കഴിഞ്ഞ ഒരാഴ്ച: സംസ്ഥാനത്ത് ലഭിച്ചത് 110 ശതമാനം അധികമഴ

കൊച്ചി: കാലവർഷം തുടങ്ങി ഒന്നരമാസം പിന്നിടുമ്പോൾ കഴിഞ്ഞ ഒരാഴ്ച സംസ്ഥാനത്ത് പെയ്തത് 110ശതമാനം അധികമഴ. ഇത്തവണ കാലവർഷം തുടങ്ങി ഇതാദ്യമായാണ് സംസ്ഥാനത്ത് അധിക മഴ പെയ്യുന്നത്. 150 മില്ലിമീറ്റർ മഴപെയ്യേണ്ട സ്ഥാനത്ത് കഴിഞ്ഞ ഒരാഴ്ച സംസ്ഥാനത്ത് 315.5 മില്ലി മീറ്റർ മഴയാണ് പെയ്തത്. എല്ലാ ജില്ലകളിലും അധിക മഴ കഴിഞ്ഞ ഒരാഴ്ചയ്ക്കിടെ ലഭിച്ചു. ജില്ലാടിസ്ഥാനത്തിൽ കണ്ണൂരിലാണ് ഏറ്റവുമധികം മഴ ലഭിച്ചത്. 208.6 ശതമാനം മഴലഭിക്കേണ്ട സ്ഥാനത്ത് കണ്ണൂരിൽ 565.6 ശതമാനം മഴലഭിച്ചു. 171 ശതമാനം അധികമഴയാണ് കണ്ണൂരിൽ രേഖപ്പെടുത്തിയത്. 

കോഴിക്കോടാണ് തൊട്ടുപിന്നിലുള്ളത്. 461.8 ശതമാനം മഴയാണ് കോഴിക്കോട് കഴിഞ്ഞ ഒരാഴ്ചക്കിടെ ലഭിച്ചത്. 160 ശതമാനം അധികമഴയാണ് കോഴിക്കോട് ജില്ലയിൽ ലഭിച്ചത്. വയനാട്ടിൽ 206.9 ശതമാനം മഴലഭിക്കേണ്ടിടത്ത് 402.7 ശതമാനം മഴ ലഭിച്ചു. 95 ശതമാനം മഴയാണ് അധികമായി ലഭിച്ചത്. കഴിഞ്ഞ ഞായറാഴ്ച രാവിലെ 8.30 മുതൽ തിങ്കളാഴ്ച രാവിലെ 8.30 വരെ സംസ്ഥാനത്ത് ഈ കാലവർഷ സീസണിലെ റെക്കോർഡ് മഴയാണ് പെയ്തത്. 84.5 മില്ലിമീറ്റർ മഴയാണ് അന്ന് സംസ്ഥാനത്ത് പെയ്തത്. തൃശൂർ, വയനാട്, കോഴിക്കോട് ജില്ലകളിലാണ് അന്ന് കൂടുതൽ മഴപെയ്തത്. 

വരും ദിവസങ്ങളിലും സംസ്ഥാനത്ത്, പൊതുവേ വടക്കൻ ജില്ലകളിൽ ശക്തമായ മഴ തുടരാനാണ് സാധ്യതയെന്ന് കാലാവസ്ഥ നിരീക്ഷണ കേന്ദ്രം അറിയിച്ചു.വടക്കൻ കേരള തീരം മുതൽ തെക്കൻ ഗുജറാത്ത് തീരം വരെ നിലവിൽ ന്യൂനമർദ്ദ പാത്തി സ്ഥിതിചെയ്യുന്നുണ്ട്. അതോടൊപ്പം  വടക്കു-പടിഞ്ഞാറൻ കേരള തീരത്ത് ശക്തമായ കാറ്റ് തുടരാനും സാധ്യതയുണ്ടെന്ന് കാലാവസ്ഥ നിരീക്ഷകർ പറഞ്ഞു.  

Read More

• കനത്ത മഴ; വയനാട് ജില്ലയിൽ നാളെ അവധി
• തീരാമഴ; ഇന്ന് അഞ്ച് ജില്ലകളിൽ? അവധി, ഓറഞ്ച് അലർട്ട് നാലിടത്ത്
• ബംഗാൾ ഉൾക്കടലിൽ പുതിയ ന്യൂനമർദ്ദം; സംസ്ഥാനത്ത് കനത്ത മഴ തുടരും
• ഹൃദയത്തിൽ കൈയ്യൊപ്പിട്ട കുഞ്ഞൂഞ്ഞ്: ഉമ്മൻ ചാണ്ടിയുടെ ഓർമ്മകൾക്ക്