ബസുകൾ പ്രകൃതിവാതകത്തിലേയ്ക്ക്; ഇരുചക്രവാഹനങ്ങൾക്കും ഓട്ടോറിക്ഷകൾക്കും 200 കോടി വായ്‌പ

തിരുവനന്തപുരം: സംസ്ഥാനത്തെ മൂവായിരം കെഎസ്ആർടിസി ഡീസൽ ബസുകൾ പ്രകൃതി വാതക ഇന്ധനത്തിലേയ്ക്ക് മാറ്റുന്നതിനുള്ള പദ്ധതി ഉടൻ തുടങ്ങുമെന്ന് ഗതാഗതമന്ത്രി ആന്റണി രാജു. ബജറ്റിൽ ഇതിനായി 300 കോടി രൂപ മാറ്റിവച്ചിട്ടുണ്ട്. കെ എസ് ആർ ടി സിയെ ലാഭകരമാക്കുന്നതിനുള്ള നടപടികളുടെ മുന്നോടിയായാണ് ഈ തീരുമാനമെന്ന് മന്ത്രി പറഞ്ഞു.

പദ്ധതികൾ പരിസ്ഥിതി സൗഹൃദമാക്കുന്നതിന്റെ ഭാഗമായി ഹൈഡ്രജൻ ഇന്ധനമായുള്ള പത്ത് ബസുകൾ നിരത്തിലിറക്കാനും നിർദേശം നൽകിയതായി മന്ത്രി അറിയിച്ചു. ഇതിനായി ആദ്യഘട്ടമെന്നനിലയിൽ 10 കോടി രൂപ മാറ്റിവച്ചിട്ടുണ്ട്. ഇന്ത്യൻ കോർപറേഷന്റെയും സിയാലിന്റെയും സഹകരണത്തടെയാണ് പദ്ധതി നടപ്പാക്കുന്നത്.

Read More: കവിതാ ശകലങ്ങളില്ല, ഉദ്ധരണികളില്ല; ഒരു മണിക്കൂറിൽ ലളിതം ബാലഗോപാലിന്റെ കന്നി ബജറ്റ്

സാധാരണ തൊഴിലുകൾ ചെയ്യുന്ന പത്ര വിതരണക്കാർ, മത്സ്യക്കച്ചവടക്കാർ, ചെറുകിട കച്ചവടക്കാർ , ഹോംഡെലിവറി ചെയ്യുന്ന യുവാക്കൾ എന്നിവർക്കായി ഗതാഗതവകുപ്പ് വായ്പാ പദ്ധതി ആവിഷ്കരിക്കുമെന്ന് മന്ത്രി അറിയിച്ചു. 200 കോടി രൂപയാണ് പലിശയിളവ് നൽകി വായ്പയായി നൽകുന്നത്. പതിനായിരം ഇരുചക്രവാഹനങ്ങൾക്കും അയ്യായിരം ഓട്ടോ റിക്ഷകൾക്കുമായാണ് 200 കോടി വായ്‌പാത്തുക വിനിയോഗിക്കുക.