യർഥിച്ചു.

നിപ പ്രതിരോധ പ്രവർത്തനങ്ങളിൽ സർക്കാരിന് പൂർണ പിന്തുണ നൽകുമെന്ന് പ്രതിപക്ഷ നേതാവ് രമേശ് ചെന്നിത്തല. പ്രതിപക്ഷ നേതാവും കോൺഗ്രസ് എംഎൽഎമാരും കൊച്ചി ഗസ്റ്റ് ഹൗസിലെത്തി ആരോഗ്യമന്ത്രി കെ.കെ.ശൈലജയുമായി കൂടിക്കാഴ്ച നടത്തി

നിപയെ പ്രതിരോധിക്കാൻ എല്ലാ പിന്തുണയുമായി കേന്ദ്രം. സംസ്ഥാനവുമായി നിരന്തരം ആശയവിനിമയം നടത്തുന്നുണ്ടെന്നും മരുന്നുകൾ വിമാനം വഴി എത്തിക്കാനുള്ള മാർഗങ്ങൾ സ്വീകരിച്ചിട്ടുണ്ടെന്നും കേന്ദ്ര മന്ത്രി അറിയിച്ചു. പ്രതിരോധം ഏകോപിപ്പിക്കാൻ ഡൽഹിയിലും കൺട്രോൾ റൂം തുറന്നിട്ടുണ്ട്.

മുൻകരുതലെന്ന നിലയ്ക്ക് എല്ലാ മെഡിക്കൽ കോളേജുകളിലും ഐസൊലേഷൻ വാർഡുകൾ തുറക്കാൻ നിർദേശം നൽകിയിട്ടുണ്ട്. എറണാകുളത്തിനോട് ചേർന്നുള്ള ജില്ലകളിലും ഐസൊലേഷൻ വാർഡ് സൗകര്യമുണ്ടാകും .  എറണാകുളം ജില്ലയിലെ ഐസൊലേഷൻ വാർഡ് കളമശ്ശേരി മെഡിക്കൽ കോളേജിലാണ് ഒരുക്കിയിരിക്കുന്നത്.

നിപ സ്ഥിരീകരിച്ച സാഹചര്യത്തിൽ ആറംഗ കേന്ദ്രസംഘം കേരളത്തിലെത്തി. സ്ഥിതിഗതികൾ നിരീക്ഷിച്ചു വരികയാണെന്ന് കേന്ദ്ര ആരോഗ്യമന്ത്രി ഹർഷവർധൻ പറഞ്ഞു. അർധരാത്രിക്ക് ശേഷമാണ് പൂനെ വൈറോളജി ലാബിൽനിന്ന് സ്ഥിരീകരണം ഉണ്ടായത്. കൂടുതൽ പ്രതിരോധ മരുന്നുകൾ എത്തിക്കുമെന്നും ഡൽഹിയിൽ പ്രത്യേക കൺട്രോൾ റൂം തുറന്നതായും മന്ത്രി പറഞ്ഞു.

പുതിയ നിപ കേസിന്റെ ഉറവിടം ഇടുക്കിയെന്ന് പറയാനാവില്ലെന്ന് ഡിഎംഒ. ഇടുക്കിയിലും തൊടുപുഴയിലുമായി 2 ഐസൊലേഷൻ വാർഡുകൾ സജ്ജീകരിച്ചിട്ടുണ്ടെന്നും ഡിഎംഒ അറിയിച്ചു

ചികിത്സയിൽ കഴിയുന്ന വിദ്യാർത്ഥിയുടെ ആരോഗ്യ നില തൃപ്തികരമെന്ന് മന്ത്രി വ്യക്തമാക്കി

നിപ വൈറസിനെ പ്രതിരോധിക്കാനുള്ള മരുന്നായ റിബ വൈറിൻ സ്റ്റോക്കുള്ളതായി മന്ത്രി അറിയിച്ചു

രോഗിയുമായി അടുത്തിടപഴുകുകയും പിന്നീട് രോഗലക്ഷണങ്ങൾ കാണുകയും ചെയ്ത ഒരാളെക്കൂടി ഐസൊലേഷൻ വാർഡിലേക്ക് മാറ്റിയതായി മന്ത്രി അറിയിച്ചു. ചികിത്സയിലുള്ള വിദ്യാർത്ഥിയുടെ സുഹൃത്താണ് ഇയാൾ

വിദ്യാർത്ഥിയെ ചികിത്സിച്ച രണ്ട് നഴ്സുമാരും നിരീക്ഷണത്തിലാണ്. ഇരുവർക്കും തൊണ്ടയിൽ അസ്വസ്ഥതയുള്ളതായി കാണപ്പെട്ടിട്ടുണ്ടെന്നും നിലവിൽ മൂന്നു പേർ നിരീക്ഷണത്തിലുണ്ടെന്നും മന്ത്രി അറിയിച്ചു. 

കൊച്ചിയിലെ യുവാവിന് നിപ സ്ഥിരീകരിച്ചെങ്കിലും ഭീതിവേണ്ടെന്ന് ആരോഗ്യമന്ത്രി കെ.കെ ശൈലജ അറിയിച്ചു. ആശങ്കപ്പെടേണ്ട സാഹചര്യമില്ലെന്നും എല്ലാ മുന്നൊരുക്കങ്ങളും സ്വീകരിച്ചിട്ടുണ്ടെന്നും മന്ത്രി അറിയിച്ചു.

എറണാകുളത്തെ ആശുപത്രിയിൽ ചികിത്സയിൽ കഴിയുന്ന യുവാവിന് നിപ തന്നെയാണെന്ന് ആരോഗ്യമന്ത്രി കെ.കെ ശൈലജയുടെ സ്ഥിരീകരണം.