ആർക്കും പോവാം എസിയിൽ; കുറഞ്ഞ നിരക്കിൽ കെഎസ്ആർടിസി ജനതാബസ്

കുറഞ്ഞ ടിക്കറ്റ് നിരക്കിൽ ആർക്കും ഇനി എസി ബസിൽ യാത്ര ചെയ്യാം. അതിനുള്ള സൗകര്യമൊരുക്കുകയാണ് കെഎസ്ആർടിസി. അതിനായി ജനതാബസുകൾ സർവീസ് നടത്തും. തൊട്ടടുത്തുള്ള രണ്ട് ജില്ലാ ആസ്ഥാനങ്ങൾ തമ്മിൽ ബന്ധിപ്പിച്ചാണ് ഈ സർവീസുകൾ നടത്തുക. ഏപ്രിൽ രണ്ടാം വാരത്തോടെ ജനതാ സർവീസുകൾ ആരംഭിക്കും. 175 ലോ ഫ്ലോർ എസി ബസുകളാണ് ഇതിനായി ഉപയോഗിക്കുന്നത്. ഫാസ്റ്റ് പാസഞ്ചറിനും സൂപ്പർ ഫാസ്റ്റിനും ഇടയിലുള്ള നിരക്കിലാവും ടിക്കറ്റ് ചാർജ്.

നിലവിൽ ബൈപാസ് റൈഡറുകളായി ഓടുന്ന ബസുകളാണ് പരീക്ഷണാർത്ഥം ജനതാ സർവീസിനു വേണ്ടി ഓടുക. ഈ ബസുകളുടെ സീറ്റ് പുഷ് ബാക്ക് ആക്കി മാറ്റി ദീർഘദൂര സർവീസുകൾക്ക് ഉപയോഗിക്കാമെന്ന് ഇടയ്ക്ക് തീരുമാനിച്ചിരുന്നെങ്കിലും അത് മാറ്റാൻ സാധിച്ചിട്ടില്ല. ജനതാ സർവീസിലോടുന്ന ബസുകളുടെ നിറം മാറ്റാനും തീരുമാനിച്ചിട്ടുണ്ട്.