കരൾ രോഗങ്ങൾ തടയണോ? ഡയറ്റിൽ ഈ 5 മാറ്റങ്ങൾ വരുത്തൂ

ശരീരത്തിലെ പല പ്രവർത്തനങ്ങൾക്കും കരൾ നിർണായക പങ്ക് വഹിക്കുന്നുണ്ട്. ആരോഗ്യമുള്ള കരൾ ശരീരത്തിലെ മൊത്തത്തിലുള്ള ആരോഗ്യത്തിന് വളരെ പ്രധാനമാണ്. ഇന്ന് കരൾ രോഗങ്ങൾ സർവ സാധാരണമായിരിക്കുന്നു. നോൺ-ആൽക്കഹോളിക് ഫാറ്റി ലിവർ രോഗം ഏറ്റവും സാധാരണമായ കരൾ രോഗങ്ങളിൽ ഒന്നാണ്. ആരോഗ്യകരമായ ഭക്ഷണം കഴിക്കുന്നത് കരളിന്റെ ആരോഗ്യം നിലനിർത്തുന്നതിന് സഹായിക്കും. 

കരളിൽ കൊഴുപ്പ് അടിഞ്ഞുകൂടുന്നതിൽ നിന്ന് സംരക്ഷിക്കാനും വീക്കം, ഓക്സിഡേറ്റീവ് സമ്മർദം എന്നിവ കുറയ്ക്കാനും കരൾ എൻസൈമുകൾ മെച്ചപ്പെടുത്താനും സഹായിക്കുന്ന സംയുക്തങ്ങൾ പല ഭക്ഷണങ്ങളിലും അടങ്ങിയിട്ടുണ്ട്. കരൾ രോഗത്തെ അകറ്റി നിർത്താൻ ചില ഡയറ്റ് ടിപ്സുകൾ സഹായിക്കും. 

1. ഉയർന്ന കൊഴുപ്പ്, പഞ്ചസാര, ഉപ്പ് എന്നിവ അടങ്ങിയ ഭക്ഷണങ്ങൾ കഴിക്കരുത്

കൊഴുപ്പുള്ള ഭക്ഷണങ്ങൾ കരളിന്റെ ആരോഗ്യത്തിന് ദോഷം വരുത്തും. അവ കരളിൽ കൊഴുപ്പ് അടിഞ്ഞു കൂടുന്നതിനുള്ള സാധ്യത വർധിപ്പിക്കും. അതുപോലെ, ഉപ്പും പഞ്ചസാരയും അധികം കഴിക്കുന്നത് ഫാറ്റി ലിവർ രോഗങ്ങൾക്ക് കാരണമാകും.

2. മദ്യം കുറഞ്ഞ അളവിൽ കഴിക്കുക

മദ്യപാനം കരളിന്റെ ആരോഗ്യത്തെ ബാധിക്കും. ഫാറ്റി ലിവർ രോഗങ്ങൾക്കും മറ്റ് കരൾ രോഗങ്ങൾക്കും മദ്യം ഒരു പ്രധാന കാരണമാണ്. അതിനാൽ, മിതമായ അളവിൽ മദ്യം കഴിക്കുന്നത് നല്ലതാണ്. 

3. സമീകൃതാഹാരം കഴിക്കുക

പോഷകങ്ങൾ അടങ്ങിയ ഭക്ഷണക്രമം കരളിനെ ആരോഗ്യകരമായി നിലനിർത്താൻ സഹായിക്കും. കരളിനെയും ശരീരത്തെയും ആരോഗ്യകരമായി നിലനിർത്താൻ കഴിയുന്ന നിരവധി അവശ്യ പോഷകങ്ങൾ നൽകാൻ സമീകൃതാഹാരത്തിന് കഴിയും.

4. ആവശ്യത്തിന് വെള്ളം കുടിക്കുക

ശരീരത്തിന്റെ ശരിയായ പ്രവർത്തന്നതിന് ആവശ്യത്തിന് വെള്ളം കുടിക്കണം. ശരീരത്തിൽനിന്ന് മാലിന്യങ്ങൾ പുറന്തള്ളാനും കരളിന്റെ പ്രവർത്തനത്തെ പ്രോത്സാഹിപ്പിക്കാനും സഹായിക്കുന്നു.

5. ആന്റി-ഇൻഫ്ലമേറ്ററി ഭക്ഷണങ്ങൾ ഉൾപ്പെടുത്തുക

ആന്റി-ഇൻഫ്ലമേറ്ററി ഭക്ഷണങ്ങൾ ഫാറ്റി ലിവറിൽനിന്നും രക്ഷ നേടാൻ സഹായിക്കും. നട്സ്, ഫാറ്റി ഫിഷ്, പച്ച ഇലക്കറികൾ, ബെറികൾ, ഗ്രീൻ ടീ, ബ്രോക്കോളി, ഒലിവ് ഓയിൽ എന്നിവ കരളിലെ കേടുപാടുകൾ തടയാനും വീക്കം കുറയ്ക്കാനും സഹായിക്കുന്ന ചില ഭക്ഷണങ്ങളാണ്.

കഴിക്കേണ്ട ഭക്ഷണങ്ങൾ

കാപ്പി, ചായ,ബെറികൾ, മുന്തിരി, ഒലിവ് ഓയിൽ, ഫാറ്റി ഫിഷ്, ഓട്സ്, മഞ്ഞൾ, വെളുത്തുള്ളി, ധാന്യങ്ങൾ, ഇലക്കറികൾ, ഫ്രഷ് പച്ചക്കറികളും പഴങ്ങളും, അവോക്കാഡോ, പയർവർഗ്ഗങ്ങൾ.

ഒഴിവാക്കേണ്ട ഭക്ഷണങ്ങൾ

വറുത്ത ഭക്ഷണങ്ങൾ, മദ്യം, പഞ്ചസാര അധികം ചേർത്തവ, അമിതമായ ഉപ്പ്, റെഡ് മീറ്റ്, സംസ്കരിച്ച ഭക്ഷണങ്ങൾ, ബേക്ക് ചെയ്ത ഭക്ഷണങ്ങൾ.

മുകളിലുള്ള ലേഖനം അറിവ് നൽകുന്നതിന് മാത്രമുള്ളതാണ്, പ്രൊഫഷണൽ മെഡിക്കൽ നിർദേശത്തിന് പകരമാകാൻ ഉദ്ദേശിച്ചുള്ളതല്ല. നിങ്ങളുടെ ആരോഗ്യത്തെക്കുറിച്ചോ ആരോഗ്യസ്ഥിതിയെക്കുറിച്ചോ ഉണ്ടായേക്കാവുന്ന എന്തെങ്കിലും ചോദ്യങ്ങൾക്ക് എല്ലായ്പ്പോഴും നിങ്ങളുടെ ഡോക്ടറുടെയോ മറ്റ് യോഗ്യതയുള്ള ആരോഗ്യ പ്രൊഫഷണലിന്റെയോ മാർഗ്ഗനിർദ്ദേശം തേടുക.

Read More

• കശുവണ്ടി കഴിച്ചാൽ സ്ത്രീകൾക്ക് കിട്ടുന്ന ആരോഗ്യ ഗുണങ്ങൾ എന്തൊക്കെ?
• ഇനി അത്താഴം കഴിക്കാൻ വൈകിപ്പിക്കേണ്ട, 7 മണിക്ക് മുൻപ് കഴിച്ചാലുള്ള ആരോഗ്യ ഗുണങ്ങൾ
• ശരീര ഭാരം കുറയുന്നില്ലെന്ന പരാതി ഇനി വേണ്ട, ചില സിംപിൾ ടിപ്സ്
• ഒരു ദിവസം എത്ര സമയം ഇരിക്കാം, ഉറങ്ങാം, വ്യായാമം ചെയ്യാം?