Kochi Drug Case:കളമശേരി കഞ്ചാവ് കേസ്; ആറ് മാസമായി ഹോസ്റ്റൽ കേന്ദ്രീകരിച്ചുള്ള വിൽപ്പന

കൊച്ചി:കളമശേരി സർക്കാർ പോളിടെക്നിക് കോളേജ് ഹോസ്റ്റലിലെ കഞ്ചാവുകേസുമായി ബന്ധപ്പെട്ട കുടുതൽ വിവരങ്ങൾ പുറത്ത്. ഹോസ്റ്റൽ കേന്ദ്രീകരിച്ചുള്ള കച്ചവടം തുടങ്ങിയിട്ട് ആറുമാസത്തിലേറെയായെന്ന് പോലീസ്.  കേസിലെ മുഖ്യപ്രതി അനുരാജ് കഞ്ചാവ് വാങ്ങാൻ ഗൂഗിൾ പേ വഴി 16,000 രൂപ കൈമാറിയെന്ന് പൊലീസ് കണ്ടെത്തി. 

നാല് കിലോ കഞ്ചാവാണ് ഹോസ്റ്റലിൽ വിൽപ്പനയ്ക്കായി എത്തിച്ചത്. എന്നാൽ രണ്ടുകിലോ മാത്രമാണ് പോലീസിന് റെയ്ഡിൽ കണ്ടെത്താനായത്.കാണാതായ രണ്ട് കിലോ കഞ്ചാവിന് വേണ്ടി തിരച്ചിൽ തുടരും.കേസിൽ ഒരു ഇതരസംസ്ഥാന തൊഴിലാളിയെ കേന്ദ്രീകരിച്ചും പോലീസ് അന്വേഷണം ഊർജ്ജിതമാണ്.

ആലുവയിൽ താമസിക്കുന്ന ഇയാളുടെ മൊബൈൽ ഫോൺ സ്വിച്ച് ഓഫ് ആണ്. കഴിഞ്ഞ ആറ് മാസമായി ലഹരി എത്തിച്ച് വിതരണം ചെയ്തിരുന്നതായി കേസിൽ അറസ്റ്റിലായ പ്രതികൾ മൊഴി നൽകിയിരുന്നു.  അനുരാജ് വഴിയാണ് ഹോസ്റ്റലിൽ കഞ്ചാവ് വിതരണം നടത്തിയിരുന്നത്. കഞ്ചാവിനായി ഗൂഗിൾ പേ വഴി പണം നൽകിയതിന് പുറമേ അനുരാജ് നേരിട്ടും പണം നൽകിയിട്ടുണ്ടെന്നും അന്വേഷണത്തിൽ കണ്ടെത്തിയെന്ന് പോലീസ് പറഞ്ഞു. 

കഞ്ചാവ് എത്തിയത് ഇതരസംസ്ഥാന തൊഴിലാളി വഴി

പരിചയമുള്ളയാൾ ആയതിനാൽ അനുരാജിന് കടമായിട്ടും കഞ്ചാവ് നൽകിയിട്ടുണ്ടെന്ന് ഷാലിഖ് പറയുന്നു. കേസിൽ കൂടുതൽ പേർ പണമിടപാട് നടത്തിയിട്ടുണ്ടെന്നാണ് പൊലീസിന്റെ കണ്ടെത്തൽ. ഷാലിഖിനും ആഷിഖിനും ഇതര സംസ്ഥാന തൊഴിലാളി വഴിയാണ് കഞ്ചാവ് ലഭിച്ചതെന്ന് പൊലീസിന്റെ നിഗമനം.

ആലുവയിൽ താമസിക്കുന്ന ഇതര സംസ്ഥാന തൊഴിലാളികളെ കേന്ദ്രീകരിച്ച് അന്വേഷണം നടക്കുന്നുണ്ട്. ചില ആളുകൾ നിരീക്ഷണത്തിലാണെന്ന് പൊലീസ് പറയുന്നു. കൂടാതെ കേസിൽ കൂടുതൽ പേർ അറസ്റ്റിലാകുമെന്ന് പൊലീസ് വ്യക്തമാക്കുന്നു.

ഹോസ്റ്റൽ മിനി കഞ്ചാവ് കേന്ദ്രം

കൊച്ചി കളമശ്ശേരി ഗവ. പോളിടെക്നിക് കോളജ് ഹോസ്റ്റൽ മിനി കഞ്ചാവ് വിപണന കേന്ദ്രമാണെന്ന് പൊലീസ് പറയുന്നത്. കോളജിനകത്ത് മാത്രമല്ല കളമശേരിയുടെ വിവിധ ഭാഗങ്ങളിൽ കഞ്ചാവ് എത്തിക്കുന്നത് ഹോസ്റ്റലിൽ നിന്നാണെന്ന് പൊലീസ് പറയുന്നു. പ്രധാന ലഹരി ഇടപാടുകാരൻ പിടിയിലായ ആഷിക് ആണ്. പൊലീസ് പരിശോധന ഉണ്ടാകില്ലെന്ന് ഉറപ്പിലാണ് ഹോസ്റ്റലിൽ കഞ്ചാവ് സൂക്ഷിച്ചിരുന്നത്.

Read More

• Kochi Drug Case: കളമശേരി കഞ്ചാവ് വേട്ട; മുഖ്യപ്രതി പിടിയിൽ
• Kochi Drug Case: കൊച്ചിയിൽ ലഹരി വേട്ട തുടർന്ന് പോലീസ്;ഹോസ്റ്റലുകളിൽ പരിശോധന, കഞ്ചാവ് കണ്ടെത്തി
• Kochi Drug Case:കളമശേരി കഞ്ചാവ് വേട്ട;ലഹരി ഉപയോഗിക്കുന്നവർക്ക് പ്രത്യേക ഗ്യാങ്, നടന്നത് കച്ചവടം
• Kalamassery Ganja Case: കളമശേരി കഞ്ചാവ് കേസ്; അഭിരാജിനെ പുറത്താക്കി എസ്എഫ്ഐ; ഷാലിഖ് കെഎസ്‌യു നേതാവെന്ന് ആർഷോ