ഗായകൻ സൂരജ് സന്തോഷിനെതിരായ സൈബർ ആക്രമണം; ഒരാൾ അറസ്റ്റിൽ

ഗായകൻ സൂരജ് സന്തോഷിനെതിരെ സോഷ്യൽ മീഡിയയിൽ സൈബർ ആക്രമണം നടത്തിയ കേസിൽ ഒരാൾ അറസ്റ്റിൽ. എറണാകുളം സ്വദേശിയായ ഉണ്ണികൃഷ്ണനെയാണ് പൂജപ്പുര പൊലീസ് കസ്റ്റഡിയിലെടുത്തത്. ഫോണിലൂടെ അസഭ്യം പറയുകയും സോഷ്യൽ മീഡിയയിൽ അപകീർത്തികരമായ പോസ്റ്റ് പങ്കുവയ്ക്കുകയും ചെയ്ത കേസിലാണ് അറസ്റ്റ്.

അയോധ്യ രാമക്ഷേത്ര പ്രതിഷ്ഠാ ദിനത്തിൽ രാമമന്ത്രം ജപിക്കണമെന്നും വീടുകളിൽ വിളക്ക് തെളിയിക്കണമെന്നുമുള്ള കെ എസ് ചിത്രയുടെ ആഹ്വാനത്തെ, സൂരജ് സന്തോഷ് വിമർശിച്ചിരുന്നു. ഇതോടെയാണ് സോഷ്യൽ മീഡിയയിൽ വ്യാപകമായ രീതിയിൽ സൂരജിനെരിരേ സൈബർ ആക്രമണം തുടങ്ങിയത്. 

പള്ളി പൊളിച്ചാണ് അമ്പലം പണിതതെന്ന വസ്‌തുത മറക്കുന്നുവെന്നും എത്രയെത്ര കെ എസ് ചിത്രമാ‌ർ തനിസ്വരൂപം കാണിക്കാൻ ഇരിക്കുന്നു എന്നുമായിരുന്നു സൂരജിന്റെ പ്രതികരണം. സൈബർ ആക്രമണങ്ങളിൽ തളരില്ലെന്നും, തളർത്താൻ കഴിയില്ലെന്നും സൂരജ് കഴിഞ്ഞ ദിവസം സോഷ്യൽ മീഡിയയിൽ കുറിച്ചിരുന്നു.

'കഴിഞ്ഞ രണ്ട് ദിവസമായി നിരന്തരം സൈബർ ആക്രമണണം നേരിടുകയാണ്. മുൻപും ഇതുപോലെ ഉണ്ടായിട്ടുണ്ടെങ്കിലും ഇപ്പോൾ വളരെ മോശമായ രീതിയിൽ എല്ലാ പരിധിയും വിട്ടിരിക്കുകയാണ്. ഇതിനെതിരെ വേണ്ട നിയമനടപടികൾ സ്വീകരിക്കും," സൂരജ് ഇൻസ്റ്റഗ്രാമിൽ കുറിച്ചു.

സൈബർ ആക്രമണങ്ങളിൽ പിന്തുണ ലഭിക്കാത്തതിനെ തുടർന്ന് ഗായക സംഘടനയില്‍ നിന്നും സൂരജ് സന്തോഷ് കഴിഞ്ഞ ദിവസം രാജിവച്ചിരുന്നു. 

Read More:

• സൈബർ ആക്രമണത്തിൽ പിന്തുണ ലഭിക്കാത്തതിനെ തുടർന്ന് ഗായക സംഘടനയില്‍ നിന്ന് രാജിവച്ച് സൂരജ് സന്തോഷ്
• "ഒരു പ്രാവശ്യം ക്ഷമിച്ചു കൂടെ?" കെ എസ് ചിത്രയ്ക്ക് പിന്തുണയുമായി ജി വേണുഗോപാൽ