ഏലയ്ക്ക വെള്ളം കുടിച്ച് ദിവസം തുടങ്ങൂ, അറിയാം ഗുണങ്ങൾ

ശൈത്യകാലത്ത് ദഹനക്കുറവ് മുതൽ ജലദോഷംവരെ തുടങ്ങി പലവിധ ആരോഗ്യ പ്രശ്നങ്ങൾ പലരെയും അലട്ടാറുണ്ട്. എന്നാൽ, ദൈനംദിന ഭക്ഷണത്തിൽ ഏലയ്ക്ക വെള്ളം ഉൾപ്പെടുത്തുന്നത് ശരീരത്തിന് ഗുണം ചെയ്യും. ഏലം, നൂറ്റാണ്ടുകളായി ആയുർവേദത്തിൽ പലവിധ ചികിത്സകൾക്കും ഉപയോഗിച്ചു വരുന്നുണ്ട്. ഉപാപചയപ്രവർത്തനം വർധിപ്പിക്കുന്നതിനും ഏലയ്ക്ക സഹായിക്കും. ഏലയ്ക്ക വെള്ളം കുടിക്കുന്നത് ശരീരത്തിന് എങ്ങനെ ഗുണം ചെയ്യുമെന്ന് അറിയാം.

ശൈത്യകാലത്ത് ഏലയ്ക്ക വെള്ളം കുടിക്കുന്നത് നിരവധി ആരോഗ്യ ഗുണങ്ങൾ നൽകുന്നുണ്ടെന്ന് ഡയറ്റീഷ്യൻ കനിക മൽഹോത്ര പറഞ്ഞു. ശൈത്യകാലത്ത് അമിതമായി ഭക്ഷണം കഴിക്കുന്നത് മൂലം സാധാരണയായി ഉണ്ടാകുന്ന വയറുവേദന, ഗ്യാസ് എന്നിവ കുറയ്ക്കുന്നതിലൂടെ ഏലയ്ക്ക ദഹനം മെച്ചപ്പെടുത്തും. ശരീരത്തിൽനിന്ന് കഫം നീക്കം ചെയ്യാനും ജലദോഷം, ചുമ തുടങ്ങിയ പ്രശ്നങ്ങൾ കൈകാര്യം ചെയ്യാനും ഏലയ്ക്ക സഹായിക്കും. രക്തചംക്രമണം മെച്ചപ്പെടുത്തുകയും ശരീരത്തെ ചൂടാക്കുകയും ചെയ്യുന്നുവെന്ന് അവർ പറഞ്ഞു.

ചില വ്യക്തികൾക്ക് ഏലയ്ക്ക അലർജി ഉണ്ടാക്കിയേക്കാം. അമിതമായ ഉപയോഗം നെഞ്ചെരിച്ചിൽ, വയറിളക്കം, ഓക്കാനം എന്നിവയുൾപ്പെടെയുള്ള ദഹനനാളത്തിലെ അസ്വസ്ഥതകൾക്ക് കാരണമാകുമെന്ന് മൽഹോത്ര പറഞ്ഞു. അതിനാൽ ഏലയ്ക്ക വെള്ളം കുടിക്കുന്നതിനു മുൻപ് ഒരു ആരോഗ്യ വിദഗ്ധനുമായി കൂടിയാലോചിക്കുക.

ഒരു ഗ്ലാസ് വെള്ളത്തിൽ മൂന്നോ നാലോ ഏലയ്ക്ക ഇട്ട് രാത്രി മുഴുവൻ വയ്ക്കുക. പിറ്റേ ദിവസം രാവിലെ ഏലയ്ക്ക ചതച്ചശേഷം അരിച്ചെടുത്ത് വെറും വയറ്റിൽ കുടിക്കുക. ചൂടുള്ള ഏലയ്ക്ക വെള്ളം കുടിക്കുന്നതും ദഹനത്തെയും രക്തചംക്രമണത്തെയും സഹായിക്കുമെന്ന് മൽഹോത്ര അഭിപ്രായപ്പെട്ടു.

ഭക്ഷണശേഷം ഏലയ്ക്ക ചവച്ചാൽ കിട്ടുന്ന ഗുണങ്ങൾ

ദഹനം മെച്ചപ്പെടുത്തും: ഏലയ്ക്ക ചവയ്ക്കുന്നത് ദഹന എൻസൈമുകളുടെ ഉത്പാദനത്തെ ഉത്തേജിപ്പിക്കുന്നു, ഭക്ഷണത്തെ കൂടുതൽ ഫലപ്രദമായി തകർക്കാൻ സഹായിക്കുകയും ദഹനം എളുപ്പമാക്കുകയും ചെയ്യുന്നു.

വയർവീർക്കൽ കുറയ്ക്കുന്നു: ദഹനത്തെ പ്രോത്സാഹിപ്പിക്കുകയും അസ്വസ്ഥത ലഘൂകരിക്കുകയും ചെയ്യുന്നതിലൂടെ വയർവീർക്കലും ഗ്യാസും കുറയ്ക്കാൻ സഹായിക്കുന്നു.

വായ്നാറ്റം അകറ്റുന്നു: ഏലക്കയുടെ സ്വാഭാവിക ആന്റി ബാക്ടീരിയൽ ഗുണങ്ങൾ വായിൽ ദുർഗന്ധം ഉണ്ടാക്കുന്ന ബാക്ടീരിയകളെ ഇല്ലാതാക്കുന്നു.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• പ്രമേഹമുള്ളവർക്കും മുട്ട കഴിക്കാം, ഈ രീതിയിൽ ട്രൈ ചെയ്യൂ
• കഞ്ഞിവെള്ളം വെറുതെ കളയേണ്ടതല്ല, 7 അത്ഭുതകരമായ ഗുണങ്ങൾ
• ചോറ് കഴിക്കാൻ ഏറ്റവും അനുയോജ്യമായ സമയം ഏതാണ്?
• വെറും വയറ്റിൽ വേപ്പില കഴിക്കാം, ഈ സവിശേഷ ഗുണങ്ങൾ അറിയാം