ഓണ സദ്യക്ക് മാറ്റ് കൂട്ടാൻ അടിപൊളി ഇഞ്ചി കറി ഇത്തവണ ആലപ്പുഴ സ്റ്റൈലിൽ ട്രൈ ചെയ്യൂ

മധുരവും പുളിയും ചേർന്ന കേരളീയ വിഭവമാണ് ഇഞ്ചി കറി. അതില്ലാത്ത സദ്യ വട്ടങ്ങൾ ഉണ്ടാവില്ല. തയ്യാറാക്കിയാൽ ഏറെ നാൾ സൂക്ഷിക്കാം. മാത്രമല്ല ദഹനാരോഗ്യം മെച്ചപ്പെടുത്തുന്ന ഗുണങ്ങൾ ഇതിനുണ്ട്. എണ്ണയിൽ വറുത്തെടുത്ത ഇഞ്ചിയുടെ മണം തന്നെ കൊതിപ്പിക്കുന്നതാണ്.

ചുവന്നുള്ളിയോടൊപ്പം വറുത്തെടുത്ത ഇഞ്ചി മസാലകൾ ചേർത്ത് തിളച്ചു വരുന്ന പുളി വെള്ളത്തിലേയ്ക്ക് ചേർത്തിളക്കി പാകം ചെയ്താൽ മതിയാകും. സാധാരണ ഇഞ്ചി കറിയിൽ ചുവന്നുള്ളി ചേർക്കാറില്ല. ആലപ്പുഴ സ്റ്റൈലിലാണ് അതു കൂടി ഉൾപ്പെടുത്തുന്നത്. ഇനി സദ്യ ഒരുക്കുമ്പോൾ ഇഞ്ചി കറി ഇങ്ങനെ തയ്യാറാക്കി നോക്കൂ. ബിൻസി തൻ്റെ ഇൻസ്റ്റഗ്രാം പേജിലൂടെയാണ് ഇത് തയ്യാറാക്കുന്ന വിധം പരിചയപ്പെടുത്തി തരുന്നത്. 

ചേരുവകൾ

• ഇഞ്ചി- 100 ഗ്രാം
• ചുവന്നുള്ളി- 100 ഗ്രാം
• പച്ചമുളക്- 3
• വെളിച്ചെണ്ണ- 3 ടേബിൾസ്പൂൺ
• കടുക്- 1/2 ടീസ്പൂൺ
• വറ്റൽമുളക്- 2
• കറിവേപ്പില- ആവശ്യത്തിന്
• മുളകുപൊടി- 1/2 ടീസ്പൂൺ
• ഉലുവപ്പൊടി- 1 ടീസ്പൂൺ
• കായം- 1 നുള്ള്
• പുളി- 1 നെല്ലിക്ക വലിപ്പത്തിൽ
• വെള്ളം- 3/4 കപ്പ്
• ശർക്കര- ചെറിയ ഒരു കഷ്ണം
• ഉപ്പ്- ആവശ്യത്തിന്

തയ്യാറാക്കുന്ന വിധം

• അടി കട്ടിയുള്ള ഒരു പാത്രം അടുപ്പിൽ വെച്ച് മൂന്ന് ടേബിൾസ്പൂൺ വെളിച്ചെണ്ണയൊഴിച്ചു ചൂടാക്കാം.
• ഇതിലേയ്ക്ക് 100 ഗ്രാം ഇഞ്ചി വട്ടത്തിൽ ചെറുതായി അരിഞ്ഞതു ചേർത്ത് വേവിക്കാം.
  ഇതിലേയ്ക്ക് 100 ഗ്രാം ചുവന്നുള്ളി അരിഞ്ഞതും, മൂന്ന് പച്ചമുളക് അരിഞ്ഞതും ചേർത്തിളക്കാം.
• ബ്രൗൺ നിറമായി വരുമ്പോൾ ഇവ മറ്റൊരു പാത്രത്തിലേയ്ക്കു മാറ്റാം.
  ഇഞ്ചി വറുത്ത അതേ എണ്ണയിലേയ്ക്ക് അര ടീസ്പൂൺ കടുക്, രണ്ട് വറ്റൽമുളക്, കുറച്ച് കറിവേപ്പില എന്നിവ ചേർത്ത് വറുക്കാം.
• അര ടീസ്പൂൺ​ മുളുകുപൊടി, കാൽ ടീസ്പൂൺ മഞ്ഞൾപ്പൊടി, ഒരു ടീസ്പൂൺ ഉലുവപ്പൊടി, ഒരു നുള്ള് കായം എന്നിവ ചേർത്തിളക്കാം.
• ഒരു നെല്ലിക്ക വലിപ്പത്തിലുള്ള വാളൻപുളി വെള്ളത്തിൽ കുതിർത്തതും, ഒന്നര ടീസ്പൂൺ ശർക്കര പൊടിച്ചതും, ആവശ്യത്തിന് ഉപ്പും ചേർത്ത് തിളപ്പിക്കാം.
• ഇതിലേയ്ക്ക് വറുത്തു വെച്ചിരിക്കുന്ന ഇഞ്ചിയും ചുവന്നുള്ളിയും അരച്ചു ചേർക്കുക. ശേഷം അടുപ്പിൽ നിന്നും മാറ്റാം.

Read More: ഓണ സദ്യയിലെ മധുരപ്രിയനായ ശർക്കരവരട്ടിയെ ഇനി ക്രിസ്പിയായി വറുത്തെടുക്കാം, ഇതൊരു നുള്ള് ചേർത്താൽ മതി